НИМЕ-НОО СЫҒАРЫЗЫ ӦСЧЕ
04.06.2021
Хабарлар
Чоохтазығ. Хакасия пазы Валентин Коновалов, Петербургтағы чоннар аразындағы экономика форумында аралазып, федеральнай СМИ-ларға интервью пирген, ол санда «Комсомольская правдаа». Чоох ӧӧнінде республиканың экономиказын тилідердеңер парған
- Хакас Республиканың экономика тилізінің ӧӧн пӧгіні пір отрасльнаң палғалысты синдірерінҷе паза чир-чайаан ис-пайынаң палғалыстығ нимес кӧстеглерні тилідерінҷе тоғынары полча. Ниме-нооны тимнепчеткен сығарысты, аал хониин паза туризмні тилідеріне алынҷа хайығ айландырылча.
2020 чылда Хакасия промышленность сығарызынҷа Сибирьде ікінҷі орынға сыххан. Ӧзіс 103,1 % тиңнелген. Сығарыс ӧзізін кӧзіткеннер: химия веществоларының паза ниме-нооның сығарызы (132,9 %), электрика тирии (173,0 %) паза ас-тамах промышленнозы (106,4 %). Ниик промышленностьты нааҷылирынҷа пастағы хаалағлар иділген: пӱӱнгі кӱнде ол кӧстегҷе 95 предприятие істенче.
«Ағбанвагонмаш» машина пӱдірҷең заводта килкім локоматив тыхтаҷаң предприятие тӧстирі кӧрілче. Инвестор проект тоғыстарын толдырча.
2020 чыл сидіксіністіг полған даа полза, правительстваа туризмні чапчаң тилідіп аларға киліскен. Тиліп полар алты турист орны, ӧӧн ӧзіс орны, таныхталған, хайда туристтернің тӧреміл чӧрчеткені паза оларның хайиин тартчатхан ниме-ноо амох тӧстелче. «Сибирь. ПРИтяжение» чоннар аразындағы пастағы турист форумында Хакасия правительствозы паза инвесторлар 4 миллиард азыра салковайға туризм кӧстеенде проекттерні чуртасха кирерінҷе хада-пірге тоғынардаңар чӧптезіглерде хол салғаннар.
Ирткен чылда аал хониина пирілчеткен ахча ікі хати ӧскірілген паза 1,6 миллиард салковайға читірілген. Льготалығ кредитнең тузаланып, аал хонии ас-тамаан сығарчатханнар 293 миллион салковай алғаннар. Олар 179 техника паза оборудование садызып алғаннар. Ӧзімнер ӧскірері, сӱт паза ит пирчеткен мал, хой тудары - пу кӧстеглерҷе Хакас Республиканың алнынзар сыхчаң оңдайы пар. Кибірли мал ӧскіреріне хабазығны узаратчабыс. Ирткен чылда 256 миллион салковайға 13 аймах субсидия тӧлелген. Мал тӧлін паза сығарысты чахсыландырарынҷа хорадығларның 98 % айландырылған.
Тӧлліг хойны ӧскіреріне Хакасия правительствозы ідӧк субсидия кӧр салған - арған оңдайнаң тӧллендірген сылтаанда тӧреен полған на хураған ӱчӱн 500-ер салковай. Аннаң пасха, 2020 чылда Хакасияның аал хонии паза ас-тамах министерствозы субсидия тӧлеен - соғылған малның полған на килограммы ӱчӱн 25-ер салковайдаң. Пӱӱл пу хабазығ федеральнай бюджеттең пирілче.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде