МАСКА КИСКЕННЕРІ - ХЫЙҒАҶАХТАР, КИСПЕЕННЕРІ...
18.06.2021
Хабарлар
Сыныхтағлар. Санитар-эпидемиология кирексіністеріне ам даа тудынарға кирек
Халғанҷы неделяда пу чуғынҷах ағырығның тарапчатханы Хакасияда ӧсче. Аннаңар хакас чонның кибірліг ӱлӱкӱнін, Тун пайрамны, иртірбеске чарадылған паза пасха даа килкім мероприятиелернің иртірілері ікінӌілестіг. Республика ӱлгӱлері ағырығның тарапчатханын хызырар кӧстегнең наа хатығластар кирче. Олох туста город-аалларда чон чыылысчатхан, чӧрчеткен орыннарда санитар-эпидемиология кирексіністері толдырылчатханы сыныхталча.
Пу неделяда Хакасияның транспорт паза чол хонии, чол чӧрізінің хорғыс чох поларынҷа хазна инспекциязы паза Ағбан город устағ-пастаа специалисттері город паза дача автобустарында пассажирлернің маскалығ чӧрчеткеннерін сыныхтааннар. Сыныхтағ УПК тохтаанда ирткен. Пу тохтағдаң дача автобустары чорыхха сыхчалар паза дачалардаң айланчалар, аннаңар кӧбізі пассажирлер -аға-ууҷалар. Олар тохтағда даа маскалығ турчатханнар.
Сыныхтағчылар турған автобуссар кірчелер, пассажирлернің маска кискенін сыныхтапчалар. 10-ҷы маршруттағы автобуста пір хыс маска чох тутырған. Аны автобустаң тӱзіргеннер паза маска кизерге сурынғаннар. Аннаң чоохтазар алнында кем полчатханын киречілирге киректелче, че хыс паспортын пирерге ынабаан. Специалисттер ағаа пӱӱнгі кӱннің санитар-эпидемиология кирексіністерін чарытханнар паза кем полчатханын киречілебинчеткені ӱчӱн хатығластардаңар чоохтааннар.
- Ағбан городтың автобус маршруттарында маска кизерінҷе чарадығ хайди толдырылчатханы кӱннің сыныхталча, - таныхтаан Хакасияның транспорт паза чол хонии министерствозының советнигі Максим Галактионов. - Кӱннің маска киспинчеткен пассажирлерні кӧрчебіс. Андағ чуртағҷыларға кирексіністерні чарытчабыс паза административнай нандырыға тартарынҷа протокол тимнепчебіс. Материаллар чарғызар ызылча.
Административнай нандырыға тартардаңар протоколны полномочиеліг кізее пазарға чарир. Хакасияның толдырығлығ ӱлгӱзі андағ полномочиені министерство-ведомство специалисттеріне пирче. Хайдағ нандырыға тартарын чарғы паалапча: сизіндіріг пирерге алай 1000 -15000 салковайға теере ахчалығ хатығласха тартарға.
Мындағ сыныхтағлар аймах учреждениелерде паза пірігістерде иртірілче, ол санда садығ тураларында, спортзалларда. Чайғы пасталыбысханда, кізілернің маска кизер кӧңнілері чоғыл, че ағырыға хаптырарға хынминчатсаң, кизерге кирек ле!
Автор :
Наталья БОРГОЯКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде