НАА БЮДЖЕТ АЛЫЛ ПАРДЫ
06.08.2021
Хабарлар
Теестегі нимес сессия тиксі юрисдикциялығ 5-ҷі Апелляция чарғызы 30 июльда «Хакас Республиканың 2021 чылға паза пландағы 2022-2023 чылларға республика бюджедінеңер» законны тоғынминчатханға санирдаңар чарадығ алғаны сылтаанда иртірілген. Чарғы чарадии соонаң республикада прай хазна тӧлеглері тохтадыл парған. Республиканың чуртазы тохтадылбас ӱчӱн, наа бюджетті чапчаң аларға киректелген.
Ӧӧркі Чӧп сессиязы. Хакасияның Ӧӧркі Чӧбі 4 августта теестегі нимес сессияа чыылысхан. Сессия иртірерін чарғы чарадии кирексеен - аны хоостыра «Хакас Республиканың 2021 чылта паза пландағы 2022-2023 чылларға республика бюджедінеңер» закон тохтадылған
Хакасия правительствозы пастаанҷа республика бюджедінеңер наа закон проекті, тимнеліп, Ӧӧркі Чӧпсер кирілген. Республика депутаттары, каникулларынаң сығып, теестегі нимес сессияа чыылысханнар.
Сессия пасталар алнында залда 38 депутат (Ӧӧркі Чӧпте тиксі 50 депутат) парынаңар искірілген. Че анаң ЛДПР фракциязы кізізі Виталий Анисимов олар бюджетті мындағ маңзытта аларынаң тоғыр полчалар тіп резолюцияны хығырыбысхан. Анаң ЛДПР депутаттары залдаң сых чӧрібіскеннер.
Чараспинчазар, тоғыр ӱн пиріңер, - таныхтаан Ӧӧркі Чӧп кнезі Владимир Штыгашев, пу кирекке ӧкпеленіп. - Тизері, пасты хумзар кире суғары - ол орта нимес.
Тоғырланыс полза даа, сессия тоғызы узарадылған. Залда 32 депутат халған паза ікі депутат видео палғалызынҷа сессия тоғызында араласхан - сессияны азарына паза кӱн сурииндағы чалғыс сурығны ӱзӱреріне кворум читкен.
«Хакас Республиканың 2021 чылға паза пландағы 2022-2023 чылларға республика бюджедінеңер» закон проектінең Хакасияның финанстар министрінің тоғызын толдырчатхан Игорь Тугужеков таныстырған.
Нааҷылалған бюджеттің кӧзідіглері мындағ:
парыстар - 43 миллиард 730 миллион 878 муң салковай;
хорадығлар - 43 миллиард 848 миллион 102 муң салковай;
дефицит - 117 миллион 224 муң салковай.
- Социальнай хорадығлар 25 миллиард 215 миллион салковайға кӧрілген, - чоохтаан Игорь Тугужеков. - Ол республика бюджеді парыстарының тиксі синінің 58 проценті.
Республика бюджедінің пос парыстары пӱтче: налогтығ паза налогтығ нимес парыстар - 24 миллиард 519 миллион салковай, парысха налогтар - 16 миллиард 455 миллион салковай, ол санда организацияларның парызына налог - 10 миллиард 545 миллион салковай, НДФЛ налогы - 5 миллиард 909 миллион салковай. Піріктіре парысха налог 695 миллион 557 муң салковай полар тіп сахталча, ис-пайға налог - 8 миллион 281 муң, налог саларының нииктелген системазынаң тузаланғаны хоостыра налог - 687 миллион 276 муң салковай.
Федеральнай бюджеттең 19 миллиард 211 миллион салковай кірер тіп сахталча.
Республика бюджедінің прай хорадығларының ӧӧн чардығы социальнай кӧстегліг, олох туста бюджетниктерге чал ахчазын тӧлирі чыл тоозылғанңа кӧріл партыр. Чал ахчазын тӧлиріне 14 миллиард 25 миллион салковай салылтыр, социальнай тӧлеглерге - 7 миллиард 142 миллион салковай.
Чуртас-культура чардығына, ол санда ӱгредіг, хазых хайраллиры, социальнай политика, культура, физкультура паза спорт, 30 миллиард 426 миллион салковай хорадары кӧріл парған. Национальнай экономика отрасльларын паза ЖКХ-ны тилідеріне хорадығлар 7 миллиард 482 миллион салковайға салылған.
Республика бюджедінің хорадығлары санында ідӧк муниципальнай пӱдістерге пирілчеткен аймах трансферттер кӧріл парған - 14 миллиард 304 миллион салковай.
Хакасияның финанстар министрінің тоғызын толдырчатхан Игорь Тугужеков ідӧк республика бюджедінің амғы киректерінеңер искір пирген.
- Пӱӱл читі айның салтарларынҷа республика бюджедіне кірчеткен налогтыт паза налогтығ нимес парыстар 13 миллиард 821 миллион салковай пол парған, - теен ол. - Чарыда чоохтаза, бюджет кӧстеглері 56 процент артиинаң толдырылған.
Аның кӧрізінең, пу кирек экономика чахсылан сыхханын кӧзітче.
Хакасияның Сыныхтағ-сананыс палатазының кнезі Ольга Лях, хоза чоох тудып, наа бюджет проекті тоғынчатхан законодательство нормаларын хыйыстырбинча тіп паалағ пирген. Ідӧк ол закон проектінде кӧріл парған бюджет кӧстеглері прай толдырылар оңдайлығ полчатханын таныхтаан.
- Республика бюджедінің 2021 - 2023 чылларта дефициді 0,5 процент, 4 процент паза 3,5 процент полар тіп салыл парған, - чоохтаан ол. - Хакасияа, 2017 чылдағы федеральнай бюджет кредиттері реструктуризациязынаңар чӧптезігні санға алып, дефицит 10 проценттең кӧп полбазын тіп турғызылған.
Депутаттар «Хакас Республиканың 2021 чылға паза пландағы 2022-2023 чылларға республика бюджедінеңер» закон проектін пір ӱннең алыбысханнар.
Ӧӧркі Чӧп кнезі Владимир Штыгашев Хакасия правительствозына паза депутаттарға пірге тоғыс ӱчӱн алғызын читірген.
- Читі ай аразына піс налог парыстары кірерін ӧскіріп алғабыс, - таныхтаан ол. - Парысха налог ахчазы кірері ӱс миллиард салковайға хозыл парған. Ирткен чылнаң тиңнестірзе, ікі хати кӧп. Анзы піске бюджеттің прай статьяларын тудығ чох толдырарға ондай пирче. Иділген тоғыс ӱчӱн алғызым читірчем.
Анаң Ӧӧркі Чӧп кнезі Хакасияның пазы Валентин Коноваловха сӧс пирген.
- Пу киректе ікі кӧріс чох поларға кирек, - таныхтаан республика пазы. - Бюджет - ол имҷілернің, ӱгретчілернің, культура тоғынҷыларының чал ахчазы, имнег тураларының тоғызы, кізілернің чуртазы, школаа, хысхы тусха тимненіс. Амғы туста бюджетті аларын тохтадарға кӱстеністер - ол политика кӱрезии нимес, ол чахсынаң паза хомайнаң иртіре парчатхан хайыныс, кізілернің чуртазынаң ойнирға кӱстеніс. Пістің депутаттарыбыстың кӧбізі республика патриоттары полчатханы мині ӧріндірче. Пӱӱн сірер чалғыс орта чарадығ алғазар, алғьс сірерге аның ӱчӱн.
Ӧӧркі Чӧптің депутаттары Евгений Челтыгмашев, Григорий Назаренко паза Тайир Ачитаев, хоза чоох тудып, ЛДПР фракциязының депутаттары бюджет аларын тохтадарға кӱстенгенін ідӧк хомайлааннар.
Мыннаң сессия тоғызы тоозылған. Бюджет пӱкулее алыл парғанда, республикаа ниик тыныбызарға чарир - прай хазна тӧлеглері (чал ахчазы, социальнай тӧлеглер) узарадылар.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде