ААЛ ХОНИИ ПРЕДПРИЯТИЕЛЕРІНЕҢ ТАНЫСХАН
13.08.2021
Хабарлар
Аал хонии. «Лениннің адынаң совхоз» чабых акционер пірігізінің директоры паза саблығ идінҷек Павел Грудинин Хакасияның хоныхтарында пол килген
Республиканың аал хонии паза ас-тамах министрі Сергей Труфановнаң Павел Грудинин Ағбандағы «Воскресенский» теплица комплексінде паза Алтай аймааның Киров аалындағы «Бирюса» ООО-да полғаннар.
«Воскресенский» теплица комплексінің пазы Андрей Полищук хайдағ чир тамаан ӧскірчеткеннеңер паза тоғыс хайди парчатханнаңар чоохтап пирген. Амғы туста хоных пис сорт помидор ӧскірче.
- Халғанҷы ӱс чыл кӱскӱзін ӱгӱрсӱ паазы тӱс парча. Ағаа кирексініс чоғыл. Аннаңар чайғыда аны ӧскірбинчебіс. Помидорға, тізең, хаҷан даа кирексініс полча. Чайғыда ӧӧнінде помидор ӧскірілче, -теен Андрей Полищук.
Чир тамаа чахсы ӧзер ӱчӱн, Голландияда сығарылған ӱреннерні одыртчалар. Андрей Полищуктың таниинаң, олар ідӧк ағырығларға тың хаптырбинчалар. Теплицада ідӧк салаттар, мискелер ӧскірілче. Хысхы туста чир тамаан кӧп арах салчалар.
Павел Грудинин Андрей Полищуктаң пос киреенең айғазар сағыс хайди килгеннеңер сурған. Ол ипчізінің сурынызынҷа чахайахтар ӧскіреріне теплица иттір. Теплица чахсы киліс парғанда, ікінҷізін идерге сағыныбыстыр, хайзына 1,5 млн салковай хорат салтыр. 2011 чылда теплица комплексін азыбысхан. 2012 чылда пастағы чир тамаан чыып алған.
Амғы туста Андрей Полищуктың теплицаларында ӧскірілген чир тамаан тиксі Хакасияда паза хонҷых регионнарда пілчелер. Аның чооғынаң, ӧӧн кӧстег - татхыннығ чир тамаан ӧскірері.
«Бирюса» ООО-да Павел Грудинин тоғынҷыларнаң тоғасхан паза хоных устағҷызынаң тиліс оңдайларын ӱзӱрген. Аның таниинаң, аал хонии тоғынҷыларының чал ахчазы кӧп арах паза палаларын ӧскіреріне прай оңдайлар поларға кирек. Андада ла чииттер аалзар парарлар. Ол оңдайларны хазна тӧстирге кирек. Саблығ идінҷек «Лениннің адынаң совхоз» ЗАО-ның тоғынҷыларына предприятие хайди хабасчатханнаңар чоохтап пирген. Хоных тоғынҷыларына чурт аларына ссуда пирілче. Ай сай чал ахчазының чардығы аны тӧлиріне парыбысча. 100 муң азыра салковайдаң 10 муң артиинаң салковай тудыл парча. Сӧбіреде пала тӧрізе, улуғ арах чурт пирілче. Тоғынҷыларның палалары кружоктарға тикке чӧрчелер. Чиит сӧбірелерге, тынағдағы кізілерге хоза хабазығ кӧрілче. Тын ағырыбысхан кізілерге хырығ озаринда имненерге ахча позыдылча.
Хакасияның аал хонии паза ас-тамах министрі Сергей Труфановтың чооғынаң, Павел Грудининнің аал хониинаң айғазарында опыды улуғ, аннаңар аның чӧптері республиканың аал хонии предприятиелері пастарына читірілер.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы