Ӱгредiг тилiзiне – 100 миллион салковай
14.04.2021
Хабарлар
Ол син ахча позыдарға тимде РУСАЛ. Аннаңар искiрче Хакасия пазы Валентин Коновалов социальнай сетьтердегi позының страницаларында.
Хакасия пазы Валентин Коновалов пӱӱн Хызылчардағы экономика форумында араласча. Анда ол Хакасия правительствозы адынаң РУСАЛ компаниянаң хада 2020-2023 чылларда республиканың чуртас-экономиказын тилiдерiнҷе хада-пiрге тоғынардаңар чӧптезiге хоза чӧптезiгде хол салған. Пӱӱл РУСАЛ регионда Ӱгредiг киреендегi тоғыстарны чуртасха кирерiне 100 миллион салковай позыдар.
Хоза чӧптезiгде iдӧк РУСАЛ-ның паза республиканың кiчiг паза ортын пос киреенең айғасчатханнарның аразында кооперацияны тыыдары кӧрiлче.
– РУСАЛ кӧп чыллар изере Хакасияның iзестiг партнеры полча паза полызығ пирерiнең ӧткiн айғасча. Регионда РУСАЛ-ның ахчазына чыл сай школалар тыхталча, чонға кирек учреждениелерде оборудование нааҷылалча, тура ибiркi чирлерiнде олғаннарға спорт-ойын ачыхтары турғызылча, чирлер иптелче, наука фестивальлары иртiрiлче паза пасха тоғыстар толдырылча, – таныхтапча Валентин Олегович.
Чоохтирға кирек, Хызылчардағы экономика форумы хазнаның иң килкiм экономика мероприятиелерiнiң пiрсi полча. Ирткен чылда тымо сылтаанда ол иртiрiлбеен. Пӱӱл аны иртiрерiне чарадығ пирiлген, че чонны iкi ле кӱн чыырға чарадылған: 12 паза 14 апрельде, 13, 15 паза 16 апрельде прай мероприятиелер онлайн оңдайнаң иртер.
Пӱӱн Хакасия пазы Валентин Коновалов Хызылчардағы экономика форумының тоғызында араласча. Ол Корея Республиканың Иркутск городтағы Ӧӧн илҷiзi Ким Се Уннаң тоғасхан. Корея Республика Хакасияның садығҷа хада тоғынчатхан хазна полча: андар хара тас, алюминий паза алюминий ниме-ноолары садылча. Тоғазығда, тiзең, Хакасиядаң iдӧк минералларны, мӧӧт, тайға оттарын, тадылығ чиистi паза пасха ас-тамахты читiрерi ӱзӱрiлген.
Паза пiр чахсы палғалысчаң кӧстег – туризм. Хакасия пазы Валентин Коновалов Ун арғысты «Сибирь. Притяжение» пастағы чоннар аразындағы турист форумында аралазарға хығырған. Ол Ағбанда 22-23 апрельде иртер.
– Хакасия правительствозы чоннар аразындағы палғалысты тыыдарын паза чуртас-экономика проекттерiн чуртасха кирерге киректелчеткен, iдӧк садығ-экономикадағы, наука-техникадағы паза культурадағы тузалығ хайызығларны алғыдарын узаратча, – чарытхан Валентин Олегович.
Автор :
Тимнеен Наталья Субракова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде