ПРАВИТЕЛЬСТВО НАА ЧАХЫҒЛАРҒА ТИМДЕ
14.04.2021
Хабарлар
Азых чоохтазығ. Пӱӱнгі сығарыста Хакасия пазы Валентин Коноваловнаң алғым чоохтазығны пирчебіс. Валентин Олегович тымо тузында республиканың тилізінеңер, национальнай проекттернің чуртасха кирілчеткенінеңер паза хакас чонның сурыныстары хайди толдырылчатханнаңар чоохтапча
- Валентин Олегович, чооғыбысты иң сидік сурығдаң - тымодаң - пастирға сағынчам. Россия паза тиксі тилекей пір чыл азыра хатығластар кирілген оңдайларда чуртап парир. Хайди Хакасия COVID-19 ағырығнаң кӱрескен паза кӱресче?
- Республика, тиксі хазна паза прай кізі чуртазы алнындағы ӧӧн пӧгін пу ағырығдаң ӧме арачыланызын, иммунитет, табырах тӧстеп алары полча. Пістің ікі ле чол пар. Пастағызы хоостыра кізі коронавирусты хаптырған соонаң антителалар сығарып алча, че ағырғаны кізі хазиина паза чуртазына най хорғыстығ. Аннаңар ікінӌі чол - ол вакцина турғызары. Пӱӱнгі кӱнде Хакасияда ол ӧткін апарылча. 30 муң 344 чуртағӌы вакцинаның пастағы чардығын турғыстырып алған, 18 муң 904 кізі - ікінӌізін.
Амды промышленность тоғызын айнытчатханда, неделя сай сығарыс ӧсчеткенде, піс вакцина турғызарын ідӧк ӧскірербіс. Хазна синінде вакцинаны турғыстырарынӌа Хакасия хомай нимес орында турча: ол Россиядағы ортын саннардаң сала пӧзік, че піс уламох кӧп турғызарға тимдебіс. Чонға вакцинаны турғызып пастааннаң республиказар COVID-19 ағырығдаң тоғыр прай 38,6 муң доза вакцина кірген. Хандых айының 1-ғы кӱніне республиканың 113 муң чуртағӌызы коронавирустаң тоғыр прививканы турғыстырып аларға кирек. Андада піске ағырығның наа «салғағынаң» хорыхпасха чарир.
- Ӱзінӌізінең дее?
- Ӱзінӌізінең дее, аның соондағыларынаң даа. Кізі чуғынӌах ағырығлардаң тоғыр кӱресчең наа оңдай сағын таппаан. Вакцина - иң чахсы оңдай. Аннаң хада COVID-19, кискек чіли, піске хорғыстығ полбас.
Ағырығнаң кӱрезерінің пасха сариларын алза, пӱӱнгі кӱнде имнег тураларында пос орғаннар саны хозылча. Коронавируснаң ағырчатханнарға 236 орын кӧріл парған. Пос орын саны полған на кӱн алысча, че ортымахти 30 - 50 процентте тудылча. Кӧрілген тус хоостыра имнег полызиин читірері нааӌылалған.
- Наа чуғынӌах ағырығ регионның хазых хайраллир киреене чахсы сыныхтағ полды. Имнег тураларының оборудованиезі паза оңдайлары пілдірте нааӌылалған, имнег киреенде істенчеткеннер, тізең, ағырығнаң кӱрезіп, улуғ опыт алып алғаннар. Олох туста регионда «кадрлардаң ӧзӧгіс» таныхталча, имӌілер, алынҷа специалисттер, ортын синніг тоғынӌылар чидіспинче. Хайди кадрлар сурии пӧглче?
- Федеральнай даа, регион даа синінде хазых хайраллирына чахсы ахча позыдылған. Наа имнег оборудованиезі, ағырыға тесттер иртірӌен системаларға ниме-ноо алылған, имнег тоғынӌыларына хоза ахча тӧлелген. Чоохтирға кирек, хоза тӧлеглер регион синінде ам даа пар, итсе, пірее регионнар оларны хыйа идібіскеннер.
Талас чоғыл, республикада, пасха регионнардағы чіли, кадрларнаң сидіксіністер пар. Піс полған на чуртағӌы имӌіні алай фельдшерні амох паза мында киректепчеткенін пілчебіс, хомзынысха, сағам андағ оңдайлар чоғыл. Тиксі алза, имнег учреждениелерінде тоғыс орыннарының 74 проценті ле толдырылған. Ӧӧнінде аймах кіннерінде паза аалларда имӌілер чидіспинчелер.
********************************
Мыннаң мындар толдыразынаң хығырарға итсеңер, "Хакас чирi" газетаның PDF-кӧрiмiне пазын саларға чарир.
Толдыразынаң мында - http://khakaschiry.ru/gazetaa-pazynys.php
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы