ОЛАРНЫҢ ЫРЛАРЫНА ЧОН ХЫНЧА
07.02.2018
Хабарлар
«НА-НА» саблығ ӧме Хакасияда концерт иртірген
Ирткен тынағ кӱннері Хакасия чуртағҷыларының сағызында ӱрге халар, неке. Республикада гастрольларнаң «НА-НА» саблығ ӧме полған. Кем оларның «Фаина», «Месяц май», «Упала шляпа», «Красивая» сарыннарын пілбинче. Ӧменің пасха даа ырларын кізілер амға теере хынып исчелер.
Саблығ ӧмені 1989 чылда продюсер паза музыкант Бари Алибасов тӧстеен. Морсымнығ сарнапчатхан, чахсы теелбектенчеткен ооллар хысхаҷах тус аразына СССР-ның прай абахайларын аптап алғаннар. Дискотекаларда «НА-НА» ӧменің не сарыннарын истерге чарир полған. Ол тустаң 30-ха чағын чыл ирт парған даа полза, артисттернің чайаачызына кӧрігҷілер ам даа хынчалар. Тиктең нимес ирткен пятницада Ағбандағы чииттер ӧргезінде пос орын чох полған.
НАА САРЫННАР КӦП
Че «Наа паза иң хынчатхан сарыннар» концерт программазын пастир алнында, «НА-НА» ӧме «Фаина» сарынны толдырча ырҷылар, орындағы хабарҷыларнаң тоғазып, оларның сурығларына нандырғаннар. Амды ӧмеде тӧрт кізі. Россияның саблығ артисттері Владимир Политовнаң Вячеслав Жеребкин «НА-НА»-да 1990 чыллардаң сығара сарнапчалар. Леонид Семидьянов ідӧк ӧмеде илееде тус істенче. Ол аймах кӧг тиріглерінең ойнапча. Иң чиит араласчы Михаил Игонин полча.
Ырҷыларның таниинаң, гастрольларнаң олар удаа чӧрчелер. Пірееде Москвада 3-4 ай полбинчалар. Пу гастрольлар «Боевое братство» тиксі Россиядағы ветераннарның халых пірігізінің Хызылчардағы пӧлии полызиинаң иртчелер. Ол Ада чир-суубыс арачылағҷызы кӱніне чарыдылған. Ікі неделя аразына артисттер 18 городта паза поселокта пол килерге пӧгінчелер. Хакасияда ӧменің концерттері Ағбанда, Нымырттығ посёлокта паза Ширада полғаннар. Кӱннің сай концерт иртірерге андағ ла оой нимес, че посты орта кӧстеп салзаң, прай ниме килізер. Аймах халых пірігістернең хада «НА-НА» ӧме удаа тоғынчаттыр. Ідӧк чайаачы устар полызығлығ акцияларда аралазарға кӱстенчелер. Владимир Политов чоохтаан: «Піс санапчабыс, оңдай полза, кізілерге хайди даа полызарға кирек. Аннаңар олған тураларында ӧсчеткен палаларға алай «ізіг точкаларда» палығлатхан чааҷыларға госпитальларда концерттер иртірчебіс. Хомзынысха, алынҷа полызығлығ проект чуртасха кирерге тус читпинче».
Региондағы кӧрігҷілерге артисттер хынчаттырлар. Хайди таныхтаан Вячеслав Жеребкин, улуғ нимес город паза посёлоктар чуртағҷыларына, москвадағыларнаң тиңнестірзе, саблығ ырҷыларның концерттерінде удаа поларға киліспинче. Ол чоохтаан: «Пу кӱннерде Сус поселокта полғабыс, кізілер «НА-НА» ӧме пеер килгеніне саңай ӱрӱк парғаннар, алаахтырт саларларына чочынған поларлар. Ағбанда концерттер удаа иртірчебіс. Мында нанҷыларыбыс пар».
Итсе, «НА-НА» пістің республиказар гастрольларнаң тӧреміл килчетсе дее, Бари Алибасовтың ӧбекелерінің пірсі хакас полғанын ис салып, пастап алаң ас парғаннар. Анаң Владимир Политов чарыт пирген: «Бари Каримовичтің родында татарлар, казахтар, еврейлер пар, че иргі паспортта ол «орыс» пазылған».
Тоғазығның халғанҷызынзар сарыннардаңар чоох парған. Артисттернің таниинаң, концерттерде кӧрігҷілер 1990 чыллардағы ырларны истерге сағынчалар. Че ӧменін репертуарында наа сарыннар кӧп, аннаңар чайаачы устар гастрольлар тузында кізілерні оларнаң таныстырарға пӧгінчелер.
«Наа паза иң хынчатхан сарыннар» концерт 19.00 часта пасталған. Аны саблығ «Фаинанаң» азып, музыканттар сах андох чыылысхан чонның чӱреен хайылдырғаннар. «НА-НА»-ның сарыннарын ӧӧнінде ипчі чон хынып исчеттір. Артисттернең хада олар 1990 чылларда пазылған прай ырларны сарнап пиргеннер. Итсе, ӧменің амғы репертуарынаң саннығ ла кізі таныс полтыр. Тди дее полза, полған на толдырылған сарын соонда залдағы чон артисттерге матап айа сапхан.
Концерт тузында ырҷылар кӧрігҷілернің піреезін, сценазар сығарып, хада сарнирға кӧӧктіргеннер. Ағбанның чуртағҷызы Владимир «Где ты была» сарынны толдырған. Ӱні чох таа полза, ир кізі чідірінмеен, прай кӧңнін салып сарнирға кӱстенген. Ӧменің наа саблығ ырларынаң «Зинаиданы» таныхтирға кирек. Аны толдырар алнында артисттер залда Зинаида аттығ ипчілер пар ба тіп сурғаннар. Пір Зинаида Анатольевна табылған. Пӱӱнгі кӱнде ол ат арам учурапчатханы таңнатхан. Кӧгліг сарын кізілернің кӧңнін кӧдірген.
Москвадағы чайаачылар региондағы кӧрігҷілерзер пасха-пасха хайчалар. Піреезі залдағы чонға постарын сомға суурарға, андар чағын пастырарға чаратпинча. Пасхазы «тіріге» сарнир орнына фонограмма пастыра ырлапча. Мында андағ ниме чох полған. «НА-НА» ӧменін артисттері, «чылтыстар» даа ползалар, кӧрігҷілернең олаңай тудынғаннар, постарының Инстаграмдағы страницаларынзар кірерге сурынғаннар.
Саблығ ӧменің концерті пір тыныснаң ирткен. Аның халғанҷызынзар аарлығ аалҷылар хатап «Фаинаны» толдыр пиргеннер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы