УЛУҒ ПІЛІСТІГ ӰГРЕТЧІ, МАҢАТ ХОНӋЫХ
30.06.2021
Хабарлар
Пістің ӧбекелерібіс орта таныхтаҷаңнар: аалҷының ады, аал-хонҷыхтың харны. Пасха сӧстернең чоохтаза, хайдағ даа аарлығ аалҷы киліп, парыбысча, аал-хонҷыхнаң сыбыра хада полчазың. Аннаңар пір аалдағылар удур-тӧдір чахсы пілісчелер, ӧріністе дее, хомзыныста даа хадалар.
Алғыстастар. Россияның саблығ ӱгретчізі Владимир Ильич Карачаковтың 70 чазын таныхтап, пістің газетаның 44 №-де Анатолий Султрековтың аның чуртас чолынаңар пазылған «Ӱгренҷілерінің харахтары чылтырасчаң» материалы сыххан. Амды Владимир Ильичтің чир-суғҷылары сӧс алчалар
Надежда Константиновна Конгарова:
- Владимир Ильич Карачаковты уғаа чахсы, ізестіт хонҷыхха санапчам. Хада хонғаны Галина Фёдоровнанаң ікі турысгығ оол ӧскір салғаннар.
Тоғыс саринаң даа аны махтирға ла кирек. Иң пастап ол позы уғаа нандырығлығ тудынча, пас-хазынаң даа андағ хайығ, тимненіс кирексіпче. Минің кӧңніме кірчең хайди ол азых уроктарын пӧзік синде иртірчеткені. Андағох оңдайнаң ол класс частарына чахсы тимнен салчаң.
Клара Митрофановна Толмачева:
- Владимир Ильич школада чахсы ӱгретчі паза класс устағҷызы чіли сыбыра махтаға сыхчаң. Уроктарны паза класс частарын иртіреріне уғаа нандырығлығ хайчаң.
Спортнаң айғазарға хынҷаң волейбол паза шахмат чахсы ойначаң. Школада шахмат кружогын тӧстеп алған. Аның ӱгренҷілері аймах марығларда араласчаңнар, сыйыхтығ орыннарға сығып алчаңнар, ибзер Аарластығ пічіктіг айланҷаңнар.
Хада тоғынчатханнарға аны-мыны тимнебізерге, стенгазета сығарыбызарға хабас пирчең. Аның ӱчӱн Владимир Ильич школада даа, аалда даа аарласнаң тузаланҷаң.
Вера Борисовна Балгазина:
- Аны позының тоғызында пӧзік пілістіг, ырах кӧрістіг, тирең сағыстығ ус тіп санирға чарир. Ол палаларның на нимес, ідӧк чиит специалисттернің дее чахсы ӱгретчізі полча. Хайди тидірлер, ағаа чоохтаанча ла, сах андох позына пирілген чахығны хайди табырах паза тӱзімніг толдырыбызардаңар сағын сыхча. Пірдең ол аны позы оңдайынча тимнебізерге харасча. Школада чалахай иирлер, тузалығ тоғазығлар иртірібізерге кӱс кізі полғанын пілчебіс.
Хайда даа тоғынчатса, ӱгретчі бе, школа директоры ба, аал чӧбінің пазы ба, аның пасгағы сағыссыразы кізілердеңер полған. Чир-суғҷыларына хайди-да полыс пирерге, чуртас оңдайларын чахсыландырарға харасчаң. Олох арада алынҷа кізілердеңер, ӱгренҷілерінеңер ундутпаҷаң. Іди пархаҷағым Сашаа орыс тілін ӱгренерге оой ла полбаан. Піс Владимир Ильичті ағаа полыс пирерге сурынғабыс. Ол ынабысхан, Сашанаң хада уроктар соонда халҷаң орыс тіліне ӱгретчең. Андағ кӱстеніс тикке парбаан, пархаҷағыбыс аймах марығ-олимпиадаларда аралас сьххан, сыйыхтарнаң даа таныхталҷаң. Школада, тізең иң чахсы ӱгренҷілер санында адал сыххан.
Ильич, син - ир! Худай сағаа пик хазых пирзін, узах чуртас сыйлазын.
Клавдия Константиновна Кокова:
- Піс Владимир Ильичнең хада ӱрдең пеер хости чуртапчабыс. Уғаа маңат хонҷых тиирҷікпін. Тоғас парза, хазиибыстаңар, хайди чуртапчатханнаңар сурастырғлап алча, ипти чоохтасча. Пірее хайдағ полызығ кирек полза, сах андох хабас пирерге маңзырир. Аннаңар даа піс прайзы аны улуғлапчабыс, пасхазының даа андағ маңат хончых ползын тіп сағынчабыс. Чахсы кізі.
Анна Подкопаева:
- Мин Владимир Ильич Карачаковтың ӱгренҷізі полчам. Піс аны алғым пілізі, тирең сағызы, ырах кӧрізі ӱчӱн тың улуғлапчабыс. Ниме дее сурзабыс, ол сах андох прай чарыда чоохтап пирер, толдыразынаң нандырар. Аннаң тіл алызарға уғаа хынығ паза тузалығ. Че позының предметтерінҷе урок апарчатса, уғаа хатығ тудынча, прайзынаң тиң сурча.
Валентина Павловна Беляева:
- Ол - Россияның саблығ ӱгретчізі. Мындағ аарластығ атха турысханы Владимир Ильичті прай даа чахсы саринаң таныхтапча. Полған на ӱгретчее андағ часкалығ ӱлӱс киліспинче.
Хаҷан ол аал чӧбінің пазына кандидатнаң сыхханда, піс, аның прай хонҷыхтары, Владимир Ильичтің ӱчӱн тоғыс апар сыххабыс. Пістің кӱстенізібіс тик чирге парбаан, чағбан чӱректіг хонҷиибыс аал чӧбінің пазына ирте халған.
Аарлығ хонҷиибыс, хада тоғынчатхан арғызыбыс, пайрамнығ тӧреен кӱнің читкенде, пик хазых, узах час алғапчабыс. Сағынған сағыстарың прай толзын, айас кӱн чарии ӧрініс ағыл турзын. Піс, хончыхтарың паза хада тоғынчатхан арғыстарың кирек полза, хабас-полыс пирерге хаҷан даа тимдебіс.
Николай Александрович Танбаев:
- Сала даа ікінҷілебинчем, Владимир Ильич пістің не аалда нимес, тиксі Алтай аймаанда паза Хакасияда саблығ кізі, неке. Аршаннар аалның халых-чарыдығлығ чуртазында ол уғаа ӧткін араласча. Пос кӧңнінең ойыннар турғысчатхан чайаачы ӧмезер хынып чӧрче. Олар чон алнынзар удаа сыхчалар, постарының устарын кӧзітчелер.
Ағаа хоза, Россияның саблығ ӱгретчізі полчатхан Владимир Ильич Карачаков спорт марығларында сыбыра араласча. Ол теннис, волейбол, бильярд ойнирға тартылча. Че иң хынчатхан спорт кӧрімі шахмат полча. Шахматча ол республика синіндегі дее марығларда араласча, сыйыхтығ орынға даа сығып алча. Аалдағы ортымах школада шахмат кружогын тӧстеп алған. Аның ӱгренҷілері республика синіндегі марығларда араласчаңнар, махтатчаңнар.
Хаҷан мині Аршаннар аал чӧбінің пазына тапханнарында, сала даа ікінҷілес чох аны позымның полысчызына алып алғам. Андағ чарадиима соонаң сала даа хомзынарға киліспеен.
Пайрамнығ тӧреен кӱні ирт тее парған полза, Владимир Ильичке пик хазых, часкалығ хоных паза спорт марығларында чиңістер тударға алғапчам.
Вера Фадеевна Саражакова:
- Хаҷан Владимир Ильич аал чӧбінің пазына табылғанда, кинектер пірігізінің тоғызына сыбыра хайығ салҷаң оңдай табылза, полызығ пирерге харасчаң. Ол пісті Алтай аймаа паза республика синінде иртірілчеткен спорт марығларына ал чӧрерге кӱстенҷең. Позы даа арға-мӧрійлерде араласчаң шахматча паза орыс шашказынҷа чиңістер дее тутчаң. Ідӧк ол аймах, республика синінде иртірілчеткен «Позыңа киртін» чӧрімде араласчаң кибелістерін хығырчаң.
Піс ағаа часкалығ хоных, пик хазых, хыйғаҷах пархаҷахтар алғапчабыс.
Автор :
Улуғ аарласнаң Аршаннар аал чӧбінің ветераннар паза кинектер пірігістері
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде