ХООСХАЛАР ДАА ЭЭЛЕРІНЕ ТӦӦЙ ПОЛ ПАРЧАЛАР
11.06.2021
Хабарлар
Кӧзідіг. Ағбанда Л.Р.Кызласовтың адынаң национальнай чир-суғ ӱгренҷең музейде Россия Федерациязының чон хоосчызы, профессор Никас Сафроновтың хоостар кӧзідии азылған
Автопортрет Россияның хоосчылар академиязының академигі Никас Сафронов тилекейде иң маңат хоосчылар санына кірче. Россияда аны чахсы таныпчалар, ол телевидениедегі аймах ток-шоуларда удаа араласча. Никас Сафронов кӧп саблығ кізінең чағын таныс, оларның санына Алла Пугачева, Софи Лорен, Ален Делон, Никита Михалков, Стивен Спилберг паза даа пасхазы кірчелер. Хоосчы оларның омаларын позының тоғыстарында чайап салған.
Никас Сафроновтың хоостары Россияның городтарынӌа «ааллап» чӧрчелер. Іди, Сибирьдегі улуғ городтарда полып, амды Ағбан городха читкен. Музейнің ікінӌі хадылында хоосчының 60 азыра живопись паза графика тоғызы іліл парған. Олар аймах жанрда чайалғаннар: пейзаж, натюрморт, портрет. Сюрреализм хоостары парох. Хай піреезі наа оңдайнаң толдырыл парған, хайзылары, классикаа тӧстеніп, сырлар ойыны пастыра кӧрігӌілернің сағыс-кӧгістерін тоғындырчалар. Олар хоостарны олаңай ла кӧрбинчелер, хоосчы пу тоғызында хайдағ сурығ турғысчатханын пілерге харасчалар.
Никас Сафронов - таланттығ портретист. Пу чыындыда ол саблығ кізілер королева II Елизаветаның, актерлар Валентин Гафттың, Лев Дуровтың, Виктор Сухоруковтың паза Николь Кидманның омаларын сығар салтыр. Позының даа ікі автопортреді пар. Ағаа хоза онға чағын хоосха омазы сығарылған. Олар ир кізінің паза ипчінің кип-азаан кис салтырлар. Хоосчының чооғынаң, ибдегі адайлар паза хоосхалар соонаң постарының ээлеріне тӧӧй пол парчатхан одырлар.
Хоосчының чуртазынаңар чоохтаза, Николай (Никас) Степанович Сафронов 1956 чылда хосхар айының 8-ӌі кӱнінде Ульяновск городта тӧреен. Армияда служба ирткен соонаң ол, Литвадағы Вильнюс городта хоосчыларның хазна институдында ӱгреніп, аны 1982 чылда тоос салған. Сағам ол Москвада чуртапча. Хоосчы 1978 чылдаң сығара Россиядағы паза пасха хазналардағы хоостар кӧзідіглерінде ӧткін араласча. Ол тынағ чох матап тоғынча. Тиктең нимес аймах аарлығ сыйыхтарға турысча, ол санда Американың наука паза искусство академиязының алтын медальы, ах арығ Станиславтың паза ах арығ Аннаның орденнері паза даа пасхазы. Россияның наукалар академиязы ағаа «Наука паза искусство рыцарьы» аарластығ ат пирген. Ағаа хоза ол Ульяновсктағы хазна университеттің профессоры полча.
Никас Сафроновтың хоостар кӧзідии пӱӱл орғах айының 15-ӌі кӱніне теере тоғынар.
Автор :
Илья ТОПОЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде