ОЛАРНЫҢ ТОҒЫЗЫ - КІЗІЛЕРНІҢ ЧУРТАЗЫН АРАЧЫЛИРЫ
11.06.2021
Хабарлар
Пайрам. Іскеркі Сибирьдегі тағ арачылағчыларының отряды пӱӱл 6 июньда 90 чылын таныхтады. Ол кӱнге чарыдып, Ағбандағы тимір чол бригадазы частьындағы Культура туразында пайрамнығ иир полды
Тилекейде аймах профессия кӧп, оларның піреезі хорғыснаң кӱннің сай палғалыстығ. Чир ис-пайын аныпчатхан предприятиелерде саайлар пол парза, оларға полызыға тағ арачылағңылары килчелер. Россияда тағ арачылағҷыларының пастағы станциязы 1907 чылда тӧстелген. Хакасияда андағ пастағы станция Харатас копизінде (амды Харатас город) азардаңар чарадығ 1931 чылда алылған, аның ӧӧн сылтаа - орындағы хара тас аныңаң 8 № шахтада улуғ саай пол парғаны. Хара тастың тозыны чара чачыраан сылтаанда, 120 кізі ӱреен. Амға теере ол хазнада хара тас анирында иң улуғ саайға саналча.
Ол туста тағ арачылағҷыларының пастағы тиріглері уйан полған - хайло, кӱрҷек, арғамҷы паза хаңаа. Тоғысха уғаа табырах кӧнігерге киректелген, регионда кӧп наа шахта азыл турған. 1940 чыллардох отряд Хакасиядағы паза Хызылчар крайындағы чир ис-пайын аныпчатхан прай предприятиелерде хорғыс чох оңдайлар ӱчӱн нандырған. 1973 чылда Іскеркі Сибирьнің тағ арачылағҷыларының штабы Харатас городтың 9-ҷы поселогындағы тағ арачылағҷыларының ӧнетін городогынзар кӧзірілген, хайда ол амға теере орныхча.
Амды Хакасияның тағ арачылағҷыларының отряды амғы тусха килістіре тиріндірілген. Анда хорыхпас кізілер тоғынчалар, олар полызыға килерге хаҷан даа тимделер. Оларның ӧӧн хыйғызы: «Шахтадағы саайға кірген кізілернің пастағы сағызы арачылағҷылардаңар ла».
Пайрам пасталғанда, сценаа тағ арачылағҷылары частьының знамязы сығарылған, Россия паза Хакасия гимннері ойнадылған. Ӱлӱкӱннең алғыстирға Хакасия пазы Валентин Коновалов сыххан:
- Тағ арачылағҷылары службазы тӧстелгеннең пеер кӧп алызығ пол парған. Че ӧӧн пӧгін - кізілернің чуртазын арачылиры - алыспаан. Сірер хаҷан даа махачы тудынчазар, ниик нимес тоғызыңарға сын полчазар. Амғы туста тағ арачылағҷыларының тоғызы иң хорғыстығларның пірсі полча. Олаңай кӱннерде дее, ӱлӱкӱннерде дее сірер сидік оңдайларда полызыға килерге тимдезер. Кізілернің чуртазын арачылирынаң артых тоғыс чоғыл. Прайзыңарны пайрамнаң алғыстапчам.
Анаң арачылағҷыларға сыйыхтар читірілген. Хакасия пазы алғыстазын оперативнай взводтың респираторщигі Евгений Лапаев, тағ арачылағҷыларының Коммунардағы пунктының отделение командирі Роман Опенько, Абазадағы пункттың отделение командирі Константин Фолин алғаннар.
Ідӧк Россия МЧС-ының арачылағҷылар департаментінің директор орынҷызы Константин Кондаков чоох тутхан. Ол министерство устағ-пастааның алғыстазын искірген. Аның таниинаң, Іскеркі Сибирьдегі тағ арачылағҷылары хара тас аныҷаң предприятиелерде полған сағыбаан саайлар салтарларын чох идерінде кӧп хати араласханнар. Оларның ӧӧн пӧгіні - шахтёрларның чуртазын паза хазиин арачылиры. Арачылағҷылар постарына айабинчатханы, тоғысха нандырығлығ хайчатханы улуғласха турысча. Анзын арачылалған кӧп чуртас киречілепче.
Россия МЧС-ының «Тағ арачылағҷыларының частьы» предприятиенің ӧӧн директоры Николай Медведевтің таниинаң, Іскеркі Сибирьдегі отрядтың чолы оой нимес полған. Ол тоғызын ӱс отделениедең пастаан. Амғы туста арачылағҷылар шахтёрларға даа, республиканың паза хонҷых регионнарның чуртағҷыларына даа полызыға килерге хаҷан даа тимделер. Ідӧк арачылағҷыларны МЧС-тың Хакасияҷа ӧӧн управление пастығы Александр Мулл алғыстаан.
Пайрамнығ иирде кӧп арачылағҷаа, ӧмелерге аарлығ сыйыхтар паза автомобильлер читірілген. Тағ арачылағҷыларының Абазадағы пунктының отделение командирі Сергей Забусов Россия МЧС-ының Аарластығ пічиинең сыйыхтатхан. Пу тоғыста ол тӧртінҷі чылы тоғын парир. Пастап анда ӱр істенер тіп сағынмаан даа. Тоғызы аның кӧңніне кірче. Абазада тағ арачылағҷылары пір ле объектте, тимір аныҷаң предприятиеде, тоғынчалар. Че анда даа саайлар пол парча.
- Арачылалған кізілернің чӱректерінең сыххан алғызын исчетсем, пу оой нимес тоғысты таллап алғаныма пір дее хомзынминчам, - таныхтаан Сергей Забусов.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде