БЮДЖЕТТЕ АЛЫЗЫҒЛАР
16.02.2018
Хабарлар
Республика парламентінің президиумы теестегі чыылиинда тоғыс закон проектінең танысхан
Хакасияның финанстар министрі Ирина Войнова «2018 чылға паза кӧрілген 2019 паза 2020 чылларға Хакасияның республика бюджедінеңер» законға алызығлар кирердеңер» закон проектінең таныстырған.
Удаа республика бюджедінзер алызығлар, чыл тоозылчатса алай федеральнай бюджеттең кӧстегліг ахча ызылза, кирілчелер. Республиканың финанстар министрі Ирина Войнованың чарытханынаң, пу чылға алызығлар нинҷе-де кӧстегҷе кирілче. 2017 чылның улуғ хырлас айының 27-ҷі кӱнінде Россияның финанстар министерствозында Хакасияның бюджет ӧдізін ниик оңдайнаң айландырарынҷа чӧптезіг иділтір. Пӱӱнгі кӱнде республиканың хазна ӧдізі 24 миллиард салковайға тиңнелче, ол санда 14 миллиард салковай - бюджет ӧдізі, хайзы регионға федеральнай бюджеттең пирілген. Бюджет ӧдізін айландырарына республика бюджедінең 2,6 миллиард салковай чылда киректелген, оңдайлар нииктелген соонаң чылда 705 миллион салковай хорадылар.
Андағ оңдайнаң республика бюджеді чылда 1,9 миллиард салковай ӱзӱрлир.
Аннаң пасха, федеральнай бюджеттең 162 миллион салковай кӧстегліг ахча ызылған: 66,680 миллион салковай пастағы палаа пособие тӧлиріне, 96 миллион салковай льготалығ имнер аларына. Улуғ нимес алызығлар хорадығларға кирілген. Республика бюджедінің ӧӧн кӧзідіглері тиңнелер: парыстар - 26 миллиард 539 миллион 664 муң салковайға, хорадығлар - 27 миллиард 850 миллион 352 муң салковайға, дефицит - 1 миллиард 310 миллион 688 муң салковайға.
Ідӧк президиум «Налог тӧлепчеткеннернің алынҷа категорияларына организацияларның парысха налог ставказынаңар, хайзы Хакасияның бюджедіне тӧлелче» законзар алызығлар кирчеткен закон проектінең танысхан. Аны хоостыра тимір рудазын аныпчатхан паза тимнепчеткен предприятиелерге парыстанған пастағы чылдаң пасти пис чыл налог ставказы 0% тиңнелер, пазағы пис чыл - 10%. Республикада тимір рудазы Абазада паза Тӧӧ пазында анылча, хайда киректер уғаа хомай полған. Пу закон алылза, предприятиелер киректері чахсыланарына ізеніс парын таныхтаан Хакасияның Ӧӧркі Чӧп кнес орынҷызы Юрий Шпигальских.
Закон проекттері теестегі сессияда депутаттар ӱзӱриине сығарылар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы