ХАЙДАР ӰГРЕНЕРГЕ КІРЕРГЕ?
23.06.2021
Хабарлар
Абитуриент-2021. Хакасияның пӧзік паза ортын профессиональнай ӱгредіг организацияларында приемнай кампаниялар тоғынып пастабыстылар
Пӱӱл Н.Ф.Катановтың адынаң Хакас хазна университеді чииттерні 130 кӧстегче 1530 бюджет орнына кірерге хығырча.
- Пӱӱл абитуриенттердең пічіктер аймах оңдайҷа алылча: очно, Россия почтазынҷа, университеттің сайтынҷа паза Хазна полызығлары порталҷа, - чоохтапча приемнай комиссияның нандырығлығ хачызы Елена Майнагашева. - Пӧзік ӱгредіг программазынҷа ӱгренерге сагынчатханнарга пӱӱл приемнай комиссия тынағ кӱннері чох тоғынар, колледжтер субботада 13.00 часха теере, позырах - тынағ кӱні.
Бакалавриат паза специалитет программаларынха очно ӱгренерге сағынчатханнардаң пічіктер 29 июльға теере алылар, ХГУ-ның хоза сыныхтаан иртчеткен чииттерге пічіктерні 15 июльға теере ағыларға чарир. Ортын профессиональнай ӱгредіг организацияларын тоосхан паза университетте хоза экзамен тудар абитуриенттерге пічіктерін 17 июльға теере пир саларға кирек.
Магистратурада очно ӱгренерге сағынчатханнардаң пічіктер 20 июльға теере алылча, заочно - 9 августха.
Ортын профессиональнай ӱгредіғ программазын таллап алған чииттерге пічіктер алары 14 августха теере узарадылар, че университеттің хоза сыныхтаан иртерге кирек абитуриенттерге - 10 августха теере.
Бакалавриат программазын заочно таллап алғаннардаң пічіктер 2 августха теере алылар, экзамен тутчатханнардаң - 9 августха.
Н.Ф.Катановтың адынаң Хакас хазна университедінің филология паза культуралар аразындағы палғалыс институды хакас тілі ӱгретчілерін чыл сай тимнеп сығарча. Пӱӱл хакас кафедразы республиканың школаларына хакас тілі специалисттерін тимнирін аннаң андар узарадар.
- Тӧртінҷі чылы піс хакас тілі паза литература, англия тілі профильҷе специалисттерні тимнепчебіс. Пӱӱл піске тикке ӱгренӌең 25 орын пирілче. Ол уғаа чахсы.
Иң пастап хайығ салылар кӧстегліг оңдайнаң ӱгренерге сагынчатханнарға паза іҷе-паба чох халған чииттерге. Піссер ӱгренерге кірер ӱчӱн ЕГЭ сыныхтағлары киректелче - ол орыс тілі паза обществознание предметтернің салтарлары, хакас тілінҷе паза литератураҷа, тізең экзамен университетте иртірілер, тест оңдайынаң, - чоохтапча филология паза культуралар аразындағы палғалыс институдының хакас кафедразының устағҷызы Инга Кызласова.
Республиканың прай ортын профессиональнай ӱгредіг организацияларында приемнай кампаниялар ідӧк тоғызын пастабысты. Амғы туста Хакасияда пӱдіріг киреенің специалисттері паза профессионаллары улуғ кирексіністе. 9 паза 11 класстар тоосхан оол-хыстарға Ағбандағы пӱдіріг техникумы 150 бюджет орнын кӧр салған.
- 9 класс тоосханнарға техникумда мындағ профессиялар алып аларға чарир: «Мастер отделочных и декоративных работ» («штукатур», «монтажник каркасно-обшивных конструкций» квалификация), «Мастер по ремонту и обслуживанию автомобилей» («слесарь по ремонту автомобилей», «водитель» квалификация), «Электромонтажник электрических сетей и электрооборудования» («электромонтажник по кабельным сетям» квалификация) паза «Сварщик». Ідӧк пу профессияа 11 класс тоосханнарға ӱгренерге чарир.
Аннаң пасха, 9 класс тоосханнарға пістің техникумда мындағ специальностьтарха ӱгренерге чарир: «Строительство и эксплуатация зданий и сооружений» («техник» квалификация). Ахча тӧлеп «Право и организация социального обеспечения» («юрист» квалификация) піліс алып алар оңдай пар, - чарытча ӱгредіг организациязының директоры Владимир Огурцов.
Ағбандағы пӱдіріг техникумынзар ӱгренерге кірерге сағынчатханнарға мындағ пічіктер киректелер: аттестат, паспорттың хобырғаны, 4 сом (3*4), 086-у формаҷа имнег справказы. Пу пічіктерні техникумзар (Ағбан г., Кировтың ор., 254) ағыларға кирек алай ба ӱгредіг организациязының электроннай почтазынзар ызарға:
ast@r-19.ru, goupu659@mail.ru
Ағбандағы коммунальнай хоных паза сервис техникумы ідӧк 9 класс тоосхан чииттерні сағыпча. Анда тикке паза ахча тӧлеп ӱгренерге чарир. Бюджет орны - 225.
Техникумда аймах пӱдіріг специальнозын алып аларға чарир. Абитуриенттер хоза экзамен тутпастар, аттестаттың ортын баллы санға алылар. 11 класс тоосханнарға тӧлеп ӱгренең 25 орын пар. Чииттер чӧптезіг хоостыра 10 ай ӱгренерлер, мындағ профессияча «Мастер столярного и мебельного производства».
Пу чылдаң пасти кирек пічіктерні электроннай почта пастыра ызарға чарир: priem@tehnikum19.ru
Сурығларнаң айланарға чарир пу телефоннарҷа: 8(3902)34-25-54, 8(3902)34-19-78.
Асхыстағы 18 № профессиональнай училищеде абитуриенттерге ӱс профессияа паза пір специальностьха ӱгреніп аларға чарир. 9 класс тоосханнарға 100 бюджет орны пирілче.
Училищеде чииттерге республиканын істеніс рыногында киректелчеткен профессиялар алып аларға чарир - ол автомобиль тыхтаҷаң ус, ас-тамах тимнеҷең ус паза пӱдіріг кирее. Ідӧк пу чылдаң пасти «сестринское дело» специальностьха ӱгреніп алар оңдай пар.
- «Сестринское дело» специальностьха 25 бюджет орны кӧріл парған. Аның кирексінізі улуғ полтыр. Аттестат мариинаң пасха, ідӧк чоохтазығ полар паза тест иртірілер. Чоохтазығда Асхыс аймааның ӧӧн имнег туразының ӧӧн имҷізі аралазар. Пу специальностьха кіріп алған студенттер училищеде ікі чыл ӱгренерлер, анаң Харатастағы садығ паза сервис технику-мында ӱгредиин узарадарлар, - чоохтапча училище директорының тоғызын толдырчатхан Игорь Чебодаев.
Абитуриенттердең пічіктер 14 августха теере алылар. Сурығларнаң айланарға чарир пу телефонча: 8(39045)9-15-57.
Автор :
ОКСАНА СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде