ПОЛҒАН НИМЕНІ УНДУТПАСХА..
16.06.2021
Хабарлар
Чиңіс. Хакасияның ӱгренҷілері, хайзылары Илбек Ада чаадаңар сочинение иң чахсы пазыбысханнар, республиканың хабарҷылар пірігізінің сыйыхтарын алдылар
.
Марығ ирткен чылда полған, че коронавирус пандемиязы ӱчӱн чииттерге сыйыхтар пӱӱл ле читірілді.
Илбек Чиңістең пеер 76 чыл ирт парды, че андағы хорғыстығ чаалазығ, ӧлім, ӧзӧгіс ундудылбинча. «Хакасия, алнынзар!» марығда араласхан ӱгренҷілер оларны кӧрбееннер, че постарының сочинениелерінде олар аны чахсы кӧзіт салғаннар.
- Олғаннар постарының тоғыстарында тирең істезігліг тоғыс апарғаннар, сӧбіре архивтерін кӧдіргеннер, сомнар, пічіктер тілееннер. Марығның ӧӧн пӧгіні - чааның сынын кӧзіт пирері, полған нимені ундутпасха, - таныхтаан Хакасияның хабарҷылар пірігізінің кнезі Ольга Ширковец.
«Хакасия, алнынзар!» хабарҷылар марииның «Илбек Чиңіс» номинациязында чиңісчілер полыбысханнар: Иван Катаев, Виктория Максимова, Дарья Оленина, Алина Верховинская, Егор Гогорев, Екатерина Королева, Александр Арчимаев. Александр Калининдегі ортымах школада ӱгренген, амды ол Новосибирсктегі хазна университедінің студенті полча. Сыйыхты анын ӱгретчізі Галина Боргоякова алған.
- Школада мин «Чиит хабарҷы» кружок апарчам. Андар сочинение пазарға хынчатхан олғаннар чӧрчелер. Саша Арчимаев уғаа кӱстенҷік ӱгренҷі полған, спортнаң айғасчаң Илбек Ада чааға чарыдылған марығда аралазарға хығырғанда, сах андох ынаан. Ол тоғызына прай чӱреен салған. Че хайди ілезіне сығысхан, аның сӧбірезінде чаада араласхан хазых кізі халбиндыр, хайзы ағаа сочинение пазарға полыс пирерҷік, аннаңар ол, позын Курсктағы тӱгееде полғанынаңар сағынып, сочинение пасхан. Анда полған полза, позын хайди тудынарҷых, нанҷыларына хайди полызарҷых, хайди тіл алызарҷых, ыырҷыдаң хайди харбазарҷых... Сағынчам, Сашаның тоғызы чарғыыларны аптаан, - таныхтаан чооғында Галина Васильевна.
Россияның хабарҷылар пірігізінің Хакасиядағы пӧлии «Хакасия, алнынзар!» марығны чыл сай иртірче. Анда республиканың прай даа хабарҷылары, операторлары, сомҷылары араласча. Халғанҷы ӱс чыл, тізең, школада ӱгренчеткен олғаннарға алынҷа номинация кирілген. Хайди таныхтаан чооғында Ольга Ширковец, «Илбек Чиңіс» номинация олғаннарның аразында улуғ кирексіністе. Аннаңар пу номинация «Хакасия, алнынзар!» марығда сыбыра пол турар. Марығда араласхан чииттерге дипломнар читірілген, чиңіс тутханнар ідӧк сыйыхтар алғаннар.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде