ЛЕНИНГРАДТАҒЫ ПАСТАҒЫ СТУДИЯА ЧАРЫДЫЛЧА
16.04.2021
Хабарлар
Культура. А.М.Топановтың адынаң национальнай драма театрында «Ленинградта пастағылары» наа ойын тимге сығарылды. Аның авторы паза режиссеры - Хакасияның чон артизі, Россияның саблығ артизі Светлана Чаптыкова
...1939 чылда Хакас автоном облазының аймах пулуңнарында чурттығ чибіргі азыра оол-хысха часкалығ ӱлӱс тӱскен - олар Ленинградтағы А.Н.Островскийнің адынаң театр институдынзар ӱгренерге кіріп алғаннар! Пастағы хакас студияның чииттері сцена искусствозынңа устар Ян Фридтің, Екатерина Шереметьеваның паза Всеволод Майковскийнің студенттері полыбысханнар.
Оларны тӧреен-ӧскен чирінде Александр Топанов устапчатхан национальнай драма театрында чидікпин сахтапчатханнар. Пастағы профессиональнай артисттерге килістіре улуғ репертуар тимнелчеткен. Че чайаачы пӧгіннер толбин парғаннар. 1941 чылда Илбек Ада чаа пасталыбысхан, анан - Ленинград хурчаа...
Андада Хакасиядаң парғаннарның прайзының пір ле сағыс полған - чааны тобырып, артист полып, ибзер айланарға. Че чибіргі азыра кізідең айланғаннар: Клавдия Чаркова, Анастасия Тодикова, Елена Килижекова, Тамара Баинова, Анна Какашкина, Анна Тодышева, Анна Заболотникова.
Пу хыстар 1942 чылда Костромазар кӧзірілгеннер, анаң на Ағбанзар айланғаннар. Оларның прайзы театрзар килбеен. Килгеннері, тізең, чуртастары тооза театрда тоғын салғаннар.
«Ленинградта пастағылары» - 1939 чылда Хакасиядаң Ленинградсар парған хыстарның хурчағдағы иреелестерінеңер ойын. Аны харах чазы чох кӧр полбассың. Олох туста Илбек Ада чааны турыстыра иртібіскен чииттер ӱчӱн тың поғдархапчазың.
Пу ойынны пазарында паза турғызарында Светлана Чаптыкова Ленинград хурчаанда полған актрисалар Елена Килижекованың, Клавдия Чаркованың, Анастасия Тодикованың паза Тамара Баинованың (Щукинаның) дневниктерінде пазылған танығларынаң тузаланған. Ағаа хоза, ол пу саблығ артисттернең хада пір театрда тоғынарға, гастрольларға чӧрерге маңнанған. Паза Светлана Семёновна чайаачы устардаңар телепередача тимнеен.
- Пӱӱл Хакас национальнай драма театры 90 чыллығ пайрамын таныхтапча. Аның тӧстегҷілеріне улуғ алғыс читірерге кирекпіс. Пу ойынны, ідӧк алынҷа алғыс читіріп, Ленинградтағы пастағы хакас студиязына чарытчабыс. Анда ӱгренген оол-хыстарның пічіктеріне тӧстене, піс амғы тӧлге театрның сын тархынын кӧзітчебіс, - теен Светлана Чаптыкова.
Чоохтирға кирек, «Ленинградта пастағылары» ойынны 2019 чылдаң турғызып пастааннар. Андада Нева суғ хазындағы городтың театр институдынзар пастағы хакас студия алылғаннаң 80 чыл таныхталған. Пастап аның видеоға суурылғаны А.М.Топановтың адынаң национальнай драма театрының социальнай сетьтерінде кӧзіділген. 2020 чылда пу ойынны Ағбанда Пастағы май ачығында Илбек Чиңістің 75 чылына чарыдылған пайрамда кӧзідерге кирек полғаннар. Че пандемия пасталыбысхан.
Амды, тізең, «Ленинградта пастағылары» (12+) ойын чон хайиина сығарыл парды. Ол орыс тілінең турғызылған. Анда, ӧӧнінде, национальнай драма театрының чиит артисттері араласчалар. Ойынны кӧглернең Хакасияның чон артизі, композитор Татьяна Шалгинова чазапча.
Аның теестегі кӧзідии «Ах иб» республика синіндегі кӧс чӧрчеткен фестивальы хоостыра 19 апрельде драма театрының кічіг залында 13.30 паза 18.00 часта иртер.
Пу проект «Кічіг чир-суғның культуразы» федеральнай проекттің «Кічіг городтар театрлары» кӧстее хоостыра чуртасха кирілген.
Автор :
Светлана СЕЛИГЕЕВА, А.М.Топановтың адынаң национальнай драма театрының литература пӧлиинің устағӌызы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде