ЧАХСЫ САЛТАРЛАРҒА ІЗЕНЧЕЛЕР
30.06.2021
Хабарлар
Табығлар-2021. КПРФ-таң Хазна Думазы депутаттарына табығларға кемнер кандидаттарға сығарылча паза партияның Москвада ирткен съездінің салтарларынаңар
Пу сурығларны чарыт пиргеннер 28 июньда «Хакасия» газета редакциязында ирткен пресс-конференцияда Оӧркі Чӧп депутаттары Григорий Назаренко, Оксана Разварина паза Валерий Старостин. Хайди олар чоохтап пиргеннер, 24 июньда Москвада КПРФ съезді ирткен. Аның салтарларынӌа Россияның сигізінӌі хығыртии Хазна Думазы депутаттарына табығларға кандидаттар табылған.
- Сірернің алныңарда ол санзар кірчеткен ӱс кандидат одырча, - искірген Григорий Назаренко. - Хомзынысха, мында прайзы нимес. Назаренконың чооғынаң, КПРФ съезді салтарларынӌа партияның Хакасияны, Хызылчар крайын паза Томск облазын піріктірчеткен региональнай ӧмезінең Хазна Думазы депутаттарына табығларға 10 кізідең пӱтчеткен партия списогы тимнелген. Ол ӱс регионнаң сығарылған 10 кізінің тӧрті Хакасиядаң: Валентин Коновалов, Григорий Назаренко, Евгений Сафьянов паза Оксана Разварина. Валерий Старостин, тізең, Хазна Думазы депутадына пір мандаттығ округча сол кӧрістіг партияларның кандидады полча.
Хайди чарытханнар пресс-конференция араласчылары, Хакасияның пазы Валентин Коновалов партия списогынзар кирілген, че ол регион устағӌызының тоғызын тастирға пӧгінминче. Мындағ ниме партия списогының улуғлазын кӧдірер пӧгіннең иділче. Партия списогынзар пасха даа коммунист устағӌылар кірген: Новосибирск мэрі Анатолий Локоть, Орлов облазының губернаторы Андрей Клычков. Пасха даа партиялар мындағ оңдайнаң тузаланчалар нооза.
КПРФ партиядағылар пу табығлардаң чахсы салтарлар сағыпчалар, утып аларларына ізенчелер.
- Піс пӧзік салтарларға ізенчебіс, - таныхтаан Григорий Назаренко. - Анзы табығӌылар піске хабасчатханынаң пістің «хызыл губернатор» полғанынаң палғалыстығ.
Оксана Разварина олар пу табығларға піріктірілген кӱснең, халых пірігістерінең паза сол кӧрістіг пасха партияларнаң хада, парчатханы хоза ізеніс пирчеткенін таныхтаан. Валерий Старостин КПРФ съездінеңер халған сағыстарынаң ӱлескен.
- Мин партия съездтерінде пастағызын на араласпинчам, че КПРФ съездінде пастағызын на полғам, - таныхтаан ол. - Ниме минің кӧңніме кірген: прай чоохтар хысха паза кирек хоостыра полғаннар.
Съездте ідӧк КПРФ-тың табығларға сығарылчатхан федеральнай списогы чарадыға алылтыр. Ол 15 кізідең пӱтче тіп искірген Назаренко. Пастағы ӱс кізізі: партия устағӌызы Геннадий Зюганов, Хазна Думазының депутады Светлана Савицкая паза «Лениннің адынаң совхоз» ЗАО директоры Павел Грудинин.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде