Хакасия делегациязы - Петербургтағы экономика форумында
02.06.2021
Хабарлар
Пӱӱн, 2 июньда, Петербургтағы чоннар аразындағы экономика форумы тоғызын пастапча. Ол неделя тоозылғанӌа иртер. Форум тоғызында Хакасия делегациязының устаанда Валентин Коновалов араласча. Аннаңар Хакасияның экономика тилізі министерствозының социальнай сетьтердегі официальнай страницаларында искірілче.
Хакасия инвестиция проекттерінің макеттерін тимнеп салған. Форум тузында оларны “Улуғ Сибирь” площадкада паза алынӌа тоғазығларда ӱзӱрерлер.
Форумда ідöк хай пірее пічікте хол салары кöрілче. Оларның пірсі - “Сибирьдегі чöптезіг” регионнар аразындағы ассоциация араласчыларының “Сибирь істіндегі паза килчеткеннерге туризмні тилідері” МАСС-тың тиксі инвестиция проектін чуртасха кирерінӌе хада тоғынардаңар чöптезіг.
Паза пір чöптезіг туризмні тилідерінöк теелче. Аны Хакасия правительствозы “Эра Групп” АО-наң хада идер. Чöптезігнің пöгіні кöстегні тилідерге паза регионзар туристтерні тартарға чахсы оңдайлар тöстирі полча.
Аннаң пасха, республика правительствозы Россия МИД МГИМО-зынаң хада-пірге тоғынардаңар чöптезігде хол саларға пöгінче. Ол науканы тилідеріне паза пöзік квалификациялығ специалисттерні тимниріне кöстелген.
Регион правительствозы экологияны чахсыландырарынӌа тöреміл апарчатхан тоғызы хоостыра “Арығ кии” федеральнай проектті чуртасха кирерінӌе Росприроднадзорның паза МАСС-ха кірчеткен Сибирь регион пастарының аразындағы хада-пірге тоғынардаңар меморандумда хол салылар. Пу пічікте хол салғаны Хакасияның город-аалларын киині чахсыландырарынӌа проектке кирерге, ол тоғысты иптирге, кӱстеністі орта тоғындырарға полызар.
Автор :
Тимнеен Наталья Субракова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде