ЧОН, ӰЛГӰ, БИЗНЕС - ХАДА УЛУҒ КӰС
23.05.2018
Хабарлар
Форум. Хакасияда «Социальнай проекттер биржазы» кӧзідіг пастағызын на ирткен.
Республиканың музей-культура кінінде президент программазын тоосханнарның регионнар аразындағы форумы азылған. Аны хоостыра «Хакасияның социальнай проекттер биржазы» кӧзідіг ирткен. Анда республиканың халых пірігістері, имнег паза ӱгредіг учреждениелері, идінӌектер паза олаңай ӧткін чон араласхан. Олар прайзы чонға тузалығ проекттерін кӧзідіге ағылғаннар.
Чыылыс парған чонны Хакасияның экономика тилізі министрінің пастағы орынӌызы Александр Терещенко республика пазы Виктор Зиминнің паза тиксі правительство адынаң форум азылғанынаң алғыстаан. Ідӧк аның сӧстеріне хозылғаннар Хакасияның Халыхтар палатазының кнезі Ольга Левченко паза президент программазын тоосханнарның ассоциациязының региондағы устағӌызы Андрей Гагарин Правошинский. Олар форум араласчыларына тӱзімніг тоғыс алғааннар.
Таныхтирға кирек, форум ӱлгӱдегілернің, бизнестегілернің паза чонның теелізін тыыдарына кӧстелген. Аны «Хакасияның социальнай проекттер биржазы» кӧзідіг киречілеен. Ол коммерческай нимес пірігістерге проекттерін ӱлгӱдегілерге паза идінӌектерге кӧзіт пирер оңдай пирген. Кӧзідігде тиксі 33 проект араласхан. Полғанының на позының кӧстее: туризмні тилідері, юридическай полызығ пирері, кинектерге хабазары, чииттернің чайаачы оңдайларын тилідері паза даа пасхазы. Оларның прайзының тузазы улуғ, аннаңар полғаны ла алынӌа хайығ кирексіпче.
Кӧзідіг тузында аалӌылар полған на проектнең чағын танысханнар паза иң артиина ӱнін пиргеннер. Іди ӱн пиріс хоостыра 10 иң чахсы проект табылған. Оларның пірсі - «Ханаттар» коммерческай нимес пірігістің проекті «Хаӌан ханаттар ӧс килче...» Аның ӧӧн сағызы - аттар полызиинаң кинек олғаннарның хазиин тыыдары паза чуртассар кӧрізін алыстырары. Проект тӧстегӌілерінің чооғынаң, олғаннарнаң «Чигірен ат» спорт клубында айғасчалар. Анда ӧнетін ӱгреділген аттар паза кинек палаларнаң айғазар специалист пар. «4Е» ӧткіннер ӧмезі, тізең, проекты экология суриина чарытхан.
- Проект хоостыра піс олғаннарға Хакасияның чир-чайаанынаңар кино кӧзітчебіс, чапсых уроктар иртірчебіс, мастер-класстарда олғаннарнаң хада экоручкалар итчебіс паза республикадағы чир-чайаан хайраллалчатхан орыннарда азых уроктар апарчабыс. Прай ол тикке иділче, че, ачырғасха, пістің позыбыстың транспорты чоғыл, - таныхтаан Ония Шаталова.
Артыхтарның артығы Хакас хазна университедінің тӧреміл ӱгредіг институдының ӧмезі полыбысхан. Оларның «Тархыныбысты хайраллап, таңдағызын чайапчабыс!» проекті иң не кӧп ӱн чыып алған. Аның пӧгіні - Устӱнзархы Сибирьде чуртап-чатхан чоннар культуразының музей-педагогика кінін тӧстирі.
- Ол кін хойнында наа оңдайлығ кип-азахтар кӧзітчең студия тоғынча, хакас тілі уроктары апарылча, кӧг тиріглерінең ойнирға ӱгретчелер, национальнай ӱлӱкӱннер, ойыннар иртірілче паза музей экскурсиялары тӧстелче, - проектінең таныстырған педагогика наукаларының кандидады Андрей Карамчаков.
Пуох туста аның сӧстерін киречілееннер орыс паза хакас кӧгенектіг хыстар. Оларның хайзы, стол кистінде одырып, сӱбӱректердең кӧклӧлер иткен. Пасхазы, хыриндох одырып, чатханнаң ойнаан, кем-де аалӌыларны, стол кистінзер иртіріп, чей ізерге хығырған. Аннаңар даа полар, оларның проекті кӧзідігде иң не чарых паза «тіріг» пілдірчеткен.
Чоох чоғыл, хынығ проекттер кӧп полған. Оларның полғанының на позының пӧгіні, позының полызар чоны, че, андағ даа полза, олар пір тоғыс итчелер - кемнің-де чуртазын нииктепчелер.
Таныхтирға кирек, иң чахсы проекттерге ӧнетін сертификаттар читірілген. Аны хоостыра проект тӧстегӌілеріне аймах полызығ тикке пирілер.
Ідӧк президент программазын тоосханнарның форумы хоостыра музей-культура кінінің ӱзінӌі хадылында «Ахча тартып алар ӱчӱн, хайди проекттер тимнирге» семинар ирткен. «Сибирьдегі финанстар системазы» ООО-ның ӧӧн директоры Валентин Богомолов пос киреен тилідер ӱчӱн хайдаң ахча тартып аларға чарирын искірген. Мероприятиенің пу чардығында ӧӧнінде идінӌектер паза аймах пірігістернің устағ-пастаа полған.
«Хакасияның социальнай проекттер биржазының» чиңісчілері Президент программазын тоосханнарның ассоциациязының региондағы устағӌызы Андрей Гагарин-Правошинскийнің таниинаң, форум Президент гранты полызиинаң ирткен. Аның ӧӧн пӧгіні - ӧткін чонның, ӱлгӱнің, идінӌектернің пірге тудынғанының улуғ кӱзін кӧзіт пирері.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы