Ӧңнiг кiрпистер – прай Сибирьге
23.06.2021
Хабарлар
Харатас городта «Колизей» кiрпис заводы орныхча. Тура тастына кiрпистiң сығарызынаң Хакасия пазының орынҷызы Ирина Войнова, республиканың экономика тилiзi министрi Виктор Богушевич танысханнар.
Завод чирiнзер кiрзӧк, тимде кiрпистернiң аймах ӧңнерiне хайығ айландырчазың. Минi аппағас кiрпис хайхатхан. Пiс кӧнiк парғабыс кiрпистiң тойдаң идiлчеткенiне. «Колизей» заводта кiрпис сала пасха оңдайнаң сығарылча. Кӧзiдiмге, ах кiрпистi сығарарында оохталған мрамор паза хырығ озаринаң читiрiлчеткен ах ӧңнiг цемент тузаланылча. Оларны пораластырған соонаң, мындағ ах ӧңнiг кiрпис сых парчаттыр. Пӱӱнгi кӱнде Ағбан городтың Ленин орамазында ах паза кӱрең ӧңнiг кiрпистердең кӧп квартиралығ тура турғызылча.
Республика правительствозының делегациязы кiрпис сығарызынаң тиксi танысханнар: мрамор паза тас унатчатхан, пӧлчеткен комплекстiң, кiрпис сӱзӱнiн поралапчатхан паза аны пасчатхан, чылбыраңнатчатхан тирiглернiң тоғызынаң, iдӧк оор камеразында тудылчатханынаң. Тоғыстың ӧӧн чардығы тирiглер полызиинаң толдырылча, че тимде кiрпистi холдаң таллапчалар. Андағ оңдайнаң оор кӱзiнең пик полбаан, чiктелген алай сiс парған кiрпистернi хыйа итчелер. Прай пу искiрiгнең делегацияны заводтың коммерческай устағҷызы Вячеслав Солянков таныстырған. Чылда завод ортымахти 10-12 миллион кiрпис сығарча, че тиксi сығарыс пӱдiрiг компанияларның чахиинаң палғалыстығ. Завод сығарчатхан кiрпис туралар пӱдiриине ле нимес, че iдӧк олған садтарын турғызарында тузаланылча.
– Завод iдӧк плитка сығарызынаң айғасча. Аның сығарызын иптеп аларынҷа улуғ тоғыс толдырылған. Салтарында, тиксi Россияда пастағызын на Ағбандағы Преображенскай паркта (пӱӱл ол тыхталча – ред.) чылбыраңнадылған плитка тӧзелер, - чарытхан коммерческай директор.
Ирина Войнова, завод тоғызынаң танызып, пу заводтың оой нимес чолын чарытхан. 2012 чылда тоғынып пастаан завод ӱс чыл пазынаң санға турған орнын, Харатас городты, Тағлығ Алтайға алыстырған. Сылтағ пiр ле полған: налог служба органнарының тоозылбас-парбас сыныхтағлары. Пӱӱл предприятие хатап тӧреен чирiнзер айланды. Аның ӱчӱн улуғ чӧптезiг тоғыстары апарылған. Андағ сурыныснаң Харатас город пазы Василий Белоногов, республика правительствозының кiзiлерi айланғаннар. Санға алылған орынны алыстырарға iдӧк полысхан сыныхтағларны иртiрерiнҷе сылтағлар поларға киректелчеткеннеңер федеральнай чарадығлар. Амды налог службазы даа, предприятие сайбағлар чох тоғынчатса, пос хынғанни аны сыныхтап полбас.
- Олох туста Хакасия инвестицияларны тартчаң оңдайларҷа тиксi хазнада рейтингiн кӧдiрiп алған: 77 орыннаң 26-ҷаа! Иң пастағызын, инвесторларға налог тӧлеҷең оңдайлар нииктелген, - теен Ирина Ивановна. – «Колизей» заводты алза, ол пӱӱнгi кӱнде 60 процент кӱзiнең не тоғынча. Толдыразынаң тоғынар прай оңдайы пар. Пiс сығарчатхан ниме-нооларына сертификаттар аларға паза льготалығ кредит аларға хабазығ пирербiс.
Таарлағ машиналары, тiзең, ӧңнiг кiрпистi тиксi Сибирьнiң ӧӧн городтарынзар читiрчелер: Хызылчарзар, Хызылзар, Новосибирсксер, Томсксар, Кемеровсар паза пасхазынзар. Ағбанда, тiзең, прай даа пӱдiрiг компаниялары тура тастын «Колизейнiң» кiрпизiнең салчалар. Пу городтар Хакасияда сығарылған кiрпис сылтаанда ӧсчелер тиирге чарир.
Автор :
Наталья Субракова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде