НАА ОЙЫН ОЛҒАННАРНЫҢ КӦҢНӀНҶЕ
09.04.2021
Хабарлар
Олған книгазының неделязы-2021. Мындағ чӧрім иртірділер пу кӱннерде Хакасияның олған библиотеказының тоғынҷылары
Хакасияның олған библиотеказының тоғынҷылары пу чӧрімні полған на сай пасха оңдайнаң иртірерге кӱстенчелер, кічіг частығ хығырығҷылар нимее хынчатханын санға алып, наа нимелер киріп одырчалар. Кӧзідімге, амғы палаларның пос тустағы ӱтеертістерінің пірсі «квест» полча. Аннаңар пу чыл Олған книгазының неделязын андағох ойын пастыра иртірібізерге чарадығ алылған. Ӱгренҷілернің пілізін алғытчаң квест «Книжные сталкеры» адалған. Ол пу культура учреждениезінде тӧрт кӱн ирткен.
Библиотекарьлар сағын тапхан кип-чоох хоостыра олған библиотеказында букваларны чіпчеткен «жуктар» тол парғаннар. Пастағы кӱнде оларның нимістенҷең нимелері классика литературазы, ікінҷі кӱнінде нымахтар, ӱзінҷізінде поэзия, тӧртінҷізінде детективтер полғаннар. Библиотеказар килген палаларға книгаларны пу «хурт-хоостардаң» арачылирға киректелген. Орта чоохтаза, кӧріл парған орыннарда библиотека тоғынҷылары пирген тоғыстарны толдырып, книгалар аразынаң ол «жуктарны» сығарарға. Прай ӱс орын полған: «Литература лабиринті», «Книга бункері» паза «Хам».
Халғанҷызының ээзі Хакасияның олған библиотеказының чир-суғ ӱгренҷең литература пӧлиинің устағҷызы Елена Тохтобина полған.
- Пастағы кӱнде - классика литературазы кӱнінде - «Хам» адалған орында квест араласчылары, пирілген петроглифтернің полғанын на санға айландырып, «жук» кір парған книга хайдағ тасхахта чатчатханын піліп аларға кирек полғаннар, анаң хакас писательлернің чуртастарына паза чайаачыларына чарыдылған викторинаны иртібізерге. Квесттің ікінҷі кӱні нымахтарға чарыдылған. Пу орында олғаннарға перфокарта полызиинаң хакас чонның пір нымағының адын таап аларға киректелген, анаң аны алынҷа тасхахта сығарыл парған кӧзідігдегі книгаларда таап аларға. Анда теестегі «жук» чатхан. Поэзияа чарыдылған кӱнде хакас кибелісчілерні сомнары хоостыра танып аларға кирек полған. Тиксі чоохтаза, олғаннарға тың хынығ полған пістің тӧрт кӱнніг квестте аралазарға. Пір кӱнде отысха даа чағын пала пол парыбысчаң, - чарыт пирген ол.
Ағбандағы школалардаң кил турған олғаннарға чахығларны пірердең дее, ӧменең дее толдырарға чарадылған. Оларға полғанына ла, библиотеказар кірзӧк, хайдағ орыннарҷа чӧрері кӧзіділген чаҷыннар пирілгеннер. Тоғыстарны толдырып, «хурт-хоостарны» таап алған соонаң оларда ӧнетін танығлар иділ турғаннар. Анаң олғаннарға теестегі орынзар пілістерін сыныхтирға чол азылчатхан.
«Литература лабиринтінде» нымахтар кӱні хайди ирткенінеңер хысхаҷахти чоохтаза, анда пу кӱнде ӱгренҷілернің аймах чоннарның нымахтарын хығырчатханы сыныхталған. «Книга бункерінде», тізең, «фэнтези» жанрлығ книгалар хоостыра викторина иртірілген. Олғаннарға сурығларға нандырар алнында хығырған книгаларны таллап аларға чарадылған. Оларның санында саблығ «Гарри Поттер» полғанох, че ӱгренҷілернің кӧбізі «Коты-воители» книганы таллап алчатхан. Ол піске таныс полбаза даа, амғы тӧл аны артых ла хығырчаттыр тіп салтар идерге килісче.
Чыып алған «хурт-хоостарны» олғаннар ӧнетін кӧріл парған «лабораториязар» апарарға кирек полғаннар. Анда одырчатхан «профессор» оларның чачыннарындағы танығларны сыныхтабысчатхан, «жуктарны» санабысчатхан. Анаң олох чаҷыннарзар лотерея санын чапсырыбысчатхан. Ана ол квесттің ӧӧн кӧстее полған нооза! Лотерея сыйыхтары олғаннарға таңда читірілері кӧрілче.
Библиотеканың тоғынҷылары Олған книгазының неделязын апрельнің пастағы кӱннерінде олаңай ла иртірбинчелер. Пу туста прай даа библиотекаларда пу чӧрім иртірілче нооза. Олар аны 2 апрельде чоннар аразындағы синде таныхталчатхан Олған книгазының кӱніне чарытчалар.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде