САБЛЫҒ АДАЛЫҒ ООЛДАҢАР КИНДЕ
02.06.2021
Хабарлар
Презентация. Пӱӱл, Хакас Республика тӧстелгеннең пеер 30 чыл толчатхан паза хакас чонның 14-ӌі съездi ирткен чылда, «След метеора» книга чарыхха сых парған
Хакас чирінде саблығ адалығ оол Михаил Григорьевичнең Владислав Михайлович Торосовтардаңар повестьтің авторы писатель Олег Шулбаев полча. Пу кічіг нимес тоғыс архив пічіктеріне тӧстеніп чайалған.
Хаҷан-да Владислав Торосов Олег Шулбаевтең пабазы Михаил Григорьевичтеңер книга пас саларға сурынтыр. Ачырғасха, ол ам на сығарыл парды, автор даа, сурынған кізі дее ах чарыхтаң парыбысханнарында. «След метеора» повесть Владислав Михайлович Торосовтың паза Олег Петрович Шулбаевтің сӧбірелері хабазиинаң тимге сых парды.
- Торосовтардаңар газета-журналларда асхынах нимес пасханнар, телевидение пастыра ідӧк кӧп кӧзіділген. Че саблығ чир-суғӌыларыбыстаңар паза пір книга сых парғаны пір дее артых полбас тіп сағынчабыс. Чоныбыс матырларын хайди даа пілерге киректер нооза, - тееннер олар презентация тузында.
Пу книгада Хакас автоном облазының депутаттар чӧбінің толдырығлығ комитедінің кнезі Михаил Григорьевич Торосовтың чуртазынаңар паза аның чон хонии тилізіне улуғ хозым иткенінеңер хоости пазылча. Ідӧк ол хакас алфавидін, пічиин тӧстирінде ӧткін араласхан. Паза пӧзік пілістіг кізі кічіг чир-суундағы чон ӱгредиине, хазых хайраллирына улуғ хайығ салған. Че Михаил Торосовха ӱр чуртирға киліспеен. Ағаа хырых таа час чох полған, репрессияа хаптырып, атырт салған.
«След метеора» хоос-публицистика повезінде ідӧк аның оолғы Владислав Торосовтаңар толдыразынаң чарыдылча - аның чуртазынаңар, чоны ӱчӱн сағыссыразынаңар...
Владислав Михайлович Торосов Ағбан город комитедінің пастағы хачызы, анан кнезі полған. Анаң 1986 - 1991 чылларда Хакас автоном облазының толдырығлығ комитеді кнезінің пастағы орынҷызына турғызылған. Соонаң, тізең, Хакас ССР-ның чон депутаттары чӧбінің толдырығлығ комитедінің кнезі полыбысхан. Владислав Торосов Хакас Республиканың министрлер чӧбі кнезінің пастағы орынҷызы полғанох. Паза ол кӧп чыл хакас чонның Улуғлар чӧбінің кнезі полған. Ідӧк аны прайзы ученай, писатель чіли таныпча.
Наа книганың презентациязына Владислав Торосовты, Олег Шулбаевті пілген, оларнаң чағын нанҷыласхан кізілер килгеннер: Хакасиянын Ӧӧркі Чӧп депутады Вячеслав Тутатчиков, ӱгредіг паза наука министрінің орынҷызы Юрий Сагалаков, национальнай паза территориальнай политика министрінің орынңызы Юрий Чертыков, Хакасиядағы чайаа-чылар туразының устағңызы Надежда Бурнакова, Писательлер пірігізінің кнезі Альбина Курбижекова паза даа пасхазы. Оларның полғаны ла «След метеора» книганың матырларынаңар паза авторынаңар чылығ ӱндескеннер.
- Архив материалларына тӧстеніп, полған на писатель хоос произведение чайап полбинча. Олег Петрович, тізең, чарыхха сыххан книгаларын прайзын іди пасхан. Оларны хығырчатсаң, официальнай пічіктер хоостыра пазылған тіп пір дее сағынмассың. Аның тілі уғаа иптіг, сіліг. Произведениелерін читіре хығырбаанда, тохтап полбинчазың. Аның писательлер киреендегі пӧзік узы тың хайхатча. Улуғ алғыс аның палаларына, пабазының сағынған сағызын толдырыбысхан ӱчӱн. Торосовтарның сӧбірезіне ідӧк чылығ ла сӧстер читірчем, - ӱлескен сағызынаң Хакасиядағы писательлер пірігізінің кнезі Альбина Курбижекова.
Книганың авторы адынаң нандырығлығ сӧсті писатель Олег Шулбаевтің оолғы Андрей алған. Ол ідӧк книганы тимнирінде ӧткін араласхан позының паза Торосовтарның туғаннарына улуғ алғызын читірген.
«След метеора» книга орыс тілінең сыххан. Презентация тузында аны хакас тілінең сығарыбызарға чӧп кірген. Шулбаевтер ол чахығны толдырыбызарға молҷағ пиргеннер.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде