Форумда 15 инвестиция проектi кӧзiдiлер
03.06.2021
Хабарлар
Хакасия Петербургтағы чоннар аразындағы экономика форумының (ПМЭФ-2021) «Улуғ Сибирь» площадканың ӧӧн орыны полыбысты. Киҷее, 3 июньда, «Сибирьдегi чӧптезiг» регионнар аразындағы ассоциацияның регионнарының пiрге кӧзiдии пайрамни азылған. Пiрге площадканы пайрамни азарында Хакасияның артисттерi араласханнар. Алтай паза Хакасия республикаларның саблығ артизi Артур Марлужоков «Моя Родина – Сибирь» сарынны толдырған. Чатхан кӧӧ толдырылчатхан туста аалҷыларға пис кӱс кӧзiдiлген: Чир, Кии, Тас, От паза Суғ.
Хакасия правительствозы пiрге кӧзiдiге позының инвестиция проекттерiн сығарған. Полған на проекттiң паазы 100 миллион салковайны асча. Форум тузында оларны «Улуғ Сибирь» площадкада паза алынҷа тоғазығларда ӱзӱрерлер.
Хайығ экономиканың ӧӧн кӧстеглерiне айландырылған: металлургияа, аал хониина, пӱдiрiг материалларын сығарарына, ниик промышленностьха паза туризмге.
Пос чирiнде пӱдiрiг материалларын сығарып, Хакасия аны республика кирексiнiстерiне читiрiп алар. Пу наада ла кiрпис сығарчатхан завод тоғызын пастаан. Амды цементке кирексiнiс пар. Аны сығарарына регионда прай оңдайлар пар, инвесторны ла таап аларға халған. Форумда цемент сығарызынҷа заводты тӧстеҷең инвестиция проектi кӧзiдiге сығарылған. Аның паазы – 12,8 миллиард салковай.
Чахсы тилир оңдайлығ паза пiр кӧстег ниик промышленность полча. Орындағы компаниялар ниик промышленностьта наа проекттер чуртасха кирерiнҷе республика правительствозынаң хада ӧткiн палғалысчалар, че инвестициялар киректелче. Петербургтағы экономика форумында Саяногорскта амғы тусха килiстiре кип-азах тiкчең сығарыс тӧстирiнҷе проект сығарылған, ол 200 миллионҷа салковай инвестиция киректепче.
Инвестиция идерге сағынчатханнарға туризм кӧстее алғым кӧзiдiлче. Хакасияда регион туризмiн тилiтчең оңдайлар Таштып, Шира, Асхыс, Пии паза Орджоникидзе аймахтарында пар. Полғанының на позының чахсы сарилары паза тилiс оңдайлары, кӧзiдiмге, чыл ибiре тоғынчатхан туризмнi, саналығ чыларынҷа чолларны, тарнспорт оңдайларын алғыдарын паза пасха кӧстеглернi аларға чарир. Инвестицияларның тиксi синi 25 миллиард салковайға читче.
Хакасияның экономика тилiзi министрi Виктор Богушевичтiң искiриинең, республика, ағаа наа предприятиелер азылары, тоғыс орыннары тӧстелерi хынығдаңар, инвесторларға чахсы оңдайлар сӧлепче. Налог тӧлирiне, чир участоктарының арендазын тӧлирiне льготалар паза льготалығ лизингнең ӧдiске пирiлчеткен ахча иң пӧзiк кирексiнiснең тузаланча.
Автор :
Тимнеен Наталья Субракова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде