ХЫНЫС ПРАЙ НИМЕДЕҢ КӰСТІГ
18.06.2021
Хабарлар
Чайаачы чорых. Пу кӱннерде «Читіген» музыка-драма театрының артисттері Татарстандағы Хазан городтаң айланғаннар. Олар анда 6 - 11 июньда ирткен тӱрк тілліг чоннарның «Науруз» театрлар фестивальында араласханнар
«Науруз» - чоннар аразындағы фестиваль. Аның тӧстегҷізі Хазан городта орныхчатхан Татарстанның Г.Камалның адынаң академия театры полча. Ол «Чайаачы кізілер» федеральнай проекттің «Культура» нацпроекті хоостыра чуртасха кирілче. Татарстанның культура министерствозына тӱрк тілліг чоннарның театрлар фестивальын иртірерге Россияның культура министерствозы паза театр деятельлері пірігізі хабасчалар. Пу чыл олар аны 15-ҷі хати иртірділер.
Хакасиядағы национальнай театрларның пірсі, «Читіген» музыка-драма театры, тізең, чоннар аразындағы «Науруз» фестивальда пӱӱл 4-ҷі хати араласты.
Пістіңнернің Хазанзар чорыхтарының тархынын кӧрзе, читігендегілер андар иң пастағызын 2009 чылда чӧргеннер. Чайаачыларыбыс андада Р.Акутагаваның «В чаще» новеллазы хоостыра турғызылған «Чарғы» ойынны ( режиссер - А.Асочаков) кӧзіткеннер. 2013 чылда олар Хазан городта чыылысхан тӱрк тілліг чоннар хайиина М.Тикамацуның «Остров Небесных Сетей» ойынын сығарғаннар, анын режиссеры Баатр Колаев полча. 2017 чылда хакасиядағылар «Науруз» фестивальға режиссер Сергей Потапов турғысхан П.Ойунскийнің «Алҷаах парған Муклай» ойынын апарғаннар. Пӱӱл,тізең, «Читіген» музыка-драма театрының артисттері Татарстанның ӧӧн городындағы Г.Камалның адынаң академия театрынын сценазынзар А.Чапрайның хакас чоннын кип-чооғы хоостыра пазылған «Чанар Хус» ойынынаң сыхханнар. Аның режиссеры - Баатр Колаев.
- Пу чыл ирткен чоннар аразындағы «Науруз» фестивальда отысха чағын чайаачы ӧме араласхан. Пандемияның ӱчӱн Казах, Хырғыс, Туркмен, Узбек чир-леріндегі театрлар кил полбааннар. Пістің дее А.М.Топановтың адынаң Хакас драма театрының артисттеріне пандемияның хатығластарыох ӱчӱн парарға киліспеен. Баатр Колаев турғысхан М.Е.Кильчичаковтың «Алып Пил Тараан» ойыны Хазан городта онлайн кӧзіділген. Пілдістіг, хайдағ даа театр ойынын сценада кӧріп аларға хай-хай артых. Аннаңар «Читіген» театрыбыс пу фестивальға чӧр килгенін улуғ талаанға санирға чарир. Анда піс, позыбысты кӧзідіп, пасхазын кӧріп алғабыс, кӧп чапсых ниме алып алғабыс. Мындағ чорыхтар чииттерге уламох тузалығ. Пістің артизібіс Каскар Чаптыков пӱӱнгі кӱнде режиссерға ӱгренче. Ол, Хазанзар чӧріп, пу кӧстегҷе ідӧк асхынах нимес піліс алып алғаң - ӱлескен «Читіген» музыка-драма театрының устағҷызы Ирина Чустугешева.
Хайди ол аннаң андар чарытхан, тӱрк тілліг чоннарның 15-ҷі «Науруз» фестивальында артыхтарның артыхтары адалбааннар. Анда араласхан полған на театрның чайаачы ӧмезіне аарлығ сыйыхтар читірілген.
Фестиваль пасталғандох, тӧстегҷілер тееннер: «Наурузты» піс пӱӱл 15-ҷі хати иртірчебіс. Аннаңар опыдыбыс улуғ паза піске полған на театр аарлығ. Аның ӱчӱн прайзын таныхтирдаңар чарадығ алғабыс. Чайаачы ӧмелернің тоғызын паалирға тиксі тилекейдең чыылысхан критиктер, тізең «Науруз» фестивальдаңар, алынҷа театрлардаңар ӱндезіглерін театрлар чуртазына чарыдылған чоннар аразындағы, хазна синіндегі газета-журналларда паза социальнай сетьтерде сығарарлар», - теен Ирина Васильевна.
Чоохтирға кирек, «Читіген» театрның «Чанар Хус» ойынынаңар пастағы ӱндезіг пазыл парған. Аның авторы Москвадағы театр критигі Владислава Куприна полча. Мына аның танығларының хайзы-пірсілері: «...пу ойында «комикс», «нуар» жанрлар кӧрін парча, олох туста аны гангстерлердеңер ойын тиирге чарир. («Бригада» кинофильмнің оңдайы пілдір парча). Че, андағ даа полза, аны чапсых кӧрерге. Тиксі алза, пу ойын тилекейнең кӱс устапча тіп сағынчатхан бандиттердеңер. Кип-чоох,тізең іле кӧзітче - хыныс прай нимедең кӱстіг, аннаң пір дее ниме ас полбас...»
Сағынчабыс, «Читіген» театрдағылар тӱрчедең пасха даа критиктернің ӱндезіглерінең ӱлезерлер.
Хабарҷыларнаң тоғазығда чайаачы устар паза пір ӧріністерін искіргеннер. Сентябрь айда Чечен Республиканың Грозный городында Россия синіндегі «Федерация» театрлар фестивальы ӱзінҷі хати иртірілер. Аның афишазынзар «Читіген» театрның «Хубай - аңчы оолғы» ойыны киріл парған! «Алызығлар пол парбаза, піс андар ідӧк улуғ ӧрініснең пар килербіс», - тееннер олар.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде