ААЛ-ГОРОДЫҢ ӰЧӰН ӰНІҢ ПИР
14.05.2021
Хабарлар
Чыылығ. Хакасия правительствозында «Городта истіг оңдайлар тӧстирі» федеральнай программаӌа объекттер таллирынӌа онлайн-ӱн пиріске чарыдылған чыылығ ирткен
Хакасияның 16 муниципалитеді «Городта истіг оңдайлар тӧстирі» федеральнай программада араласча. Ол орыннарда 54 объект иптирі кӧрілче. Амғы туста 2022 чылда кӧп чон чӧрчеткен хайдағ объекттер иптиріне чарыдылған он-лайн-ӱн пиріс иртче. Республиканың 14 час ас парған полған на чуртағӌызы 19.gorodsreda.ru сайт-та алай «Хазна полызығлары» порталның личнай кабинедінде ӱн пирібізер оңдайлығ.
Пу кӱннерде ӱн пиріс хайди парчатханына чарыдылған чыылығ ирткен. Онлайн-ӱн пиріс иртіреріне Россияның архитектура, пӱдіріг паза ЖКХ министерствозы ӧнетін платформа тӧстеен. 26 апрельдең 30 майға теере хазнаның прай чуртағӌылары, ол платформазар кіріп, ӱннерін пирчелер.
Хакасия пазының аппарады устағӌызының орынӌызы Ирина Емельянованың чооғынаң, ӱн пиріс пасталғанда, платформа тоғынминчатханнаңар, ӱн пирерінде сидіксіністер полған. Амғы туста, 19.gorodsreda.ru сайт чахсы тоғынчатса даа, чуртағӌылар ӱн пирісте уйан араласчалар. Ол ирт парғанға саналар ӱчӱн, 14 час ас парған чуртағӌыларның 10 % (50 муң кізі) анда аралазарға кирек. 7 майға Хакасияның 5 муң азыра чуртағӌызы ӱнін пирібіскен. Оларның кӧбізі Ағбаннаң паза Харатастаң (3056 кізі), Асхыс аймаандағылар табығда иң уйан араласчалар.
Хакасияның пӱдіріг паза ЖКХ министрі Валерий Келиннің чооғынаң, муниципалитет пастарын чыып, чонны ӱн пирісте аралазарына тартар оңдайлар табарынӌа чыылығ полар. Ідӧк волонтёрларға пу тоғыста ӧткін аралазарға кирек тіп таныхтаан министр.
«Чииттернің стратегия пастағларының паза проекттерінің кіні» фондтың директоры Оксана Трусованың чооғынаң, муниципальнай пӱдістерде волонтёрларға 52 орын тӧстелген. Прай город-аймахтарның кӧп полызығ пирӌең кіннерінде (МФЦ-ларда) волонтёрлар кізілерге ӱн пирісте хайди аралазарға кӧзітчелер. Оларның полызиинаң 2244 кізі ӱнін пирібіскен.
- Амғы туста волонтёрлар кӧп чон чӧрчеткен орыннарда тоғынчалар. 14 частығдаң ӱн пирісте аралазарға чарир. Аннаңар тиксі паза профессиональнай ӱгредіг учреждениелерінзер кірерге кирек, - теен Ирина Емельянова.
Хакасия пазы Валентин Коноваловтың таниинаң, социальнай сфераны тартарға кирек.
- Пістің социальнай сферада кӧп тоғынӌы. Оларны ӱн пиріске, пропагандаа тартарға паза муниципалитеттерге хабас пирерге. Ӱгредіг учреждениелері тоғынӌыларынаң ідӧк палғалызарға кирек, - теен Валентин Олегович.
Олған садтарында, школаларда іӌе-пабаларның чаттары пар. Оларның полызиинаң ідӧк сайтсар кіріп алар ссылкалар ызарға чарир тіп чоох парған.
Амғы туста ӱн пирісте араласчатхан пу объекттер иң кӧп ӱн чыып алғаннар: Ағбанда С.П.Кадышевтің адынаң культура кіні алнындағы сквер паза Чиңіс паркы; Пригорсктағы Наа чыл площадьы; Харатастағы «Мир» кинотеатр хыриндағы сквер; Сорығдағы Октябрьға 50 чыл орамадағы аллея; Ағбан пилтірі посёлоктағы тынанӌаң олтырых.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде