ОЛАР МАТЫР ТОҒЫНҒАННАР, ПӦЗІК СЫЙЫХТАР АЛҒАННАР
18.06.2021
Хабарлар
20 июньда - Имнег тоғынӌызының кӱні. Ағбанда хандых айының 16-ӌы кӱніңде драма театрының улуғ залында Хакас Республиканың ӱлгӱлері, имҷілерні алғыстап, сыйыхтар читіргеннер
ХАНДЫХ АЙЫНЫҢ 20-чі КӰНІНДЕ РОССИЯДА ИМӋІ КӰНІ ТАНЫХТАЛЧА. ПӰӰЛ, ТІЗЕҢ, ОЛОХ КӰН ТРОСИН ХУДАЙ ӰЛӰКӰНІ ПОЛЧА. АНЗЫ ТИКТЕҢ НИМЕС, НЕКЕ. ИМҶІЛЕР ПІСКЕ ХУДАЙЛАР ЛА ОСХАСТАР НООЗА. КӦП АҒЫРЫҒЛАРДАҢ КІЗІЛЕРНІ ПУ ЧУРТАСХА АЙЛАНДЫРЧАЛАР.
Піс хазыхта оларзар тын на хайығ салбинчабыс, че ағырыбысса, имҷіден аарлығ кізі чох полча. Іди коронавирус чуғынҷах ағырығ прай нимені ілезіне сығарған, ол санда пістің имнег киреенін ағырсымнығ сурығларын, нименен пістің имҷілер пасха хазналардағылардаң артых. Амды пістің ӱлгӱдегілер имңілерні улам улуғлап сыхтылар. Анзы іле кӧрінген драма театрында прай республикадаң чыылған имңілерні сыйыхтаан кӱнде.
Драма театрының улуғ залынын сценазынзар Хакас Республиканың пазы Валентин Коновалов сыххан. Ол, имңілерні алғыстап, республикадағы имнег киреенін сидік сурығлары хайди пӧгілчеткеннеңер искірген. Сағам Хакасияда 11 мун азыра кізі имнег киреенде істенче. Пандемия оларға хатығ сыныхтағ полған. Имңілернін кӧбізі позынын тоғызын тастабаан. Олар хараа-кӱнӧрте ковиднен ағырчатхан кізілердең хыйа парбин турғаннар. Хакасия правительствозы федеральнай кіннең хада сидік 2020 чылда имнег киреене 20 миллиард салковай позытхан. «Хызыл зонада» тоғынчатхан имҷілерге чал ахчазын кӧдір турғаннар.
Хомзыныстығ, че Хызылчар крайында имҷілерге чал ахчазы пістинең пӧзік тӧлелче, аннаңар кӧп имҷі ол хонҷых регионзар тоғынарға парыбысча. Іди сурығ турча - тиксі Россияда имҷілерге чал ахчазын тиң тӧлирге, оларны федеральнай бюджетке кирерге. Хакасия правительствозы позының саринаң ол сидік сурығны пӧгерге кӱстенче. Іди республика аалларындағы ФАП-тарзар тоғынарға парған имҷілерге 500 муң салковай паза чурт саринан полызығлар пирілче. Школа тоосчатхан чииттерні имнег институттарынзар чӧптезіг хоостыра ӱгренерге ыс турарға. Олар, институт тоозып, тоғынарға иблерінзер нандыра айланзыннар.
Имнег учреждениелеріне уғаа кирек участковай имҷілер, медсестралар паза ӧнетін специальностьтығ имҷілер. Кічіг палаларнын ӱрепчеткені синче, анзы ӧріністіг. Наа ФАП-тар пӱдірілчелер. Пістін хазнада халғанҷы туста имҷілерге улуғ хайығ сал сыхтылар. Чабал ковид ағырығ пір дее чирзер парбаан, ол пістін республикада хатап тарап сыхты. Имҷілерге пазох ла аннаң кӱрезерге килісче.
Анан Хакас Республика пазы Валентин Коновалов иң турыстығ имҷілерге хазна сыйыхтарын читірген. Іди Пироговтың орденіне турысханнар республикадағы Н.М.Одежкиннің адынаң офтальмология имнег туразынын ӧӧн имҷізі Любовь Карамчакова паза Ағбандағы табырах имнег полызии станциязынын ӧӧн имҷізі Айвар Кольчиков.
Уғаа кӧп имңі Россия президентінің Аарластығ паза алғыстас пічиин алған. «Хакас Республиканың саблығ имҷізі» аарластығ ат алғаннар Хакасияның Ӧӧркі Чӧп депутады паза Ағбандағы олған имнег туразынын хирургы Геннадий Канзычаков, ідӧк Хубачардағы имнег туразының ӧӧн имҷізі Евдокия Чебочакова. Алғыстапчабыс «Хакасияның істеніс сабланызы» медаль алған Тамара Тинникованы. Ол Ағбандағы теер-чуғынҷах ағырығлар имнег туразының ӧӧн имҷізі полча.
Кӧп имҷі Хакас Республика правительствозынын Аарластығ пічиине турысхан. Хакасияның Ӧӧркі Чӧп кнезі Владимир Штыгашев позының алғыстас сӧстерінде Имҷілер ӱлӱкӱнін Ах арығ кӱн тіп таныхтаан. Имҷілер сынап таа ах арығ ангеллер осхастар. Олар кізінін ит-сӧӧгін паза худын имнепчелер. Ағаа хоза, Владимир Николаевич ам пазох тарапчатхан ковид ағырығдан тоғыр ӧменең кӱрезерге хығырған. Пістің таңдағызы оңнығ ползын.
Сыйыхтастар соонаң Ағбандағы табырах имнег полызии станциязының ӧӧн имҷізі Айвар Кольчиковнаң кӧп нимес чоохтазып аларға киліскен. Аның чооғынан, Хакасияда ковид чуғынҷах ағырығ, хости регионнарнаң тиңнестірзе, уғаа табырах тарапча. Мында пір ле сылтағ - кізілер имнег маскаларын киспинчелер, антисептиктернең тузаланминчалар. Пір сӧснен, ағырығны нимее салбинчалар. Андағ ондайнаң чіт париған ағырығ пазох айланча. Іди пір суткада 200 азыра хығыртығ полча. Анзы пылтырғызынан илееде кӧп. Кізілер постарына нандырығлығ хайбаза, ағырығ пір дее тохтабас. Прай ниме постаң, ол санда кізі хазии.
Автор :
Илья ТОПОЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде