Саяногорсктағы кирекче тоғазығ ирткен
04.06.2021
Хабарлар
Саяногорскта 17 частығ оол палығлаттырған кирек хоостыра тоғыс тоғазии ирткен.
2 июньда иртен пöзiк сиденнелген алынӌа тура хыринда Тува Республикадаң сыххан палығлатхан саарбах табылған. Пу кирекке кöрiстернiң пiрсiнӌе, саарбах хараа 1 июньнаң 2 июньға город аразынӌа чöрiп аларынаңар СТЕМИ техникумында хада ӱгренчеткен арғызына чоохтаан. Пасха искiрiглерӌе, арғыстар городча хада чöргеннер.
Тура ээлерi оолны таап алғаннарында, табырах имнег полызиин хығырыбысханнар. Аны Саяногорсктағы аймахтар аразындағы имнег туразынзар апар салғаннар.
Пу хабар Тувазар искiрiлген.
3 июньда Тува Республика пазының тоғызын толдырчатхан Владислав Ховалыг пу киректi пöгерiне Хакасиязар тоғысчы öме ысхан. Саяногорсксар Туваның ӱгредiг паза наука министрiнiң орынӌызы Юрий Ооржак, нациялар киреенӌе агентствозының национальнай политика пöлиинiң консультанты Саяна Комбуй-оол, Туваның халых безопаснозы министрiнiң орынӌызы Александр Харченко килгеннер.
Саяногорсктың пазы Михаил Валов городтың администрациязында тоғазығны иртiрген. Анда республика даа, город таа ӱлгӱлерiнiң кiзiлерi араласханнар. Ӱзӱрiг чабых iзiктiг ирткен. Тоғазығ соонаң Михаил Валов паза Александр Харченко пу киректеңер искiр пиргеннер.
- Тувадаң килген тоғысчы öмее пу кирек хоостыра искiрiглер толдыразынаң читiрерiнӌе прай ниме идiлген. Пу тоғазығда право хайраллаӌаң органнары араласханнар. Iстезiглiг комитедiнде тоғазығ иртiрерге пöгiнчебiс. Таныхтирӌыхпын, Саяногорск саринаң, пу кирекче сынны паза тирең пiлiп алар ӱчӱн, Хакасияда прай ниме идiл парған. Пiстiң иң пастағы пöгiнiбiс - сынны пiлiп алары. Городта амыр чуртасты, ынархасты хайраллап халарға кирек. Саяногорскта аймах нациялығ студенттер ӱгренчелер, олар прайзы ынағ чуртапчалар. Саяногорск чуртағӌыларына амыр тудынарға, аймах тылаастарға киртiнмеске, иптiг поларға хығырчам. Владимир хазыхтанып аларына iзенчебiс. Ол киӌеедең сығара Саяногорсктағы аймахтар аразындағы имнег туразының реанимациязында чатча. Табырах имненiп аларына имӌiлер прай ниме итчелер, - теен Михаил Валов.
Саяногорск пазының чооғынаң, пасха чирлердең килген студенттер квартираларда чуртабас ӱчӱн, город ӱлгӱлерi общежитие пӱдiрерiнӌе оңдайлар тiлепчелер.
- Пiр ле ниме чоохтирӌыхпын: имнег туразынзар палығлаттырған кiзiнi ағылғаннар. Пасхазы - iстезiгнiң чазыды. Iстезiг иртiрiлер паза пол парған кирекке паалағ пирiлер. Аны хоостыра ниме пол парғаны сығызар. Пыролығлар пар полза, нандырыға тартыларлар, - теен Александр Харченко.
Саяногорсктағы СТЕМИ техникумның директоры Максим Соболев Владимирдеңер чоохтаанда, аны чахсы ла саринаң паалаан:
- Ол öткiн оолах. 14 июньда пастағызын на имнег практиказын медбрат чiли иртерге кирек полған. Хазыхтанып аларына паза ӱгредиине айланарына тың iзенчебiс.
Автор :
Тимнеен Оксана Челтыгмашева
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде