ӦҢНІГ КІРПИСТЕР - ПРАЙ СИБИРЬГЕ
25.06.2021
Хабарлар
Тоғыс чорығы. Хакасия пазының орынҷызы Ирина Войнова Харатас городтағы «Колизей» кірпис заводында пол килді
ХАРАТАС ГОРОДТА «КОЛИЗЕЙ» КІРПИС ЗАВОДЫ ОРНЫХЧА. ТУРА ТАСТЫНА КІРПИС СЫҒАРЫЗЫНАҢ ХАКАСИЯ ПАЗЫНЫҢ ОРЫНҶЫЗЫ ИРИНА ВОИНОВА, РЕСПУБЛИКАНЫҢ ЭКОНОМИКА ТИЛІЗІ МИНИСТРІ ВИКТОР БОГУШЕВИЧ ТАНЫСХАННАР.
Завод чирінзер кірзӧк, тимде кірпистернің аймах ӧңнеріне хайығ айландырчазың. Мині аппағас кірпис хайхатхан. Піс кӧнік парғабыс кірпистің тойдаң иділчеткеніне. «Колизей» заводта кірпис сала пасха оңдайнаң сығарылча. Кӧзідімге, ах кірписті сығарарында оохталған мрамор паза хырығ озаринаң читiрiлчеткен ах ӧңніг цемент тузаланылча. Оларны пораластырған соонаң мындағ ах ӧңніг кірпис пол парчаттыр. Пӱӱнгі кӱнде Ағбан городтың Ленин орамазында ах паза кӱрең ӧңніг кірпистердең кӧп квартиралығ тура турғызылча.
Республика правительствозының делегациязы кірпис сығарызынаң тиксі танысхан: мрамор паза тас унатчатхан, пӧлчеткен комплекстің, кірписті тимнепчеткен, чылбыраңнатчатхан тиріглер тоғызынаң, ідӧк оор камеразында тудылчатханынаң. Тоғыстың ӧӧн чардығы тиріглер полызиинаң толдырылча, че тимде кірписті холнаң таллапчалар. Андағ оңдайнаң оор кӱзінең пик полбаан, чіктелген алай чарыл парған кірпистерні хыйа итчелер. Прай пу искірігнен делегацияны заводтың коммерческай устағҷызы Вячеслав Солянков таныстырған. Чылда завод ортымахти 10 - 12 миллион кірпис сығарча, че тиксі сығарыс пӱдіріг компанияларның чахиинаң палғалыстығ. «Колизей» завод сығарчатхан кірпис туралар пӱдіриине ле нимес, че ідӧк олған садтарын турғызарында тузаланылча.
- Завод ідӧк плитка сығарызынаң айғасча. Аның сығарызын иптеп аларынҷа улуғ тоғыс толдырылған. Салтарында, тиксі Россияда пастағызын на Ағбандағы Преображенскай паркта (пӱӱл ол тыхталча. - ред.) чылбыраңнадылған плитка тӧзелер, - чарытхан коммерческай директор.
Ирина Войнова, кірпис заводы тоғызынаң танызып, аның оой нимес чолын чарытхан. 2012 чылда тоғынып пастаан завод ӱс чыл пазынаң санға турған орнын, Харатас городты, Тағлығ Алтайға алыстырған. Сылтағ пір ле полған: налог службазы органнарының тоозылбас-парбас сыныхтағлары. Пӱӱл предприятие хатап тӧреен чирінзер айланды. Аның ӱчӱн улуғ чӧптезіг тоғыстары апарылған. Андағ сурыныснаң Харатас город пазы Василий Белоногов, республика правительствозының кізілері айланғаннар. Сыныхтағларны иртірер ӱчӱн сылтағлар киректелчеткеннеңер федеральнай чарадығлар алылғаны ідӧк санға алылған орынны алыстырарға полысхан. Амды налог службазы даа предприятие сайбағлар чох тоғынчатса, пос хынғанни аны сыныхтап полбас.
- Олох туста Хакасия инвестицияларны тартчаң оңдайларҷа тиксі хазнада рейтингін кӧдіріп алған: 77 орыннаң 26-ҷаа! Иң пастағызын, инвесторларға налог тӧлеҷең оцдайлар нииктелген, - теен Ирина Ивановна. - «Колизей» заводты алза, ол пӱӱнгі кӱнде 60 процент кӱзінең не тоғынча. Толдыразынаң тоғынар прай оңдайы пар. Піс сығарчатхан ниме-нооға сертификаттар паза льготалығ кредит аларға хабазығ пирербіс.
Таарлағ машиналары, тізең, ӧңніг кірписті тиксі Сибирьнің ӧӧн городтарынзар читірчелер: Хызылчарзар, Хызылзар, Новосибирсксер, Томсксар, Кемеровсар паза пасхазынзар. Ағбанда, тізең, прай даа пӱдіріг компаниялары тура тастын «Колизейнің» кірпизінең салчалар. Пу городтар Хакасияда сығарылған кірпис сылтаанда ӧңненчелер тиирге чарир.
Автор :
Наталья БОРГОЯКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде