РЕСПУБЛИКАНЫҢ 30 ЧЫЛЫНА ЧАРЫДЫЛЧА
04.06.2021
Хабарлар
Пресс-конференция. Хабарҷыларны Опера искусствозының театр фестивальының программазынаң таныстырғаннар
Пресс-конференцияда Хакасияның культура министрі Светлана Окольникова, филармонияның директоры Вячеслав Инкижеков паза РУСАЛ компанияның Хакасиядағы представительствозының устағӌызы Леонид Быков араласханнар. Хайди таныхтаан Светлана Окольникова, пӱӱлгі чайғы культура мероприятиелеріне пай полар. 25-26 июньда Тун пайрам иртер, республика чуртағӌыларының иң хынчатхан пайрамына тимненіс хыызында парча. 2 июльда Хакасия «Чир Чайаан» кӧклӧ театрларының чоннар аразындағы фестивальын удурлир. Пу кӱннерде, тізең, Опера искусствозының театр фестивальының пастағы концерттері иртче.
Улуғ проектті Хакасияның театр искусствозы тилізі фондынаң республика филармониязы Россияның паза Хакасияның культура министерстволары хабазиинаң чуртасха кирче. Светлана Анатольевна чоохтаан:
- Хакас чирінде Опера искусствозының театр фестивальы пастағызын на иртче. Ол республиканың 30 чылына чарыдылған. Фестиваль опера чылтыстарының концерттерінең сыххан тиирге чарир, хайзылары Пастағы май площадьында 2011 - 2018 чылларда Республика кӱнінде иртчеңнер. Аның хоос устағӌызы Россияның саблығ артизі, Мариинскай театрның солизі Татьяна Павловская полча. Татьяна Геннадьевна - Хакасияның улуғ арғызы. Саблыт ус пістің республикада опера искусствозын тилідерге кӱстенче. 2019 чылда ол, Санкт-Петербургтаң специалисттерні ағылып, ХГУ-ның искусство институдында студенттерге мастер-класстар иртірген. Пылтыр аның устаанынаң филармонияда «А зори здесь тихие» опера турғызылған. Чӱрексіністіг ойынны чайаачы ӧме кӧрігҷілернiң сурынызынаң 22 июньда кӧзідер. Оңдай полза, киліңер, прайзын хығырчабыс.
Фестивальзар айланза, аны иртірерінде РУСАЛ компания ӧткін араласча. Тӧреміл хабасчатхан ӱчӱн Олег Владимирович Дерипаскаа, компанияның устағ-пастаана улуғ алғызым читірчем.
Музыка пайрамының программазынаң дирижер Вячеслав Инкижеков таныстырған. Чир-суғӌыбыстың таниинаң, фестиваль 1 июньнаң 3 июльға теере иртер. Проект ікі чардыхтаң пӱткен. 3 - 24 июньда Хакас филармониязының артисттері, республикаӌа чорыхтарға сығып, опера ӱзіктерін толдырарлар. Программа хоостыра 12 концерт кӧріл парған. Олар республиканың прай го-родтарында паза аймахтарында иртерлер. 3 июньда артисттерні Харатас удурлаан, 8 июньда концерт Ағбан пилтірі поселокта иртер, 9 июньда - Асхыс-та паза Асхыс поселокта, 10 июньда -Пииде паза Боградта, 11 июньда - Аба-
зада, 12 июньда - Таштыпта, 14 июньда
- Саяногорскта, 15 июньда - Тойымда, 23 июньда - Хубачарда паза Киров аал-да, 24 июньда - Сорығда паза Копьёв аалда. Кӧрігӌілерні чайаачызынаң ікі ӧме ӧріндірер. Пастағызынаң Россияның саблығ артизі Зинаида Аршанова устапча. Аннаң хада сценаа Татьяна Шепелева (виолончель), Марина Доринанаң Елена Новосёлова (флейта) сығарлар. Зинаида Семёновна саблығ арияларны толдырар. Ідӧк программада композиторлар А.Кенельнің, Г.Челбораковтың, О.Алахтаеваның чайаачы тоғыстары полар. Ікінӌі ӧмезер Хакасияның чон артизі Мария Янгулова, Хакасияның саблығ артизі Даниил Тарасов, чиит ырӌылар Ольга Акулованаң Константин Сеслер кірчелер. Олар аймах ырлар сарнирлар.
Пастағы май площадьында ікі концерт иртер. 1 июльда 19.00 часта «Ӱлгер» паза «Кӱн сузы» ансамбльлар «Кӧчег» ойынны кӧзідерлер. Сарыннардаң паза теелбектердең пӱткен спектакльға прайзын тикке кирерлер. 3 июльда, тізең, опера фестивальының гала-концерт полар. Анда Россияның чон артизі, саблығ бас Владимир Маторин, Мариинскай театрның солисттері Татьяна Павловскаянаң Ахмед Агади аралазарлар. Ідӧк пӱӱл улуғ пайрамда чиит устар Светлана Лачина, Александра Черпакова паза Александр Шахов сарнирлар. Светлана Ағбаннаң, кӧп чыл «Каданс» хорзар чӧрген, пӱӱнгі кӱнде ол Большой театрда істенче. Хакас хыс Александра Черпакова - Хызылчардағы опера паза балет театрының солизі.
Светлана Окольникованың чооғынаң, пӧгіннер кӧп, че пандемия оларны сайбабызарға айабас. Коронавируснаң ағырчатханнарның саны тың ӧс сыхса, Роспотребнадзор пайрамнарны иртірерге чаратпас. Культура министрі, СМИ-лар пастыра чонзар айланып, теен:
- Аарлығ чир-суғҷыларыбыс, маска кис чӧрӌең режимде хайди даа тудыныңар паза коронавирустаң тоғыр вакцина турғыстырыңар. Культура учреждениелерінзер ойыннарға паза концерттерте килзеңер, маскаларны суурбин одырыңар. Мероприятиелер иртірері кӧрітӌілернің орта тудынғанынаң сылтағлығ полар.
Пресс-конференция тузында Леонид Быков РУСАЛ-ның адынаң чоох тутхан. Хайди таныхтаан Леонид Михайлович, компания улуғ проекттерні чуртасха кирерге хаӌан даа тимде. Пӱӱл фестивальны иртірерге ахча РУСАЛ-ның паза Хакасия правительствозының аразында иділген чӧптезіг хоостыра пирілді.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде