Алексей Иванович Котожековнаң анымҷохтасчабыс
29.03.2021
Хабарлар
Ӱр нимес ағырған соонда ах чарыхтаң парыбысты хада тоғынған арғызыбыс, СССР-ның Журналисттер пiрігізінің араласчызы, Россия культуразының саблығ тоғынҷызы Алексей Иванович Котожеков
Пос тілінең сыхчатхан газетаның тархынында ол чалғыс ла хабарҷы полар, хайзы подчитчикнең, олаңай корректорның полысчызынаң, сығара ӧӧн редакторның тоғызын толдырарына читіре ӧс парыбысхан.
Алексей Иванович 11 августта 1945 чылда амғы Алтай аймаандағы Хызыл Салда аалда тӧреен. Аршаннар аалында ортымах школа тоосханда, пабазына мал аразында хайынарға полысхан, анаң армияа парған. Служба соонаң «Ленин чолы» редакциязар тоғыс кӧрглеп кірген. Редактор Семен Константинович Добров, чоохтасхан соонда, аны подчитчикнiң тоғызына алған.
Істеніс чолын пастаан чиит оол Ағбандағы ӱгретчілер институдын заочно тоосхан. Аны чииттер пӧлиинің устағҷызына турғысханнар. Тіспен тоғызы ӱчӱн 1998 чылда Знак Почета орденнең, 1999 чылда «За заслуги перед прессой: четвертая власть» танығнаң сыйыхтатхан. Орындағы ӱлгӱдегілер дее аны кӧп хати аймах-пасха сыйыхтарнаң таныхтап турғаннар.
Таныхтирға кирек, Алексей Иванович школада ӱгренчеткендӧк кибелістер пасчаң, редакциязар ызыбысчаң. Аның ӱчӱн кӧмес тее ахча ыс пирзелер, матап ӧрінчең. Соонаң аның чайаачы тоғыстары пістің газетада даа, «Ах тасхыл» альманахта даа сыхчаңнар. Иң чахсылары чииттернің «Часхы пӱрлер» чыындыда чарых кӧргеннер.
Ол часкалығ паба паза аға полған. Хада хонғаны Светлана Максимовнанаң пір оол, ікі хыс ӧскіріп, чон аразына кир салғаннар. Палалары іҷе-пабазына турыстығ тоғын парчалар.
Піс Алексей Ивановичтің сӧбірезінең, туған-чағыннарынаң улуғ хомзыныснаң ӱлесчебіс. Хада тоғынған арғызыбыстың чарых омазы пістің чӱреебісте саңайға халар.
Чатханың нымзах, чабынғаның торғы ползын, аарлығ нанҷыбыс.
«Хакас чирінің» тоғынҷылары
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде