«МОБИЛЬНАЙ ТАБЫҒҶЫ» ОҢДАЙНАҢ ТУЗАЛАНАРҒА ЧАРИР
06.08.2021
Хабарлар
Табығлар-2021. Россияның сигізінҷі хығыртии Хазна Думазының депутаттарына табығларда «Мобильнай табығҷы» оңдай тузаланылча. Табығҷаа аның полызиинаң хайдағ даа чағынғы табығ участогында ӱн пирерге чарир. Ол оңдай хайди тоғынчатханнаңар чоохтап пирген Хакас Республиканың Табығ комиссиязының кнезі Александр Чуманин
- Александр Владимирович, «Мобильнай табығҷы» оңдайның пасхалалчатханы нимеде?
- «Мобильнай табығҷы» - ол табығҷаа хайдағ даа чағынғы табығ участогында ӱн пирерге чаратчатхан оңдай. Пастағызын на ол 2018 чылда Россия президентіне табығларда тузаланылған паза открепительнай удостоверениелер орнына кирілген.
Пастағы опыт пу оңдай табығҷыларға килістіре полғанын кӧзіткен. Ол мының алнында хайдағ-да сылтағларнаң ӱн пир полбинчатхан кізілерге табығларда аралазарға оңдай пирген. Иң не пастап чоох парча пічікке кирілген орыннаң ырах чуртапчатхан табығҷылардаңар. Открепительнай удостоверение алып аларына андағ кізее позының тӧреміл пічікке кирілген орны хоостыра территориальнай алай участковай табығ комиссиязынзар айланарға килісчең нооза. Чарыда чоохтаза, пірееде кӧп тус паза ахча даа хорадарға килісчең. «Мобильнай табығҷы» ол харығны толдыразынаң хыйа идібіскен, ӱн пирісті килістіре паза истіг идіп.
Пічікке кирілген орнында чуртабинчатханнардаң пасха, «Мобильнай табығҷы» оңдайнаң хайдағ даа кізі, хайзы ӱн пиріс кӱннерінде ол-пу сылтағнаң постың пічікке кирілген орнындағы табығ участогынзар кил полбинча, тузалан полар. Олох туста ол сылтағны киречілепчеткен пічіктер киректелбинче.
- Сынап хайдағ даа участокта ӱн пирерге чарир?
- Я, хайдағ даа чағынғы табығ участогында, хайда табығҷы орныхча алай Хазна Думазынзар табығларда ӱн пиріс кӱннері тузында полар. Хати сизіндірчем, пӱӱл ӱн пиріс ӱс кӱн иртер - 17, 18 паза 19 сентябрьда.
- Хайди таап аларға ол табығ участогын, хайдар ӱн пиріс кӱннерінде килерге килістіре полар?
- Табығҷаа азынада айланыстар алҷаң пункттың операторы алай, «Хазна полызығлары» портал пастыра айланыс тимнепчетсе, ӧнетін карта полыс пирер.
Табығ участогының номері, хайзы ӱн пиреріне таллалған, ідӧк участковай табығ комиссиязының орныхчатхан адрезі, аның телефон номері айланыстығ пічіктің тали тартчаң чардығында алай, айланыс «Хазна полызығлары» портал пастыра тимнелген полза, аның печатнай чардығында кӧзіділ парар.
- Айланыс пиреріне ниме идерге кнрек? Нинҷе тус хорадылча ол процедураа?
- Айланыс пирҷең процедура оой паза кӧп тус кирексібинче.
Аны тӧрт оңдайның пірсінҷе идерге чарир. 2 августтаң 13 сентябрьға теере хайдағ даа чағынғы территориальнай табығ комиссиязынзар алай кӧп функциялығ кін (МФЦ) пӧлиинзер паспорттығ айланып. Ідӧк айланысты пу туста «Хазна полызығлары» порталҷа пос кабинеді пастыра пир саларға чарир.
8 сентябрьдаң айланысты хайдағ даа участковай табығ комиссиязынзар пирерге чарир.
Табығҷыларның хайиин пазох айландырчам, айланыстарны алҷаң халғанҷы кӱн - 13 сентябрь. Тус кӧп, че сӧӧ тартарға кирек чоғыл.
- Айланыстарны аларынҷа хайдағ-да тоғыс графигі пар ба?
- Хакас Республиканың территориальнай табығ комиссиялары айланыстарны тоғынҷаң кӱннерде
9.00 частаң 18.00 часха теере алчалар,
тынағ кӱннерінде 10.00 частаң 16.00 часха теере.
МФЦ-ларда - тоғынҷаң кӱннерде тоғыстары тоозылғанҷа.
Участковай табығ комиссияларының тоғыс тузы сала пасха полар.
Тоғынҷаң кӱннерде айланыстар 16.00 частаң 20.00 часха теере алылар,
тынағ кӱннерінде - 10.00 час-таң 16.00 часха теере.
Тоғыс режимі табығҷыларға килістіре полар ӱчӱн тимнелген. Айланысты, тоғыстаң ибзер парчатса, пир саларға чарир полар.
- Александр Владимирович, хайди поларға, хаҷан ӱн пиріске пір табығ участогын таллап алғазың, соонаң, тізең, аны алыстырыбызарға кирексініс пол парған? Ікінҷі айланыс пирерге бе?
- Ол улуғ алҷаас полар. Сынға саналча ол айланыс, хайзы пастап пирілген. Пасхазы санға алылбинча паза полчатхан орны хоостыра табығҷылар списогынзар киреріне тӧстег полбинча.
Кӧрілчеткен киректе табығҷаа алында пирілген айланыс кӱзін чідірген тіп идібізерге кирек. Ол территориальнай алай участковай комиссияда
тимнелген полза алай МФЦ-да, оларның хайзынзар даа 13 сентябрьдаң орай нимес айланарға кирек. Айланыс «Хазна полызығлары» портал пастыра пирілген полза, аны порталох пастыра чох идерге кирек!
Аның соонаң табығҷы наа айланыс ит полар паза ӱн пиреріне пасха табығ участогын таллап полар.
13 сентябрь соонаң айланысты чох ит полбассың паза нааны пир полбассың.
- Хайди айланыс тимннрге кізее, хайзының «Хазна полызығлары» порталда пос кабинеді чоғыл паза хазии хоостыра ол сірер адаан пункттарзар пар полбннча?
- Анзына чағынғы территориальнай алай участковай табығ комиссиязынзар чоохтап алай пічік пазып искірерге киректелче. Андағ сурынысты телефонҷа, социальнай тоғынҷы алай пасха даа кізілер пастыра читірерге чарир. УИК кізілері 13 сентябрьдаң орай нимес андағ табығҷызар айланыс тимнирге ибзер килерлер. Табығҷы андада 17, 18 алай 19 сентябрьда ибде ӱн пирерге сағынчатханнаңар искір полар.
- Паза пір кирек. Табығҷы айланыс пирібіскен, че 13 сентябрь соонаң аның оңдайлары алыс парған, ол ибде халған. Ол ӱн пир полбас па?
- Пир полар. Мындағ табығҷы ӱн пиріс кӱннерінің хайзында даа позының пічікке кирілген орнындағы участковай комиссиязынзар айланча. Комиссия ол кізі пасха табығ участогында ӱн пирбеенін сыныхтабызар. Ол кирек сын полза, табығҷаа ӱн пиреріне бюллетеньнер пирілер.
- Александр Владимировнч, орныхчатхан чирҷе ӱн пирердеңер айланыс иткен табығҷыларның ӱн пиріс оңдайлары пасхалалча ба?
- Тың пасхалалчатханы чоғыл. Мындағ табығҷылар 17, 18 алай 19 сентябрьда олар таллаан табығ участогында алай, улуғластығ сылтағ пар полза, участковай комиссияны ибзер хығыртып, ӱн пир полар.
Че пір пасхалалчатхан ниме пар. Табығҷы пір мандаттығ табығ округының, хайда ол пічікке кирілген, хырығлары тастында полчатхан табығ участогын таллап алза, ол кандидаттарның федеральнай списогы ла ӱчӱн ӱн пир полар.
- Табығҷыларның пасха сурығлар сығысса, хайдар оларға айланарға?
- Россияның Ӧӧн Табығ комиссиязының искіріг-справка кінінзер сығдырадарға чарир. Аның телефон номері 8-800-200-00-20 алай Хакасияның Табығ комиссиязының «Ізіг линиязынзар» 8 (3902) 22-25-62 телефон номерінҷе.
Автор :
Хакасияның Табығ комиссиязының хабарлар пӧлии
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде