ЧАЛ АХЧАЗЫНА ТЕЕЛБЕС
04.06.2021
Хабарлар
Ахча сурии. Бюджетниктернің чал ахчазы хызырылбас - ізендірчелер республиканың толдырығлығ паза закон сығарҷаң ӱлгӱлерінің кізілері. Чоох-чаахтар финанстар министерствозы Ӧӧркі Чӧпсер пу чылның бюджет хорадығларын хызырардаңар закон проектін кирген соонаң пар сыххан
Хакасияның финанстар министерствозы пӱӱлгі бюджетсер алызығлар тимнеп салған. Аны ол пос хынғанни итпинче. Хорадығларны хызырарын прокуратура хысча. Хакасияның Ӧӧркі чарғызы ағаа хабасхан паза бюджет законға килістіре нимес тіп чарадығ алған, аның дефициді тың улуғ полғаны сылтаанда. Дефициттің иң улуғ сині 15 % поларға кирек, пістің регионда ол 19 %. Хазна алымы даа нормадаң кӧп - парыстардаң 4,6 миллиард салковайға. Че анзын Ӧӧркі Чӧп кирексеен, декабрьдағы сессияда.
Хакасия пазының орынҷызы Ирина ВОЙНОВА:
- 12 айға бюджетті піс мындағ ла кӧрімніг ал полғабыс. Прай кирек хорадығларны кӧріп - чал ахчазын, социальнай пособиелерні тӧлирін, учреждениелерге ахча позыдарын, имнерге, ас-тамахха.
Амғы туста Хакасияның Ӧӧркі чарғызының чарадии апелляцияа пирілген. Че специалисттер ол чарадығ алыспас тіп санапчалар. Аннаңар ахчанаң палғалыстығ ӧӧн пічікті законға килістіре ит салар ӱчӱн, республика правительствозы хорадығларны хызырарға чӧп кирче. Ол санда бюджет учреждениелерінің чал ахчазын. Чал ахчазының паза пособиелернің сині хызырылбас. Че ахча лимиді пір октябрьға теере ле кӧріл парар.
- Анда чал ахчазын хызырардаңар чоох парбинча. - чарытча Ирина Войнова - Кӧзідімге, ӱгретчі 30 муң салковай алған, амды 15 муң салковай ла алар. Чох. Аннаңар чоох парбинча. Анда пістің бюджет 9 айға полардаңар чоох парча. Ол ниме пасха оңдай чохтаңар иділче. Сынынаң чоохтаза, закон пазағы инстанциядаң тоғынминчатханға санал сығарға айабас. Ол тустаң сығара, тізең, піс пір салковай даа хорат полбаспыс, ол закон хыйыстыра полар нооза. Чарыда чоохтаза, прай ниме тохтап парар. Піс чал ахчазына даа, нацпроекттерге дее ахча позыт полбаспыс.
Аннаңар чалғыс чарадығ - бюджетті 9 айға ла алары. Ол кӧріснең Ӧӧркі Чӧп депутаттары даа чарасчалар.
Ӧӧркі Чӧп депутады Галина КОЖЕВНИКОВА:
- Ол ниме иң пастап апелляция инстанциязы соонаң сығыс килерге айабас хомай салтарларны тохтадыбызарға оңдай пирер. Паза анзы республикаа мыннаң мындар тоғынарға полызар.
Ӧӧркі Чӧп депутады Максим АВЕРЬЯНОВ:
- Аны 9 айға алыбызарға кирек. Аннаң андар бюджетке хоза ахча табарынӌа федеральнай кіннең, улуғ бизнеснең тоғынарға. Полызығ киректелчеткенін піс пір ле хати таныхтабаабыс. Республика 10 чыл артиинаң алымнарын ӧскір турған. Пу кирек - мының алында полған нименің салтары.
Хакасияның финанстар министерствозының кізілері амғы туста Москвада регионға бюджет дефицидін чабарына хоза дотациялар пирерінҷе чӧптезіглер апарчалар.
Ӧӧркі Чӧп депутады Григорий НАЗАРЕНКО:
- Чуртағӌыларға, бюджетниктерге мында хорыхчаң ниме чоғыл. Ол ӱрӱгісті сығарчалар алай ырах сағынминчатхан кізілер, алай ӧнетін іди итчеткен кізілер. Бюджетниктернің чал ахчазын пірдеезі хызырбас. Ол законнаң арачылалған хорадығ статьялары.
Амды правительство прай кӱзін салча ол дефициттің аразын чох идібізер ӱчӱн. Пос парыстарын ӧскірче. Чарыда чоохтаза, мында хорыхчаң ниме чоғыл.
Ӧӧркі Чӧп депутады Валерий СТАРОСТИН:
- Правительство пастағызын на, неке, сын бюджет кӧзіт пирді, хайзы Хакасияа кирек. Хайхастығ, Россияның 20-ӌе субъектінде ол дефицит чарадылған синінең улуғ, піреезінің нинӌе-нинӌе хати, че прокуратура пір дее хайбаан. Аннаңар пу таңнастығ кирек, хайзын тӧстеебіс... ол санда піс, депутаттар, аның ӱчӱн ӱн пиргебіс нооза. Ол туза полар піске ле нимес, че пасха даа субъекттерге паза Россия правительствозына.
Ӧӧркі Чӧп 9 июньдағы сессиязында бюджет хорадығларын хызырардаңар закон проектін ӱзӱрер. Апелляция инстанциязы Хакасиянын Ӧӧркі чарғызының чарадиин чох идібіссе, тізең, бюджетсер алызығлар кирерге кирек чох полар.
Автор :
Ольга БОРЛОВСКАЯ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде