ХАКАСИЯА ЧӦПСІНЧЕЛЕР
11.08.2021
Хабарлар
Аалҷылар. Киӌее «Азия» бизнес-отельнің конференц-залында КПРФ кізілерінің пресс-конференциязы ирткен
Орғах айының 10-ҷы кӱнінде КПРФ-тың ӧӧн комитедінің кнес орынҷызы, Хазна Думазының депутады Юрий Афонин, КПРФ-тың араласчызы, «Лениннің адынаң совхоз» ЗАО-ның устағҷызы Павел Грудинин Хакасиязар тоғыс чорығынаң килгеннер. Хакасиядағы КПРФ пӧлиинең Хазна Думазынзар табығларда араласчатхан кандидат Валерий Старостиннең хада олар пресс-конференция иртіргеннер.
Юрий Вячеславович КПРФ-тың хазнадағы пӱӱнгі орнын чарыт пирген паза аның табығларда араласчатхан депутаттарының оппозицияа «толғалдыртчатханынаңар», партияның ӧӧн кӧстеглерінеңер паза чағынғы табығлардаңар чоохтаан. Ідӧк ол партия кӧрчеткен паза хайығ айландырчатхан сидік сурығларға хайығ айландырған. Оларның пірсі налогтарға теелче. Партия хаҷаннаң ала налогты кізінің ис-пайынаң санирға кирек тіп санапча. Нинҷе пайзың - ол син налог тӧле. Уйан чуртапчатханнарны, тізең, прай налогтардаң позыдарға. Чир-чайаан ис-пайы национализациязын иртірердеңер сурығны турғысчаларох.
Павел Грудинин Хазна Думазынзар табығларда араласпинча, депутатха кандидаттың кирексіністерін ирт полбаан. Че халых тоғызын узаратча. Аның ӧӧн сағыссыразы - хазна экономиказы, чон чуртазы. Килкім предприятие ээзі тоғынҷыларына тикке ӱгредіг, имнег киреен, аалларда истіг паза иптіг чуртас тӧстеп салған. Хакасиязар ол политика сурығларынҷа ла нимес килче, мында аның чағын туғаннары чуртапчаттыр. Ідӧк ол, пеер пастағызын на килгенде, аның чалахай чуртағҷыларын паза сіліг чир-чайаанын таныхтаанынаң ӱлескен.
Валерий Старостин аалҷыларны республиказар килген ӱчӱн алғыстаан. Аның кӧрізінең, хайдағ даа табығларда чуртасты алыстырарға сағынчатхан чуртағҷылар араласчалар, олар ӱн пирерге чӧрчелер. Ідӧк ол Хакасияның Оӧркі Чӧбі пастыра чуртасха кирілчеткен пастағлардаңар искірген.
Аалҷылар Хакасия пазы Валентин Коноваловтың тоғызынаңар сағыстарынаң ӱлескеннер. Оларның кӧрізінең, республика устағҷызы ӱс чыл аразына чонға чағын пол парған. Ол бюджеттің хорадығларын иптирінҷе улуғ тоғыс апарча. Валентин Коноваловтың пасха даа чахсы сарилары таныхталған.
Тоғыс чорығында нинҷе-де предприятие тоғызынаң танызары паза чуртағҷыларнаң тоғазығ кӧрілген.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде