КӰСТЕНЗЕ, СИДІКСІНІСТЕРНІ ТОБЫРАРҒА ЧАРИР
11.08.2021
Хабарлар
Тоғыс чорығы. Хакасия пазы Валентин Коновалов Пии аймаанда пол килген
Пастағы тохтағ - Новотроицкай аал. Анда ортымах школаны тиксі тыхтапчалар. Школа 1962 чылдох пӱдірілген. 58 чыл аразына ол иргілен парған. Ағаа хоза, чир алтындағы суғлар, кӧдіріліп, школаның оразында сыбыра турыбысчаңнар.
2019 чылда Хакасияның ӱгредіг министерствозы школаны тиксі тыхтирдаңар чарадығ алған. Аны пылтыр августта тыхтап пастааннар.
Ортымах школа директоры Михаил Масаловичтің чооғынаң, школа 95 % тимде. Анда вентиляция, чарытхы пирчең щит турғыс саларға паза школа алнында тротуар тӧзебізерге халған. Пастап школа алнында асфальт саларға пӧгінгеннер. Че чир алтындағы суғлар кӧдірілчеткенде, анзы киліспинче. Школаа наа мебель алыл парған. Анда «Ӧзіс орыннары» федеральнай программаҷа классха оборудование тимде.
- Школаны сайабысханда, стенелер ле халған. Школадағы ниме-нооны аал чӧбі орныххан туразар паза клубсар кӧзірібіскеннер. Пістің аалға - ол таңнастығ ниме! Тыхтағны чидікпин сағаан кізілер, школазар кіргенде, алызығларға ӧрінгеннер, - теен школа директоры Михаил Владимирович.
Подрядчик Олег Бурнаков тыхтағ тузында сығысхан сидіксіністернең ӱлескен.
- Школа оразында суғ турған. Суғнаң на кӱрезеріне пір ай парыбысхан. Суғны изібіскен соонаң ораны хурутхабыс. Тура хырын, потологын, полын сайап, стенелерін не артыс салғабыс. Олар пиктер. Пастап пу объектті тыхтирға хорғыстығ полбаан. Че сайабысханда, школаның стенелері ле халғанда, чочыныстығ пілдірген. Хакасияның правительствозы, Пии аймаа устағ-пастаа паза ӱгредіг министерствозы хабазиинаң школаны тыхтабысхабыс. Че хай пірее сылтағларнаң тыхтағ сӧӧ тартыл парыбысхан, - теен Олег Бурнаков.
Тиксі тыхтағ ноға тузында тоозылбаанының сылтаан подрядчик Хакасия пазына искір пиргенӧк. Смета хоостыра вентиляция оборудованиезі 1 млн 150 муң салковайға тур парарға кирек, че субподрядчик аны 1 млн 800 муң салковайға сатхан. Аннаңар вентиляция оборудованиезі Новосибирсктегі заводтаң чахығ хоостыра алылар. Аны тимниріне тус парыбысхан.
Валентин Коновалов подрядчикке школаны 25 августха теере тыхтабызарға паза Пии аймаа пазы Иннокентий Стряпковха пу сурығны сыныхтағда тударға чахығлар пирген.
- Иннокентий Николаевич, подрядчикнең хада вентиляция чидерін сыныхтағда тударға кирексер. 15 августха школа ибіркізі иптел парарға кирек. Олох тусха вентиляцияны идерге халза, 10 кӱн аразына ол турғызыл парар. Школа 1 сентябрьға толдыразынаң тимде поларын пілерге кирекпіс, - таныхтаан Валентин Олегович.
Новотроицкай аалдағы школада пол килген соонда, Хакасия пазы Пии аалзар чол тутхан. Анда ол «Культура» нацпроектче Культура туразында тыхтағ хайди парчатханын кӧріп алған. Клуб 1989 чылда пӱдірілген. 30 азыра чыл аразына анын хыры, тасты нааҷылалған, чылығ пирчең система алыстырылған.
Пӱӱл Культура туразын тыхтирына нацпроект хоостыра 864 муң салковай пирілген. Аукцион иртірілгенде, «Аполлон» ООО утып алған. Амды пу организация Культура туразының кірлезін нааҷылапча. Тыхтағ тоғызы тузында 264 муң салковай ӱзӱрлелген. Пу ахчаа кӧзенектер алыстырылған. Культура туразына 1 млн 20 муң салковайға наа оборудование алылған.
Культура туразының директоры Сергей Фёдоровтын чооғынаң, кірлесте сіліг тимір пандус полар. Пу неделяда аны тимнебізерлер.
Хакасия пазы ідӧк Пии аалда чиит специалисттерге «Аалларның тиксі тилізі» программача ӱс тура пӱдіриин кӧріп алған. Олар ікі имнег тоғынҷызына паза пір ӱгретчее кӧріл парғаннар. Подряд организациязы - «Тасхыл» ООО. Пӱдіріг сӧӧ тартылча.
Амғы тусха тураларның фундаментi тимнелче.
Хакасияның аал хонии паза ас-тамах министрінің орынҷызы Александр Башковтын чооғынаң, пӱдірігҷілерге хараа-кӱнӧрте тоғынарға килізер. Сентябрьға теере тураларны пӱдірібізерге кирек.
Валентин Коновалов ідӧк Пииде Островскийнің орамазында орныхчатхан олған площадказында аал чуртағҷызы Евгений Комаровнаң тоғасхан. Ол олған площадказы иптелбинчеткеніне хоптанған. Андағы иргі изелчеткен чилеңместер палаларға хорғыс ағылчалар.
Пылтыр Пии аалда «Городта истіг оңдайлар тӧстирі» хазна программазынҷа «Чиңіс» паркы иптелген. Че аалның прай палаларына ол парксар парарға ырахтаңар, олар пасха ойнаҷаң орыннар тілепчелер. Островскийнің орамазындағы олған площадказы андағ орыннарның пірсі полча, че аны пірдеезі кӧрбинче, ибіркі от сабылбинча.
Хакасия пазы Валентин Коновалов Пии аал пазы Антон Филипповха пу паркты хазна программазынҷа иптиріне пічіктер тимнебізерге чахығ пирген.
Республика пазы ідӧк Новокурск аалда полған. Анда Культура туразының тыхтағ тоғызын кӧріп алған паза тыхтағнаң айғасчатхан подрядчикнең тоғасхан. Пу объектте тыхтағ сидік парча. Проект пічіктері нинҷе-де чыл мының алнында тимнелгеннер. Клубтың полы алыстырылған. Че чир суу кӧдірілгенде, полға сых тартыл парған. Амды подрядчик тыхтағны тӱзедер оңдайлар тілепче.
Новокурскта «Демография» нацпроект хоостыра 2019 чылның февральында ікі хадыллығ олған садының пӱдірии пасталған. Ол 80 палаа кӧрілген. Амғы тусха пӱдіріг турыбысхан. Подрядчикнең чӧптезіг чох иділген. Новокурск аал чуртағҷылары Валентин Коноваловнаң чоохтазып алар ӱчӱн тоғазыға килгеннер. Оларның сӧстерінең, аалда школаа парғалах 120 пала чуртапча. 1ҷе-пабалар олған сады пӱдіриине ӧрінгеннер, че ол іди сӧӧ тартыл парарын сағыбааннар. Ол пылтыр тузаланысха киріл парарға кирек полған.
Амғы туста олған садының стенелері тимде, хыры читіре чабылбаан. Кӧзенектер турғызыл парғаннар, че олар азылбинчалар. Валентин Коновалов пӱдіріг паза тыхтағ объекттерін кӧріп алған соонаң сағыс-кӧрізінең ӱлескен.
- Новокурсктағы олған садынаң пастағы ла чыл сидіксініс сығысча. Подрядчикнең сидіксіністер полғаннар. Ол нандырығлығ полбинчатханын кӧзіт пирген. Амды Пии аймаа, подрядчик тілеп, наа марығ чарлабысхан.
Піс чиит специалисттерге пӱдірілчеткен тураларны кӧріп алғабыс. Пииде андағ ӱс ле тура. Тоғыстар ідӧк ӧткін нимес апарылчалар. Подрядчик сентябрьға тураларны пӱдірібізерге молҷапча.
Новотроицктегі школа - иң сіліг. Анда хаҷанох тиксі тыхтағ сағааннар. Тыхтағ тоғызы 90 азыра процентке толдырыл парған. Вентиляцияҷа паза оох-теек тоғыстар халған. Подрядчик 1 сентябрьға тыхтағны тоос саларға молҷағ пирче.
Тиксі алза, сидіксіністер пар. Подрядчиктер маңнанминча, хайда-да устағ-пастағ чахсы хайығ салбаан. Киҷее Асхыс аймаанда полғам. Киректер тың пасхалалча. Піс Пии аймаана полысчабыс, подрядчикнең дее тоғыныбызарға хабас пирербіс. Пу кирек оой нимес. Че кӱстенібіссе, сидіксіністерні тобырып аларға чарир, - таныхтаан Валентин Коновалов.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде