ОРДЖОНИКИДЗЕ АЙМААНДА - ХАКАС РОДТАРЫНЫҢ АҒАСТАР АЛЛЕЯЗЫ
04.06.2021
Хабарлар
Родтар чӧрімі. Ирткен неделяда Орджоникидзе аймааңдағы «Сӱлек пічіктері» музей-заповедникте хакас родтарының хузух ағастары аллеязы тӧстелген
Орджоникидзе аймаанда чуртапчатхан хакас родтарының аллеязын тӧстирдеңер сурығ пір ле хати кӧдірілбеен. Пётр Гаврилович Танбаев, аймахта улуғлар чӧбінің кнезі полчатханда, аллеяны тӧстир ӱчӱн, ағастар одыртар сурығны ӱзӱріге сығарғанох. Амды «Сӱлек пічіктері» музей-заповедник чирінде хузух ағазы хорбылары одыртылды.
Пісті, аймахтағы улуғлар чӧбін, пу мероприятиеде аралазарға хығырған музей-заповедник директоры Владимир Николаевич Янгулов. Ол П.Г.Танбаевтің айланызынаңар ундубаан. Улуғлар чӧбі, тізең, родтар аллеязын тӧстирдеңер искірігні родтарға социальнай сетьтер, сотовай палғалыс пастыра нинҷе-де кӱн аразына читір пирген.
26 майда родтарның кізілері музей-заповедникте 14.00 часта чыылысханнар, оларнаң улуғлар чӧбі устаан. Кӧріл парған чирде ағас хорбыларын одыртарына оймағастар азынада хазыл партыр, кӱрҷектер, кӧнектер, суғ тимнеп салтырлар. Ағас одыртар алнында родтар кізілері, пістің чонның кибірлеріне тудынып, ӧӧркі чайааннардаң пу пастапчатхан чахсы киректі алғап пирзіннер тіп сурынғаннар. Сеектеен соонаң ідӧк кибір хоостыра ирбен от ызынаң мындағы чир арығлалған, чыылысхан улус, тағ-суғ ээлерінзер айланып, олардаң ағастарны одыртарға чаратсыннар, чоныбыс чахсы чуртазын паза пик хазыхтығ ползын тіп сурынған.
Улуғлар чӧбі чаламаларны азынада тимнеп салған, анда родтар аттары пазыл парған. Полған на родтың кізілері, ағас хорбызын одырт салып, аны суғлап, чаламалар палғааннар. Аймахтағы родтар санындалар Аргудаевтер, Сулековтар, Итименевтер, Тайдоновтар, Коковтар, Коконовтар, Баклаевтер, Ботиннер, Чезыбаевтер, Ербягиннер, Конгаровтар, Сабуровтар, Панышевтер, Поросёновтар, Додонковтар паза пасха даа родтар.
Итсе, піс родтарның тоозазын санға албаан даа поларбыс. Аннаңар чӧп пирчебіс, «Сӱлек пічіктері» музей-заповедниксер пар килерге, андағы аллеяда родыңар таныхталған ма тіп кӧріп аларзар. Сынап, родыңар санға алылбаан полза, аннаңар Орджоникидзе аймаандағы улуғлар чӧбіне искіріңер.
Піс ағас хорбыларындағы чаламалар орнына ағазахтарнаң хости чардыҷахтар хыс саларға пӧгінчебіс. Андада аллея иптіг кӧрімніг полар, чардыҷахтарда родтар ады пазыл парза, ол чызылбин ӱр турар.
Автор :
Татьяна КАНЗЫЧАКОВА, Орджоникидзе аймааңдағы улуғлар чӧбінің кнезі
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде