Хой öскiрерiне хоза ахча позыдылар
12.08.2021
Хабарлар
Пӱӱн Хакасияның правительство туразында хой öскiрерiне чарыдылған чыылығ ирткен, хайзында республика пазы Валентин Коновалов, аал хонии министрi Сергей Труфанов, аал хонии управлениелерiнiң устағӌылары паза фермерлер араласханнар.
Чыылығда хой öскiрерiне хайдағ хабазығ пирiлчеткеннеңер паза ол хабазығнаң фермерлер хайди тузаланчатханнаңар чоох парған. Пылтыр хой öскiрерiне регион бюджедiнең 34,5 млн салковай позыдылған полза, пӱӱл пу кöстеге 54,5 млн салковай хорадарынаңар чарадығ алылған. Пу ахча хой öскiрчеткен предприятиелерге, фермаларға тöллiг хойларны, оларның ӱренiн, арған оңдайының тöллендiрӌең пункттарға оборудование садызарына пирiлер. Таныхтирға кирек, тöллiг хойларның ӱренiн садызарына субсидия пылтыр пастағызын на пирiлген. Аннаң Хакасияның 11 хонии тузаланып алған. Хой ӱренiне хорадылған ахчаның 98% айландырылча, оборудование алған ахчаның - 95%. Пылтыр 23 кiзi хойларны арған оңдайнаң тöллендiрӌеңе ӱгренiп алған. 11 хоныхта, 5718 хойны арған оңдайынаң тöллендiрiп, 5530 пас хураған алылған. Ол хурағаннарны öскiрерiне ахчалығ хабазығ тöлелче, пiр пас ӱчӱн - 500 салковай.
Пӱӱл арған оңдайынаң хойларны тöллендiрӌең специалисттернi ӱгредерiнӌе тоғыс узарадылча. Амғы тусха 30 кiзi ӱгредiг иртерiнеңер сурыныс пiчиин пир салған. Республиканың хоныхтары 35772 доза тöллiг хойларның ӱренiн аларларынаңар чахығлар пир салған.
Хой öскiрчеткен хоныхтарға хабазығ пирiлчеткенде, хой саны öс парған. Пӱӱл 1 январьға республиканың прай категориялығ хоныхтарында 346,9 муң пас хой паза öскi саналған полза, 1 июльға - 444,5 пас. Амғы тусха регионда 109764 пас хураған пiчiкке кирiлген.
Автор :
Оксана Челтыгмашева
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде