ӰГРЕНЕРГЕ, ӰГРЕНЕРГЕ ПАЗОХ ӰГРЕНЕРГЕ
21.07.2021
Хабарлар
Тоғазығ. Хакасия пазы Валентин Коновалов «Кванториум» технопаркта пӱӱл пірге хазна сыныхтағларын 100 баллға тудыбысхан оол-хыстарнаң тоғасхан
РЕСПУБЛИКАНЫҢ ПОҒДАРХАЗЫ
Чыл сай хазна сыныхтағлары соонаң Хакасия пазы экзаменнерні иң чахсы тудыбысхан чииттернең тоғасча. Пӱӱл республикада тиксі 18 оол-хыс орыс тілі, математика, тархын, обществознание, химия, биология, география, англия тілі предметтерҷе ЕГЭ-ны иң пӧзік баллға тудыбысхан. Олар аймах-пасха аал-городтарның чиит чуртағҷылары полчалар.
Сыныхтағлар соонаң школаны наа ла тоосхан оол-хыстар, аттестаттарын холға алып, хазнабыстың кічіг-улуғ городтарынҷа тарас парыбысчалар. Аннаңар Валентин Олеговичнең тоғазығда 14 ле выпускник араласхан.
Таныхтирға кирек, араласчыларның кӧңні кӧдірілік полған. Олар чуртастарындағы алызығларны чидікпин сахтааннар.
Киҷеегі ӱгренҷілер Хакасия пазына сурығлар туртухпин пиргеннер. Валентин Коновалов, оол-хыстарзар айланып, таныхтаан:
- Сірер, пӱӱл школа тоосчатхан чииттерібіс, пістің республикабыстың поғдархазы паза алтын чыындызы полчазар. Кӧп кӱс салып паза чахсы тимненіп, сірер аймах предметтерҷе 100 балл холға киргезер. Пандемия тузында ӱгредіг системазына кӧп ағырсымнығ сурығ пӧгерге киліскен. Че, андағ даа полза, школа тоосчатхан ӱгренҷілер, прай сидіксіністерні турыстығ тобырып, экзаменнерге чахсы тимненібіскеннер. Аның ӱчӱн мин улуғ алғызым сірерге паза ӱгретчілеріңе читірчем. Ӧріністіг, пістің регионда чылдаң чылға асхынах нимес ӱгренчі 100 балл холға кирче. Ол республикадағы школаларда ӱгренчілерге пӧзік піліс пирілчеткенін кӧзітче.
Ідӧк алынча улуғ алғыс читірчем ӱгретчілерге. Олар ӱгренчілерні кӱннің сай сыныхтаға тимнееннер. Олғаннарның пілістерін сыныхтап, улуғ тоғыс апарғаннар, ӱгренҷілері ӱчӱн чӱрексееннер. ЕГЭ-ға тимненіп, сірерге, аарлығ ӱгретчілер, кӧп сидіксіністерні тобырарға киліскен. Олғаннарны экзаменнерге чахсы тимнеен сылтаанда олар мындағ пӧзік чидіге читкеннер. Ӱгренҷілернің пӧзік баллары - ідӧк ӱгретчілернің чидии Пӱӱл Хакасия пазынаң тоғазығ иртчеткенде, киҷеегі ӱгренҷілер ағаа аймах сурығлар пиргеннер. Олар ЕГЭ хайди ирткеннеңер чоохтап пиргеннер. Пір час аразына кӧп сурығ ӱзӱрілген. Оларның кӧбізі ирткен сыныхтағларға теелген.
Хакасияның ӱгредіг паза наука министрі Лариса Гимазутина, тоғазығда чииттерзер айланып, оларға экзаменнерні чахсы тудыбысхан ӱчӱн улуғ алғызын читірген. Паза ол ідӧк школа тоосхан улустың іҷе-пабаларынзар айланған:
- Полған на олғанның чидии ідӧк аның иң чағын кізілерінің чидии полча. Іҷе-па-балар палаларына чурғаста чол асчалар. Пӱӱнгі палаларның чидии экзаменнерге нандырығлығ хайғанын кӧзітче. Аарлығ іҷе-пабалар, мин сірерні палаларыңның мындағ чахсы чидии ӱчӱн алғыстапчам!
АНГЛИЯ ТІЛІНҶЕ 100 БАЛЛ
Чоохтирға кирек, пӱӱл англия тілінҷе пірге хазна сыныхтағны 100 баллға национальнай гимназияның выпускнигі Софья Оленова чалғызан на тудыбысхан. Ағбан городтың чиит чуртағҷызы хакас гимназияда пис класстаң сығара ӱгренген. Гимназияда ӱгреніп, ол наа пілістерге тартылған.
Аның хынған предметтері санында хаҷан даа англия тілі полҷаң. Кічіг хызыҷахты пасха хан тілінең тирең таныстырған ӱгретчізі Татьяна Юрьевна Медведева.
- Минің кӧрізімнең, Татьяна Юрьевна англия тілінің иң чахсы ӱгретчілерінің санына кірче. Ол - пӧзік пілістіг ӱгретчі. Кӧп чыл олғаннарға тирең пілістер пирче. Аның уроктарына ӱгренҷілер хаҷан даа хынып чӧрчелер. Мин ағаа аның ӱчӱн улуғ алғызым читірчем, - теен чиит хыс, ӱгретчізін сағысха киріп.
Таныхтирға кирек, Софья ӱгреніске хаҷан даа нандырығлығ хайҷаң. Ол полған на предметке азынада тимненҷең. Аннаңар ол полған на урокта, ӱгретчі сурығ пирзе, хаҷан даа холын кӧдір турған. Пістің матырыбыс алнындағызынаңар даа азынада сағыссырирға пастаан. Ол, 10 класстох ӱгренчедіп, хайдағ профессия таллап алардаңар сағысха тӱскен. Прай ниме-нооны ибіре чахсы паалап, хыс юрист поларға пӧгінібіскен. Таллап алған профессияҷа вузсар кіріп алар ӱчӱн, ағаа тархын, орыс тілі предметтерңе пірге хазна сыныхтағларын тударға кирек полған. Че ол ідӧк хынған предмедін хайығ чох артыспасха чаратхан.
11 класста ӱгренчедіп, ол ӱс предметче экзаменнерге тимнен сыххан. Англия тілінің ӱгретчізі Татьяна Медведева Софьянаң хада англия тілінҷе ООН-ның паза ЮНЕСКО-ның 75 чылына чарыдылған «Я познаю мир» тиксі Россияның наука-практикалығ конференциязында араласханнар. Чиит істезігҷі анда, «За комплексный подход к раскрытию темы» номинацияның «Пасха хан тіллері» секциязында аралазып, сыйыхтығ орынға турысхан. Тоғызында ӱгренҷі англия тілінең ӧзімнернің аттарын тирең істескен.
Хыстың чооғынаң, пірге хазна сыныхтағларын тутчатханда, чӱрексібин, посты холға алып аларға иң сидік полған. Софья ӱс предметче 292 балл тоғынып алған. Ол орыс тілінең ЕГЭ-ны 98 баллға тудыбысхан, тархынны - 94 баллға. Полған на предметке нандырығлығ хайған. Иң соонда хыс англия тілі предмедінҷе хазна сыныхтаан тутхан.
- Англия тілінҷе хазна экзамені ӱс час ирткен. Мин анда прай ӱс час одырғам. Матаа, чӱрексібин, сурығларта орта нандырарға иң сидік полтан. Тус хайди ирт парғанын мин сизінмин дее халтам, - теен хыс.
Прай сыныхтағларны тудыбысхан соонаң киҷеегі ӱгренҷі халғанҷы предметче салтарларын чидікпин сахтаан. Ол аның 100 балл полар тіп ізенген. Че олох туста Софья, арса, пірее сурығда алҷаас идібіскен тіп ікінҷілеен. Хысха хынған предметче иң пӧзік балл алып алғаннаңар іҷезі искірген. Ол палазы ӱчӱн тың ӧрінген. Интернетче халғанҷы экзаменде оң полғаннаңар піліп алып, сах андох чахсы хабарны Софьяа искірген. Хыс іҷезінің сӧстерін ис салып, мин прай сурығларға орта нандырыбыстырбын тіп ӧрінген.
Амды школа тузы соонда халды. Пӱ кӱннерде хыс, чахсы ӱгренген ӱчӱн, алтын медаль паза хызыл аттестат холға алған. 29 июльға теере ағаа пис вузсар пічіктерін ызыбызарға кирек. Софья ам даа хайдағ вузсар ӱгренерге парарын таллапча. Че пістің матырыбыс, хайдағ даа вуз таллап алза, чуртазын юриспруденцияның «Чоннар аразындағы право» кӧстеенҷе палғалыстырарға сағынча.
Чооғыбысты тоосчатханда, мин, ЕГЭ-да 100 балл тоғынып алар ӱчӱн, сыныхтағларға хайди тимненерге кирек тіп хыстаң сурыбысхам.
- 100 баллға хайди тудыбызарта? Мин сағынчам, ол пӧгінні чуртасха кирер ӱчӱн, ӱгренерге, ӱгренерге пазох ӱгренерге кирек. Минің кӧрізімнең, сыныхтағны хынған предметче тутсаң, ағаа тимненерге дее хынығ полар. Ідӧк ол ӱгретчінің улуғ тоғызы полча. Пӧзік пілістіг ӱгретчі ӱгренҷіні хаҷан даа хазна сыныхтағларына чахсы тимнепче. Ол саринаң мин часкалығ кізібін. Мин республиканың иң пӧзік школаларына кірчеткен ӱгредіг учреждениезінде ӱгренгем. Паза мині пӧзік опыттығ ӱгретчілер хазна сыныхтағларына тимнееннер: Татьяна Юрьевна Медведева, Тарина Вячеславовна Богатырёва, Александра Геннадьевна Саражакова паза Лилия Олеговна Ахпашева.
Хыстың ӱгреніске тартылчатханын ӱгретчілері дее чахсы сизінгеннер. Хайди чоохтапча Сонядаңар аның класс устағҷызы Тарина Богатырёва:
- Софья прай нимее хайығ салча. Ол - уғаа сизіктіг ӱгренҷі. Аның пілізі алғым. Ол хайдағ даа темаа чарыдылған сурығларға нандырығ пілҷең. Анзы хыс кинде хығырчатханын чахсы кӧзітче. Сағынчам, аның сағынған сағызы толар. Нинҷе-де тус пазынаң ол чоннар аразындағы правоҷа юрист полыбызар.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы