ЧИТІ ООЛ, ЧИТІ ХЫС
14.05.2021
Хабарлар
Сӧбіре - чуртас ӧзені. Арбыт аалда 14 палалығ Тюкпиековтар сӧбірезі чуртапчаттыр. Андағ ӧткін іӌе-пабанаң танызып аларға чапсых
- Прайзы сірерни бе? - ӱрӱкчем.
- Я, - нандырчалар Надежданаң Андрей.
Піс чоохтазып пастаанда, нинҷе-де кӧк харахтығ хызыҷах диванда одырчатхан. Минзер кӧместең пахластырып, пастап сым на одырғаннар, анаң пос киреенең айғас сыхханнар. Оолағастар ол туста тасхар ойнапчатханнар.
Тюкпиеков ирепчі пӱӱл 9-ҷы чылы хадалар. Надежданың хыс фамилиязы - Дорохова, позы ол Таштып аалдаң. 12 чыл мының алнында ол ирі ӱреен соонаң пис палалығ ӧкіс халған. Таштыптағы «Нива» ООО-да ас-тамах тимнеҷең ус полып тоғынчатханда, Надежда Андрейнең танызып алған. Андрей Борисович тракторист полған. Ол ас-тамах тимнеңең чиит усха ӧкерсінҷең. Ол туста аның позының 6 палазы Ис пилтірі аалда іҷезінде ӧсчеткен. Ипчізінең чарылызып, ӱс чыл Таштыпта алынҷа чуртапчатхан.
Андрей палаларын, іҷезінен ағылып, наа сӧбірее кирген.
- Туғаннарың, таныстарың андағ хабарға хайхаан поларлар?
- Андағ кирек полғанох, - тіпче Надежда, - минің іҷем пастап тоғыр полған.
- Чон аразында кӧп палалығ сӧбірені аарлапчалар ба?
- Таштыпта чуртапчатханда, пірее кізілер ікінҷілеснең кӧрчеткеннер: «Хайдар андағ кӧп пала табарға?» Че оларның ноо киректері халтыр, піди сағынып алза? Арбытсар кӧзіп алғанда, мында кізілер олаңай хылыхтығ полчатханы сизіністіг. Кирек полза, хабас пирчелер, хомай ниме олардаң испинчебіс.
Арбыт аалзар Тюкпиековтар 2017 чылда кӧс килгеннер. Анда олар 100 азыра квадрат метрліг чурт садызып алғаннар. Ибіркі чир истіг, орын пойли. Паза ниме кирек? Ол син чонны азырирға пос малының сӱді, хус иді паза ӱӱҷік полысчалар. Пӱдӱрчӱн, ӧртек, хас, таңах, индейка пипеҷектерін инкубатор полызиинаң чарылдырып алчалар, оларнаң айғазарға кӧп тус парыбысча.
- Пастап ла хус ӧскіреріне илееде ахча парыбысча, че анаң тузазы чахсы кӧрінче. Пӱӱл хысхы тооза хус идін чеебіс, пір ле хати сосха идін аларға киліскен, - ӱлесче Андрей Борисович.
Я, мындағ сидік туста улуғ сӧбірее мал-хус ӧскіргені артых полбас, садығ туразында ас-тамах паазы сыбыра ӧсче.
Че тус парча, олғаннар ӧзібӧкчелер. Ікі хыс уйадаң учух парыбысхан, тиирге чарир. 21 частығ Ангелина Абазада тоғынча, 19 частығ Кристина ӱр ниместе Москвазар нанҷыларынаң хада тоғыс тілирге парыбысхан. 15 частығ Павел Боград аалда ӱгредіг алча. Пасхазы - Евгений, Дарья, Владимир, Людмила, Егор, Дмитрий, Марья, Настя, Виолетта школада ӱгренчелер. Аймир-Арсений паза Тимир-Трофим олған садына чӧрчелер.
- Ноға андағ пасхаҷыл хадыл аттар пир салғазар?
- Артист Филипп Киркоров іди адапча нооза, піс аннаң халбинчабыс, - кӱлімзірепче іҷе-паба.
Че мин ноға-да сағынчам, пу оолахтар ікі культураны, ікі чонны - хакас паза орыс -аттарында ал чӧрчелер. Андағ ӱлӱс оларға тӱс парды - улуғ, ынағ сӧбіреде тӧрирге. Чиит улус кічігдең сығара істенерге кӧӧктірілче. Аалда иб аразында тоғыс хаҷан даа табылча.
Кічіглері олған садына чӧріп пастаанда, Надежда школазар тоғынарға кіріп алған, чал ахчазы артых полбас. Ирінең хада олар палаларына чахсы кӧзідім полчалар -іскее тартылбинчалар, тамкы тартпинчалар, кирек чох одырарға хынминчалар. Махачы, ынағ ирепчі прай чуртазын пала ӧскіреріне пирче, анзы уғаа аарластығ.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде