ЧАЙААЧЫ УСТАР, ЧЫЫЛЫЗЫП, ПІЛІСТЕРІНЕҢ ӰЛЕСКЕННЕР
23.06.2021
Хабарлар
Семинар. Ирткен неделяда, хандых айының 17-18 кӱннерінде, Ағбанда регионнар аразындағы «Сойан-Алтай чоннарының кибірліг чайаачы узанызы» семинар ирткен
Семинарны иртірген «Сойан-Алтай чилегеліг чоннарның культура кіні» регионнар аразындағы халых организациязы. Аннаң устапча Юлия Тиникова. Ол семинар иртірерге 500 муң салковайға президент грантын утып алған.
Пу улуғ чыылығ Н.Г.Доможаковтын адынаң национальнай библиотеканын 6-7 хадылларында ирткен. Тувадаң, Тағлығ Алтайдаң, Шориядаң килген устар постарының чайаачы тоғыстарын кӧзіткеннер. Хакасиядаң мында араласханнар Галина Костякова, Зульфия Тодыкова, Андрей Мамышев паза Владимир Ачитаев. Костякованаң Тодыкова ӧӧніңде кӧклӧлер паза поғолар хоостап тікчелер. Мамышевнең Ачитаев ағастаң кирткен айахтар паза чірчелер кӧзідіге сығартырлар. Чоохтирға кирек, Владимир Ачитаев саблығ ағас узы Николай Ачитаевтің чеені полтыр. Владимир амды пабазынаң хада Николай абаазының ағас узанҷан чолын пасчалар. Олар Пии аймаандағы Улуғ Нонып аалда чуртапчалар.
Андрей Мамышев Ағбанда Н.Ф.Катановтың адынаң национальнай гимназияда тоғынча. Андағы олғаннарны ағастаң ниме-ноо чазирға ӱгретче. Пір ӱгренҷізі Олег Домогашев амды ХГУ-да студенттерні пуох кирекке ӱгретче.
Национальнай библиотеканың 7-ӌі хадылында семинарға килген аалҷыларның чайаачы ниме-нооларының кӧзідии полған. Мин пастап Тувадағы устарның кӧзідиинең танысхам. Тувадаң пеер пис ус кізі килген. Оларның устағҷызы полған Айлана Балган Арыш-Ооловна. Аннаң хада полғаннар тас киртчең устар Эдуард Лопаа паза Айдың Хомушку, ідӧк национальнай кип-азахтар тікчең устар Джамилия Коол паза Эльвира Ооржак.
Туваның ӧмезі пеер килер алнында Алтай чирінде пір неделяҷа полтыр. Анда «Бирюзовай Катунь» Россия синіндегі фестивальда араластырлар. Постарының сувенирлерін кӧзіттірлер. Хакасияда ам ӱзінҷі хати пол пардылар. Алында 2018-2019 чылларда Юлия Константиновнаның кӱстенгенінең мындағох семинарлар ирткеннер. Пылтыр ла коронавирус ағырығ сылтаанда чыылыспин салғаннар.
Тағлығ Алтайдаң килген аалҷылар киистең соххан кибістерні паза тойдаң чайап салған ідіс-хамысты кӧзіткеннер. Алтайда сувенирлер чайапчатхан тоғыс хайди парчатханнаңар чоохтап пирген гончар ус Сергей Кергилов. Ол позы тархын ӱгретчізі полтыр. Анаң пабазынаң тойдаң ырағалар, айахтар паза чірчелер идерге ӱгреніп алтыр. Амды ол позының пу киреене Горно-Алтайсктағы олған хоос школазында ӱгрет парча. Алтайзар аймах чирлердең туристтер кил парчалар, аннаңар сувенирлер табырах садыл парча.
Тағлығ Шориядаң килгеннер Елена Яснур паза Ирина Воропаева. Олар кічиҷек кӧклӧҷектер паза батик оңдайынаң сырлаан платтар ағылтырлар. Столда национальнай кӧрімніг пурбалар паза монҷыхтар чатхлааннар. Кӧңнілеріне кірген нимелерні кізілер садызып ал тур-ғаннар.
Семинар азылчатханда, чыылысхан устарзар алғыстас сӧзінең айланған Хакасияның национальнай паза территориальнай политика министрі Михаил Побызаков. Ол мыңдағ семинарлар киректеңер паза чонның кибірліг чайаачызына чииттерні ӱгредердеңер таныхтаан. Анаң устар постарының пілістерінең ӱлезерге алынҷа пӧліктерге чарылғаннар.
Автор :
Илья ТОПОЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде