НАА ТУС, НАА КИРЕКСІНІСТЕР
04.06.2021
Хабарлар
Культура. 1 июньда Таштыптағы олған библиотеказы 60 чылын таныхтады
Пӱӱн Таштыптың улуғ паза кічіг чуртағҷылары пілчелер - Таштыптағы олған библиотеказы Культура туразының ікінҷі хадылында орныхча. Аның улии - 152 квадрат метр. Анда абонемент, хығырҷаң зал, кинделер чығҷаң орын. Наа ла тӧстелгенде, тізең, олған библиотеказы аар-пеер кӧс чӧрҷең: Гогольның орамазында азыл парған, анаң Советская орамада тоғынған, халғанҷы орны - Луначарскийнің орамазындағы олаңай квартира. 1979 чылда ла Культура туразының ікінҷі хадылында библиотекаа наа сіліг орын табыл парған.
Иң пастағы устағҷы А.Куюкова полған, 60 чылға ол орында он кізі алыс парған, амғы туста Наталья Дубровина устапча. Олғаннарға кинделер холға пирҷең залда Любовь Сагалакова 20 чыл тоғын парир (прай 40 чыл библиотека киреенең айғас парир), пасха пӧліктерде Олеся Блюм паза Антонина Маслова істенчелер.
Чыл сай олған библиотеказынзар пір муң чарымҷа пала чӧрче. Чыындыда 11 муңҷа кинде саналча паза 25 журнал-газетаа пазыныс апарылча.
- Халғанҷы чылларда библиотека киреенде хайдағ алызығлар? - минің суриим Наталья Дубровинаа.
- Чуғынҷах ағырығ тарааннаңар, социальнай сетьтерзер сығарға киліскен паза, совет тузынаң тиңнестірзе, амғы туста алызығлар кӧріндіре. Алында іҷе-пабаларнын кинделер аларға ахча кӧмес полҷаң, хығырығҷылар саны хызырылбаҷаң. Амды Интернетнең, электроннай, пос алған кинделернең тузаланыс парча, аннаңар кічіг хығырығҷылар саны кӧп нимес тӱс парды. Чайғызын школа программазы хоостыра пирілген кинделерге удаа кил парчалар, пасха туста аймах-пасха мероприятиелернең кӧӧктіріп, хығырҷаң пӧлікте ойнаҷахтар салғлап, наа оңдайнаң тоғынарға кӱстенчебіс.
Мының алнында библиотекада суулазарға пір дее чаратпаңаңнар. Ам аймах-пасха марығлар, ойыннар иртірілче, іди олғаннар библиотеказар кір чӧрерге кӧнік парчалар. Улуғлардаң туртухпин, хайда-да ойнанып, хайда-да хығырып, постарын ибдегі чіли тудынчалар. Пу чылдаң сығара библиотекада вай-файнаң даа тузаланар оңдай пар.
- Хайдағ пӧгіннер библиотека алнында пу чағынға турча?
- Тӧрт чыл пазынаң, «Модельліг библиотекалар тӧстирі» нацпроектте аралазып, библиотекада тиксі тыхтағ иртірібізерге, наа оңдайнаң тоғынарға планнар пар. Пічіктерні азынада тимниріне кӧп ахча киректелче. Библиотеканың істіндегі паза тастындағы кӧрімі хайдағ поларын сағынып, машиналар турғысчаң орын пӱдірерін проектке киріп, прай саринаң тоғыныбызарға кирек. Андада федеральнай бюджеттең 5 миллион салковай пирілер, че ахчаның кӧбізін пістің аймахха табарға кирек. Аннаңар молҷағ пирерге ам даа ирте, че андағ сағыстар пар.
Олған библиотеказының тоғынҷылары кӱстенчеткені, киректерін чахсы пілчеткені кӧріндіре. Аймах-пасха марығларда аралазып, палаларны оларға кӧніктіріп, чыл сай дипломнарнаң сыйыхтатчалар. 2000 чылда Хакас Республиканың иң чахсы олған библиотеказы полыбысхан. Ағаа хоза библиотекада «Амыр чӱрек» пірігіс тоғынча. Анда хазии уйан олғаннарнаң айғасчалар, оларға ай сай пірее мероприятие иртірілче.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде