АСХЫСТА БЕТОН ЗАВОДЫ ТОҒЫНЧА
11.08.2021
Хабарлар
Тоғыс чорығы. Олған сады, школа паза предприятиелер - мына мындағ Асхыс аймаандағы объекттерҷе чӧрген Хакасия пазы Валентин Коновалов
«САҢЫҶАХ» СЫҢЫРАПЧА, ОЛҒАННАРНЫ ХЫҒЫРЧА
Пастағы тохтағ - Пилтір аал. Анда республика паза Асхыс аймаа ӱлгӱлері «Саңыӌах» олған садын азарында араласханнар. Азынада таныхтап саларға кирек, пу олған садының хызыл лентазы ирткен чылдох декабрьда хыплалған. Че хайди ілезіне сыххан, андағы суғ санитарнай нормаларға нандырбинчатхан, аннаңар оларға лицензия пирілбеен. Пу сурығны Хакасияның ӱгредіг паза наука министерствозы Асхыс аймаа администрациязынаң хада чарым чыл пӧккеннер.
Хайди полза, экспертиза чахсы салтар кӧзітті, лицензия, тізең, холға пирілді. Наа олған сады Пилтірдегі иркеҷектерге ізиин сала маңзыри асты!
«Саңыҷахсар» тиксі 120 пала чӧрер. Иң кічиине 1,5 ле час. Мындағ кічіг палаҷахтарға ӧнетін группалар тӧстелген, хайзынзар килістіре мебель паза ойнаҷахтар алылған. Наа олған садынаң пасха, Пилтірде ідӧк иргі учреждение пар, хайзынзар 80 азыра олған чӧрче. Хайди чоохтапча Пилтір аал чӧбі пазы Валерий Ильящук, школа алнындағы пу ікі учреждение аалға читкще, чазы чит парған палалар прайзы олған садынзар алыларлар.
«Саңыҷах» азылғанынаң чуртағҷыларны Хакасия пазы Валентин Коновалов алғыстаан:
- «Демография» национальнай проект хоостыра ікі чыл чарымға Хакасияда 14 олған сады тимге сыххан. Аалларда социальнай учреждениелер пӱдірілчетсе, уламох ӧріністіг. Ізенчем, олғаннар «Саңыӌахсар» чахсы кӧңніліг чӧр турарлар, тоғынҷылар, тізең, истіг оңдайларда істенерлер.
- Мин улуғ алғыс читірчем республика ӱлгӱзіне. Сірер пістің аймахха хаҷан даа хабасчазар. Асхыс аймаанда амды олған сады паза школа пӱдірілче. Килчеткен чылларда, тізең, аймах кінінде ӱгредіг организациязын пӱдірербіс, - таныхтаан Асхыс аймаа пазы Абрек Челтыгмашев.
Анаң Абрек Васильевич Хакасияның ӱгредіг министрі Лариса Гимазутинаа паза олған садын пӱдірген «Хакасгражданстрой» ООО-ның устағҷызы Олег Манжулаа Аарластығ пічіктер читірген.
Национальнай проект хоостыра пӱдірілчеткен школалар прай федеральнай ахчаа пӱдірілчетсе паза оборудование олох ахчаа алылчатса, олған садтарына федеральнай кін пӱдіріге ле ахча позытча. Мебельні паза ойнаҷахтарны республика паза муниципалитет пос ахчазына алча.
- Полған на ойнаҷахха паза киндеҷекке сертификат поларға кирек. Хайдағ даа ӧкерек, пик мебельнің алай ойнаҷахтың сертификады чох полза, піс аны ал полбаспыс. Пісті сыныхтағ органнары матап хайығда тутчалар, - сизіндірген ӱгредіг министрі Лариса Гимазутина.
«Саңыҷахта» полған на ойнаҷах паза мебель палаларның чазына килістіре, санитарнай нормаларға нандырчатхан ӧңніг паза даа пасхазы.
Ікі хадыллығ олған сады прайзының кӧңніне кірген. Чарых, истіг группалар кізі хараан ӧріндірген. Олғаннарға спортнаң айғасчаң, хазых пиктеҷең, актовай заллар, сенсорнай пӧліктер пар.
ШКОЛА НАА ӰГРЕДІГ ЧЫЛЫНА ТИМНЕЛЧЕ
Пилтірдегі ортымах школа пастағы ӱгренҷілерге ізиин ыраххы 1956 чылда асхан. Пу ӱгредіг чылында анда 400 азыра олған ӱгренер. Аның ӱгренҷілері аймах паза республика синінде иртірілчеткен марығларда сыйыхтығ орыннарға сыбыра турысчалар паза пірге хазна сыныхтағларын 90 азыра баллға тудыбысчалар.
Школа наа ӱгредіг чылына тимнел партыр. Поллар сырлалтыр, чыс ам даа пілдірче. Кабинеттерде, библиотекада паза даа пасха орыннарда улуғ нимес тыхтағ тоғыстары иділтір. Че иң килкім тоғыстар парча школаның спортзалында. Пӱӱл «Ӱгредіг» национальнай проект хоостыра спорт паза тренажер залларын, кип-азах алыстырҷаң, чайынҷаң пӧліктерні иптиріне 5 миллион азыра салковай позыдылған.
- Пӱдіріг материаллары складтарда чох полғаннаңар, піс графиктең сала хал сыххабыс, - таныхтапча подрядчик. - Полға тӧзеҷең материалны Украинадаң чахирға киліскен, кирек материал Россияда чох полған нооза. Ағаа хоза, спортзалның хырын нааҷылирына паза стенелерін сырлирына Асхыс аймаа администрациязы 1,2 миллион салковай позытхан.
Асхыс аймаанда мындағ улуғ зал ӱс ле - Пилтірде, Асхыста паза Полтахта. Анда аймах таа, республика даа марығларын иртірерге чарир!
ПРЕДПРИЯТИЕЛЕРНӀҢ САНЫ ХОЗЫЛЗЫН
Асхыс аймааның Пӱктіг аалы хыринҷа иртчетсе, улуғ предприятиені сизінерге чарир. Нинҷе-де чыл мының алнында пу орында хуу чазы полған. Аймах чуртағҷызы Анатолий Щетинин Асхыс аймаа паза Хакасия правительствозы хабазиинаң анда «Стройбест» наа предприятие тӧстеен. Ол ирткен чылдаң тоғынып пастаан.
Амды предприятие щебень паза бетон сығарча. Заводта тастарны унатчаң паза пӧлҷең комплекс, автобетоносмеситель турғызылған, административнай тура, котельнай, гараж пӱдірілген паза техника алылған. Техниканы Анатолий Валентинович Чебоксары городта алған.
Килчеткен чылларда предприятиеде бетон блоктарын, септиктерге «пурбалар» сығарарға пӧгін тутча. Мында идінҷекке Хакасия правительствозы хабас пирер.
- Предприятиенің тилізіне ахчаны федеральнай бюджеттең тартып аларға кӱстенербіс. Че Россияның прай субъекттеріне пір ле миллиард пирілче. Аннаңар федеральнай ахчаа тың на ізенерге кирек чоғыл. Піс позыбыстың бюджедінде полызығ кӧр саларбыс, - таныхтаан Хакасия пазының орынҷызы Ирина Войнова.
Мының алнында Абаза городта, Таштып, Пии, Асхыс аймахтарында тоғынчатхан подрядчиктер бетонны Ағбаннаң апарҷаңнар, амды, тізең, «Стройбест» ООО-даң на алып алчалар. Іди чол хорадығлары 10 муң салковайға хызырыл парғаннар. Анзын «Хакасгражданстрой» ООО предприятиенің устағҷызы Олег Манжула даа таныхтаан. Олар Асхыс аймаанда кӧп объект пӱдірчелер. Мының алнында бетонны Ағбаннаң тартхан ползалар, амды «Стройбесттең» садызып алчалар. Ідӧк бетонны паза щебеньні олаңай чуртағҷылар кӧп алчалар.
Наа предприятие ідӧк аймах чуртағҷыларына тоғыс орыннарын пирче. Ол наа ла тоғынып пастаанда, анда 3 кізі істенген, амды, тізең, 18. Ағаа хоза орындағы паза республика бюджеттерінзер налог кірче. Пу тусха 4 миллион салковай налог тӧлел парған.
Асхыстағы идінҷек Иван Миндибековтың «Аскизский стандарт» предприятиезін республикада ла нимес, пасха даа регионнарда чахсы пілчелер. Ол сыбыра тиліпче. Ӱр ниместе анда ит-сӧӧк унын сығарчатхан цех азыл парған. Аннаң хустарны азырирға чарир. Наа товарны сығарарына оборудование алылған паза турғызылған. Мыннаң мындар идінңек сабын сығарарға пӧгін тутча. Аннаң пасха, консерва цеғын пӱдірче.
- Мындағ предприятиелер Хакасияда кӧптең кӧп ле полып одырзын. Олар чуртағҷыларға хоза тоғыс орыннарын пирчелер паза республиканың экономиказын тилітчелер, - таныхтаан чооғында Хакасия пазы Валентин Коновалов.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде