РЕСПУБЛИКА БЮДЖЕДІНІҢ СУРЫҒЛАРЫ ӰЗӰРІЛДІ
25.06.2021
Хабарлар
Тоғазығ. Хакасия пазы Валентин Коновалов Москвадағы тоғыс чорығында ікі тоғазығ иртірді
Пастағы тоғазығ 22 июньда Сибирьдегі федеральнай округча Росфинмониторингтің регионнар аразындағы управление пастығы Николай Буймовнаң хада ирткен.
«Пістің республикада нацпроекттерце турғызылчатхан пӱдіріглернің сурығларын, ол сан да Россияның ахча сыныхтаанҷа федеральнай служба тузаланчатхан оңдайларны, ӱзӱргебіс», - пасча Валентин Коновалов социальнай сетьтердегі пӧліктерінде.
Хакасия правительствозы, хазнаның пасха регионнарының опыдынаң тузаланып, пӱдіріг тоғыстарын паза подрядчиктерні тӧреміл сыныхтапча, толдырылған тоғыстарны паза аймах кӧзідіглерңе пӱдіріг тоғыстарына чӧптезіглер пааларын паалирынҷа тоғыс апарча.
Республика правительствозы наа школалар, олған садтары паза чонға кирек пасха пӱдіріглер ахча саринаң сайбағ чох турғызыларынаңар сағыссырапча. Николай Анатольевич национальнай проекттерні чуртасха киреріне позыдылчатхан ахчаның тузаланылчатханын сыныхтирға хабазарға тимде.
Ікінҷі тоғазығ Федерация Чӧбінің бюджетче паза ахча рыногынҷа комитет кнезі Анатолий Артамоновнаң хада ирткен. Ол тоғазығда ідӧк Хакасия правительствозының Москвадағы тӧреміл кізізі, республика пазының орынҷызы Юлия Исмагилова араласхан. Пастыхтар 23 июньда тоғасханнар.
Пу тоғазығның ӧӧн сурығлары - Хакасия бюджедін тиңнирінңе сурығлар, пӱӱнгі кӱнде Россия субъекттерінің бюджеттеріне федеральнай кіннең читірілчеткен хабазығ оңдайлары, регион бюджеттерін тиңниріне дотацияларның ӱлестірҷең оңдайларын алыстырары.
«Пістің республика бюджедінең палғалыстығ ӧӧн пӧгіннердеңер паза сидіксіністерні искір пиргем, пос парыстарын ӧскірерінҷе паза хорадығларны хызырарынҷа Хакасия правительствозы чуртасха кирчеткен кӧстеглерні чарыт пиргем. Анатолий Дмитриевич хазнаның нинҷе-де субъектіне, ол санда Хакасияа, бюджетті тиңнирінҷе сидіксіністерні пӧгерге хабазарға тимде, кӧзідімге, регион бюджеттерін тиңниріне дотацияларны ӱлестірҷең оцдайларны алыстырардаңар сурығҷа (ол алынңа регионның оңдайларын санға алар ӱчӱн паза сала сын полар ӱчӱн)», - пасча республика пазы.
Хакасия пазы Валентин Коновалов Москвадаң пӱӱн айланарға кирек.
Автор :
Тимнеен Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде