ЧИИТТЕР - ХАЗНАБЫСТЫҢ ТАНДАҒЫЗЫ
16.06.2021
Хабарлар
Танығлығ кирек. Россия кӱні алнында Хакасия правительствозы туразында республика пазы Валентин Коновалов спортта, наукада, искусствода пӧзік чидіглерге читкен ӱгренҷілерге паспорттар читірген
Кибір хоостыра чыл сай улуғ ӱлӱкӱн алнында, Хакасия правительствозынзар таланттығ олғаннарны ааллап хығырып, оларға пастағы официальнай документ пайрамни читірілче. Пӱӱл андағ ӱлӱс 21 ӱгренҷее тӱскен. Алындағы чылларда, тізең, мындағ танығлығ мероприятиеде Ағбандағы школаларда ла ӱгренчеткен олғаннар араласчаңнар. Амды олар республиканың аймах пулуңнарынаң полғаннар.
Пу наада 14 чазын толдыр салған ӱгренҷілер чӱрексееннер. Хакасияның ӱгредіг министрінің орынҷызы Татьяна Карташова, аны сизініп, саарбахтарнаң чоохтас сыххан. Андада оол-хызыҷахтар, пос салыныбызып, кӱлін сыхханнар. Ӱгренчілернің іҷе-пабалары даа палаларының ӱчӱн ӧрінгеннер.
Тузы читкенде, чыылған олғаннарзар Валентин Олегович чылығ сӧстернең айланған:
- Пӱӱн танығлығ кӱн, сірер чуртазыңарда иң ӧӧн пічік алчазар. Паспортты холға алып, амды сірер хазнабыстың гражданині полыбыстыңар. Аарлығ олғаннар, мыннаң мындар ӱгреністерің ідӧк тӱзімніг парзын. Сірернің полған на чидіглерің республиканы паза Россияны сабландырзын.
Анаң сӧс алған Хакасия пазының орынҷызы Ольга Пономарёва:
- Аарлығ олғаннар, пӱӱн сірер пастағы паспортыңарны холда тутчазар. Сомнарыңзар кӧріңер, хайдағ анда чуртасха хыныснаң кӧрчеткен харахтар. Мин сірерге ол хынысты хаҷан даа чідірбеске алғапчам. Чолларың азых ползын, хазнабыстың чиит гражданиннері!
Чоохтирға кирек, чиит улусха паспорттар читірілчеткенде, танығлығ мероприятиені апарчатхан кізі полған на ӱгренҷінің чидиин чыылған чонға тыыда искірген. Аны истіп, пістің республикада кӧп чайаачы олған чуртапча тіп чӱректе поғдархас тӧреен. Анзы уғаа ӧріндірче. Чиит улус - пістің таңдағыбыс нооза. Ӱгренҷілер Валентин Коноваловтың холынаң ӧӧн пічікті алчатханда, іҷе-пабалар палаларын сомға суурғаннар. Анзы пілдістіг, олар даа оол-хыстарының ӱчӱн ӧрінчелер нооза.
Танығлығ кӱнде чалахай кӧңніліг олғаннар пастағы официальнай пічіксер чӱрексініп кӧргеннер. Андағ ӱгренҷілернің санында Н.Ф.Катановтың адынаң национальнай гимназияның 7-ӌі класстың ӱгренҷілері Алина Бутонаева паза Екатерина Торокова полғаннар. Ікі ӧӧре «4», «5» паалағларға ӱгренчелер. Ідӧк олар аймах предметтерҷе регион синіндегі олимпиадаларда сыбыра араласчалар. Катя маңнаныстығ ӱгренче. Аның хынчатхан предметтері математика паза англия тілі полча. Хакас тілінҷе паза литератураҷа ол регион синіндегі олимпиадаларда сыйыхтығ орыннарға турысхан. Алина даа ӧӧрезінең халбинча. Ол ідӧк чыл сай олимпиадаларда араласча. Пӱӱл ол музыка школазын маңнаныстығ тоосты.
Ағбан пилтірі аймаандағы Чарков аалдаң Екатерина Инкижекова Хакасия пазының холынаң паспорт алған. Катяның ӱгренізі тӱзімніг парча. Аның хынған урогы англия тілі полча. Ол предметче хыс аймах конференцияларда паза олимпиадаларда араласча. Тӧрт чыл пазынаң ол школа тоозар. Че, андағ даа полза, Катя таңдағызынаңар амох сағынча.
- Мин педиатр поларға сағынчам. Ол специальностьча вузсар ӱгренерге кіріп алар ӱчӱн «4», «5» паалағларға ла ӱгренерге кирек, - теен Катя.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде