ӦТІГ СӦСНЕҢ МАРЫҒЛАСХАННАР
09.06.2021
Хабарлар
Литература хараазы. Ағбанда Орыс тілі кӱнін паза илбек поэт Александр Пушкиннің тӧреен кӱніне чарыдылған «Хакасияда Литература хараазы» акция ирткен
Хакасияда Литература хараалары, нинҷе-де чыл мының алнында пасталып, анаң, чыл сай иртіріліп, кибірге кір парған. Пылтыр ла, пандемия полып, иртпеен.
Алында «Литература хараазы» городта тасхар иртчең полза, пӱӱл ол С.П.Кадышевтің адынаң культура кініндегі теелбек залында ирткен. Аны ӧӧнінде Хакасияның Чайаачылар туразы паза писательлер пірігізі иртірчелер. Оларға республикадағы библиотекалар полысчалар.
Пӱӱл ідӧк теелбек залында Н.Г.Доможаковтың адынаң национальнай библиотека, Хакасиядағы олған библиотеказы паза Хакасиядағы харахнаң уйан кӧрчеткеннернің ӧнетін библиотеказы постарының кинделер кӧзідиин асханнар паза викториналар иртіргеннер. Чайаачылар туразы ідӧк наа сыххан кинделерні кӧзіткен.
Чыылған чонзар алғыстас сӧстерінең айланғаннар Хакасияның культура министрі Светлана Окольникова, национальнай паза территориальнай политика министрі Михаил Побызаков. Оларның чооғынаң, мындағ Литература харааларын алғым арах паза улам пӧзік синде иртірерге кирек полча. Ағаа хоза, Чайаачылар туразы чайғы ортызында Асхыс аймаандағы Чоғархы Тӧӧ аалда литература лагерьін тоғындырарға кирек.
Анаң министрлер Славян пічиине паза культуразына чарыдылған «Славянское наследие» республика синінде иртірілген марығның чиңісчілерін алғыстас пічиинең паза книгаларнаң таныхтааннар. Іди чиңісчілер полыбысханнар Ярослав Фирсов, Харатастағы А.Г.Баженовтың адынаң лицейнің ӱгренҷізі (1-ғы орын), Ольга Мирошниченко, Ағбандағы гимназияның ӱгренҷізі (2-ҷі орын), Таисия Сульберекова, Пии аалдағы ортымах школаның ӱгренҷізі. Улуғларның аразында 1-ғы орында - Светлана Ивкина, 2-ҷі орында Галина Ширко паза 3-ҷі орында Татьяна Штарк пол парғаннар.
Анаң акцияның ӧӧн чардығында Хакасияның литература пірігістерінің аразында марығлас пар сыххан. Пастағы чардығында олар постарының литература чайаачы омаларын кӧзіт пирерге кирек полғаннар паза А.С.Пушкиннің чуртазынаңар сурығларға нандырғаннар. Прай тоғыс ӧме араласхан. Марығ араласчылары кибелістерін хығырғаннар, сарыннар толдырғаннар паза теелбек тее сал турғаннар. Литература пірігістері Ағбан, Харатас паза Саяногорск городтардаң паза Боград аймаанаң полғаннар.
Хакас тілінең пасчатханнарның аразында Ағбан городтағы «Чайаачылар» (устағҷызы Карина Кулумаева) паза «Тӧреен сӧс» Н.Ф.Катановтың адынаң национальнай гимназия (устағҷызы Татьяна Казанаева). Литература пірігістері ӧткін марығласханнар. Марығ пірее ікі часча парған полар. Аның чарғыҷылары писательлер Юрий Иванов, Юрий Черчинский паза Ольга Тараканова, ідӧк чайаачылар туразының устағҷызы Надежда Бурнакова паза С.П.Кадышевтің адынаң культура кінінің тоғынҷызы Ирина Кулагашева чайаачы ӧмелерні прай саринаң сыныхтап турғаннар. Оларның иткен салтарлары хоостыра чиңіс тутхан Саяногорсктаң килген «Стрежень» литература пірігізі. Чоохтирға кирек, пу пірігіс Хакасияда хаҷанох тоғынча паза иң кӱстіглернің санында. Кӧп писатель аннаң сыххан.
Ідӧк кӧрігҷілернің кӧңніне кірген ӧмені адааннар. Андағ атха республиканың национальнай гимназия-интернадының «Тӧреен сӧс» литература пірігізі турысхан.
«Литература хараазы» чайаачы писательлерні паза кибелісчілерні ле нимес, ідӧк литератураа хынчатханнарны піріктірче.
Автор :
Илья ТОПОЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде