ИҢ ЧАХСЫЛАРЫ ХАӋАН ДАА ААРЛАСТА ПОЛАДЫР
07.05.2021
Хабарлар
*************************************************************************************************
Істеніс кӱніне удур Хакасия пазының алғыстас пічиинең аал хонии тоғынҷыларын сыйыхтааннар. Кӧп чыл істеніп, аал хониин тилідерінде улуғ хозым итчеткен ӱчӱн, республика правительствозында 9 кізі чеестелген.
Оларны, Істеніс кӱнінең алғыстап, Хакасия пазы Валентин Коновалов таныхтаан:
- Пістің пастағы істенӌілер - аал хонииндағылар. Пӱӱн маңнаныстығ тоғызыңар, аал хонииндағы чидіглерің ӱчӱн сірерні таныхтирға чыылыстыбыс. Пістің республикада пӱӱл таарығ чахсы ирт парзын тіп алғапчам, хоныхтарда мал санын ӧскірерге паза хыраларда чахсы урожай аларына прай оңдайлар пар ползын. Пик хазыхтығ полыңар, полызызып чуртаңар, сағынған сағызыңар толзын.
Хакасия пазының алғыстас пічиине турысханнар «Бейское» ООО-дағы малҷы Андрей Гуз, фермер Фёдор Кидиеков, Пуланнығдағы ветеринар участогының устағҷызы Гелена Сагалакова.
Сарығ хас аалдағы ветеринар участогының устағҷызы Матрёна Топоева, Индіркі Сирдегі ветеринар Людмила Камалова паза аннаң даа пасхазы. Чоохтирға кирек, сыйыхтаттырған кізілернін алтызы - мал имҷілері.
Ідӧк аал хонии істенҷілерін алғыстаан республика пазының орынҷызы Ирина Войнова.
Хайди ол санапча, аал хонии тоғызынаң айғасчатханы амыр чуртаста махачы кирек полча, ол сынап аар тоғыс. Аннаңар андар чииттер істенерге килбинчелер. Алынҷа мал имҷілерінің тоғызын таныхтаан. Аал хонииндағыларға, тіспен тоғынчатхан ӱчӱн алғыс пиріп, прай ниме чахсы ползын тіп алғаан.
Хакасияның аал хонии министрі Сергей Труфанов, чоохха хозылып, республика правительствозына аал хониина хайығ айландырчатхан ӱчӱн алғызын читірген. Аалда турыстығ чуртас поларына кӧстег иділче. Ол ідӧк аалдағы тоғыс аар тоғыс тіп санапча. Аалдағы улус анда, хол тӱзірбин, иртеннең орайға теере істенче. Андағ тіспен тоғынҷыларның алнында пазым тӧбін тӱзірчем, теен ол.
Пу тоғазығның халғанҷызынзар Валентин Коновалов правительство аал хонии отрасльына алынҷа хайығ саларға кӱстенче тіп таныхтаан.
Кӱс улуғ даа полбаза, че регион бюджедінде аал хониина хабазарына ахча кӧріл парча.
Сыйыхха турысханнарның санында - Фёдор Кидиеков. Ол Ағбан пилтірі аймаандағы Трайлар аалында фермер полча. Фёдор Александрович алында Ағбанда «Светоч» типографияда печатник полып тоғынтыр. Городтаң тӧреен-ӧскен аалынзар айланып, 2012 чылдаң, фермер полыбызып, аал хониинаң айғас сыххан. Че пу тоғысты ол пос хониинаң пастаан. Іҷе-пабазы аалда пос хониин тудып чуртааннар, Фёдор Александрович
Пу кӱнде аның кресен-фермер хониинда мал саны 100 -ке чағын, хой саны - 400 -че пас. Мал саны илееде полыбысханда, оларның соонҷа кӧрҷең тоғысчылар киректел сыхханнар. Фермада ӱс тоғыс орны тӧстелгенде, ӱс кізіні тоғысха алып алғаннар. Фермернің чооғынаң, олар ідӧк садыға капуста, морковь, яблах ӧскірчелер, анаң чир тамаан садыға сығарчалар. Хыра тоғыстары пасталза, фермада тоғысха ӱр нимес тусха хоза 10 - 20 кізі чаллапчалар.
Фёдор Александровичке аал хонии тоғызынаң айғазарында улуғ полысчы, ізестіг чӧлег полча хада хонғаны Екатерина Витальевна Кидиекова. Олар фермаларында мал санын мыннаң мындар ӧскірерге пӧгінчелер. Кӱс хай син читкенҷе, аннаң андар тоғынарға.
- Хакасия правительствозы чидіглерібіс ӱчӱн пісті таныхтапчатханына ӧрінчем. Піске, аал хонииндағыларға, ахча кӧп арах пиріп, хабасхан ползалар, улам чахсы поларчых. Кӧзідімге, мал санын ӧскірчеткен ӱчӱн субсидиялар пирілген полза, - сағыс-кӧрізінең ӱлескен КФХ пазы.
Ол, салымнығ тоғынып, аал хонии тилізіне хозым идіп, 2018 чылда «Чыл кізізі» атха турысхан. Пӧзік чидіглерге чидіп, аал хониинда істенчеткен иң чахсы улустың санында іди сыйыхтатхан.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде