ТУН ПАЙРАМ ИРТІРІЛБЕС
18.06.2021
Хабарлар
Штаб чыылии. Пӱӱл Тун пайрам ӱлӱкӱнні иртірерге республикадағы эпидемиология кирее пирбинче
Тун пайрам - хакас чонның иң хынчатхан ӱлӱкӱні. Ол нинӌе-де чыл изере иртірілбинче. Аннаңар чон аны сағыпча паза ол пӱӱл иртірілеріне ізенген. Че эпидемиология кирее хомай саринзар алысчатханда, аны иртірерге чочыныстығ. Ағырыбысханнарның саны кинетін хозыл парарына хорғыс пар.
Тун пайрамнаң пасха, ідӧк пӱӱл ӱгредіг организацияларында выпускной иирлерні иртірерге чарабас. Спорт паза физкультура мероприятиелерін кӧрігӌілер чох, культура паза искусство залларында кӧрігӌілернің санын 75 проценттең 50-ге теере хызырыбызарға киректелче. 18 час толдырғалахтарга 20.00 - 07.00 частарда улуғлар чох тасхар поларға чарадылбинча. Че июльда иртер «Чир чайаан» фестиваль иртіреріне алызығлар кирілбес. Андар билеттер хаӌанох садыл парғаннар, оларны айландырар оңдай чоғыл.
Мына мындағ хатығластар кирілче Хакасияда. Анзы тиктең нимес. Кӱннең кӱнге республикада коронавирус чуғынӌах ағырығны хаптырып алғаннарның саны хозылча. 16 июньға ла 56 кізі. Ирткен неделяның читі кӱнінде республикада 278 кізі ағырыбысхан полза, пу неделяның тӧрт кӱнінде - 223 кізі. Оларның 108-зі - Ағбанда. Хоза пір танығ, пандемияның пастағы паза ікінӌі чардығында ковидті ӧӧнінде улуг частығлар хаптырып, аар ағырған ползалар, амды ағаа чииттер, саарбахтар паза кічіг палаӌахтар хаптырчалар. Аннаңар искірген штаб чыылиинда Россияның Роспотребнадзор управлениезінің Хакасиядағы пӧлиинің пастығы Татьяна Романова.
Хакасияның хазых хайраллаӌаң министрі Олег Ананьевскийнің искіриинең, республикада чуғынӌах ағырығны тараттырбас ӱчӱн кӧп тоғыс апарылча, че чон ковидтең чочынминча, прививка турғыстырарға тоғыр полча. Вакцина республиказар неделяда ікі хати килче, ікі пасха.
- Хакасия городтарының аразында Харатаста ла прививка турғыстырарынңа тоғыс чахсы парча, пасхазында - Ағбанда, Сорығда, Саяногорскта, Абазада - уйан. Аймахтарның аразында Таштып аймаа иң тӧбін прививка турғыстырған. Че аны турғыстырар сылтағ пар - халғанӌы туста ковиднең паза пневмониянаң палғалыстығ хығыртығлар табырах полызығ пирчеткен службаларзар пис-алты хати ӧс парған. Ағаа хоза істеніс ӧмелерінде хатап ағырчатханнар сығыс сыхты - спорт учреждениелерінде, кӱс структураларында, предприятиелерде паза даа пасхазында, - таныхтаан чооғында Олег Васильевич.
Эпидемиология кирее хомай саринзар алысчатханда, республикада ковид-кіннер, обсерваторлар пазох азылчалар. Пу наада Г.Я.Ремишевскаяның адынаң республиканың имнег туразында ковид-кін тӧстелген. Анда пастағы пациенттерні имнеп пастабыстылар. Мыннаң мындар имнег министерствозы пасха даа имнег учреждениелерінің тоғызын алыстырарға тимде, ирткен опытха тӧстеніп.
- Коронавируснаң ағырған кізілер прививка турғыстырарынаң удаа тоғыр полчалар. Че специалисттернің таниинаң, коронавируснаң ағырчатхан кізінең палғалыста полған пис кізінің тӧрті аны хаптырып алча, прививка турғысханнарның, тізең, пір кізі, - таныхтаан Хакасия пазы Валентин Коновалов.
Хайди чыылығ тоозылчатханда таныхтаан Валентин Олегович, Тун пайрам ӱлӱкӱн 25-26 июньда таныхталбаза даа, піс аны соонаң хайди даа пайрамнирбыс. Хаӌан? Анзы чуртағӌыларның нандырығлығ полчатханынан палғалыстығ полар. Прайзы санитарнай нормаларға тудынзабыс, коронавирустаң тоғыр прививка турғыстырзабыс, эпидемиология кирее дее чахсылан сығар. Андада Тун пайрамны даа таныхтирға чарир полар...
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде