ПУ ТОҒЫСХА ЧАЙАЛҒАННАРНЫ ТАНЫХТААННАР
06.08.2021
Хабарлар
8 августта - Пӱдірігӌі кӱні. Республиканың правительство туразында профессия ӱлӱкӱніне удур пӱдірігҷілерні чеестееннер.
Хакасия пазы Валентин Коновалов тӱзімніг істенчеткен паза тоғызына прай чӱреенең хайчатхан пӱдірігҷілерге сыйыхтар читірген. Ӱс кізее «Хакасияның аарластығ пӱдірігҷізі» ат пирілген, тоғыс кізее - Хакас Республиканың Аарластығ пічии
«Хакас Республиканың аарластығ пӱдірігҷізі» ат пирілген: «Ағбан городтың муниципальнай чурт фонды» коммерческай нимес организацияның плотнигі Пётр Сагатаевке, «Жилстрой» ООО-ның тиліс директоры Александр Сличныйға, «Хакасгражданстрой» ООО-ның директор орынҷызы Владимир Кривошеинге.
Хакас Республиканың Аарластығ пічиин алғаннарның санында «Стальконструкция» чабых акционер пірігізінің слесарьы Валерий Канзычаков паза водительі Евгений Максименко, «Абаканкоммунпроект» ООО-ның ӧӧн инженері Татьяна Ахпашева.
- Сірерні Пӱдірігҷі кӱнінең алғыстапчам! Пу кӱн республикаа, туралар пӱдірчеткеннерге танығлығ полча. Пӱдірігӌі - ол олаңай профессия нимес. Ағаа чайаларға кирек.
Хакасияда 700 азыра пӱдіріг организациязы саналча. Оларда 16 азыра муң тоғынӌы істенче. Пӱӱн пӱдіріг отрасльы алнында улуғ пӧгіннер турча. Пӱӱл 360 муң квадрат метр чурт тузаланысха кирібізерге кирек. Тиксі алза, пӱдіріг кирее алнында сидік пӧгін турча. Андар ідӧк национальнай проекттер кірчелер: школалар, олған садтарын пӱдірері, чон чӧрчеткен орыннар иптирі. Пӱдіріглернің кӧбізін подрядчиктер тимге маңнаныстығ сығарчалар. Аннаңар пӱдіріг ветераннарына паза тоғынӌыларына прай чӱреемнең алғызым читірчем. Республиканың экономиказын тилідерге полысчатханнарың, чонға чурт пӱдірчекеннерің ӱчӱн алғыс! Ӧӧні - хазыхтарың пик ползын! - алғыстаан пӱдірігҷілерні Валентин Коновалов.
Пӱдірігҷілерні ідӧк алғыстааннар Хакасия пазының орынҷызы Ирина Войнова, пӱдіріг паза ЖКХ министрі Валерий Келин.
«Ағбан городтың муниципальнай чурт фонды» коммерческай нимес организацияның 5-ҷі разрядтығ плотнигі Пётр Сагатаев «Хакас Республиканың аарластығ пӱдірігңізі» ат аларын пір дее сағыбаан. 2012 чылда ол Хакасияның Аарластығ пічиин алған. Пётр Сагатаев плотник полып 24 чыл тоғын салған, пу организацияда - 19 чыл.
- Армиядаң килгенде, хайда-да тоғынарға кирек полған. «Піліс» ӱгредіг комбинадында плотникке ӱгреніп алғам, ӱзінӌі разрядха сыныхтағ иртібіскем. Паза пір дее тоғысха кӧңнім чатпинча, аннаңар пӱдірігде ле істенчем, - сағыстарынаң ӱлескен Пётр Сагатаев.
Автор :
Оксана ТАНАЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде