ПІРДЕЕЗІ УНДУЛБАС
25.06.2021
Хабарлар
Ада чаа пасталыбысхан. Пу кӱнде Россияда, ол санда Хакасияда, чаа тузында чуртазын пир салған прай кізілерні сағысха кирчелер
Пістің хазнаның тархынында 22 июнь - иң хорғыстығ, иң чобағлығ кӱннернің пірсі. Пу кӱнде фашисттердең тоғыр Илбек Ада чаа пасталған. Совет Союзының прай чоннары чабал ыырҷыдаң тоғыр пірге кӧдірілгеннер. Чідіріглерібіс кӧп полған. Ам чыл сай пу кӱнде чаада чат халғаннарны, фашисттернің концлагерьлерінде ирееледіп ӱрееннерні, тылда ӧзӧгіп тоозылғаннарны сағысха киріп, чобалчабыс. Чир-суубысты арачылап, чуртазын пир салған матырлар алнында піс тӧлеп полбас алымнығбыс.
Хумартхылас паза чобағ кӱнінде тиксі Россияда «Сым турар минута» акция иртче. Пістің республика ідӧк ол акцияа хозылча. 22 июньда 16.00 часта (Москвада - 12.00) Ағбанда Чиңіс паркындағы Успас отсар республика Правительствозының паза Оӧркі Чӧбінің устағҷылары, организацияларның, кӱс структураларының кізілері, Хакасия чуртағҷылары чахайахтар салғаннар.
Илбек Ада чаада Хакасияның чідіріглері уғаа улуғ полған. Фронтсар чаалазарға республикадаң 70 муңҷа кізі парған, чарымы чаадаң айланмаан. 15 муң азыра чааҷы сағба чох чіт парған.
Пу Хумартхылас кӱнні Россияның президенті 1996 чылда позының указынаң турғысхан. Аны хоостыра 22 июньда Россияның хазна флагтары тӧбін тӱзірілчелер, культура учреждениелерінде, телевидениеде паза радиода ӱтертістіг мероприятиелер паза кӧзідіглер иртірілбинчелер.
Амғы пандемия тузында Хумартхылас паза чобағ кӱніне чарыдылған мероприятиелер онлайн-режимде ле иртірілчелер. Андағ мероприятиелернің пірсі - тиксі Россияда иртчеткен «Хумартхылас свечізі» акция. Аны хоостыра
чуртағҷылар 22.00 часта кӧзенек алнында свечі тамысчалар.
80 чыл мының алнында пасталған иң хан тӧгістіг чаадаңар мағаа пасха кізілердең истерге кирек чох полча. Минің пабам чаа пасталғаннаң сығара ол тоозылғанҷа чааласхан. Фашисттер сібееге айландырған Кёнигсберг городты штурмнаң аларында араласхан. Аның орден-медальлары кӧксіне толдыра полған. Іҷем, тыл істенҷізі полып, кӧп пала ӧскірген. Хайди чаа тузында хызығып, ӧзӧгіп чуртааннарынаңар харах чазы чох сағысха кирерге сидік.
Мындағ чобағ ағылған пістің чоныбысха 22 июньда фашист Германиязы пастаан Илбек Ада чаа. Постарына айабин, Чир-суубысты ал халған матырлар пістің хазнада хаҷан даа ундулбастар. Сабланыс оларға хаҷанға даа!
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде