ІӋЕНІҢ ПАЗА ПАЛАНЫҢ ПАЛҒАЛЫЗЫН ТЫЫТЧА
13.08.2021
Хабарлар
Пілерге туза. Имҷілернің ӧӧн чӧбі - хазых чуртасха тудынары. Аннаңар пала тӧрізӧк, хазых чуртас оңдайын апарарға киректелче. Ол іҷелер ыңааҷахтарын пос сӱдінең азырапчатханынаң пасталча
Имҷілер паланы хайди азырирдаңар сурыға пір ле нандырығ пирчелер: іҷе паланы позының сӱдінең имҷектезе, тузалығ полча. Ідӧк іҷе сӱдін чірченең пирзе, имҷектееніне чағын санирға чарир. Тиксі тилекейдегі педиатрлар паза неонатологтар, чылларнаң істезіп, ыңааҷахтарға іҷе сӱдінең артых паза тузалығ чиис чоғыл тіп салтар иткеннер.
Іҷе сӱді ыңааҷахтың хазиина прай даа саринаң улуғ туза ағылча. Іҷе сӱдінең имҷектезе, час палаҷахтарның иммунитеттері тыыпча. Іҷе сӱдінде 400 аймах тузалығ компонент, хайзыларын ыңааҷахтарға тимнелчеткен смесьтерге хос полбас. Полған на ипчінің сӱді палазына килістіре полча. Прайзының сӱді пасхалалча. Ипчі кізі сӱдінің составы кӱннің алысча, анзы палаа ниме киректелчеткенінең палғалыстығ.
Ипчі сӱдінзер гормоннар паза иммуноглобулиннер кірчелер, аның сылтаанда ыңааҷахтың хазии тӧстелче. Аптекаларда паза садығ тураларында садылчатхан ыңааҷахтар смесьтеріне андағ нимелерні хос полбас. Іҷе сӱдінде жирлер, углеводтар, аминокислоталар кирек син полчалар. Порағларда. тізең, анзы сайбалча, аннаңар андағ чииснең азыраан пала удаа ағыраачы полча. Оларның сахар диабеді паза салымнығ кӧдірім удаа полыбысча.
Ағаа хоза, іҷе сӱдінде ӧнетін ферменттер пар, хайзы имген сӱтті хайылдырарға полысча. Іҷе сӱдінде белоктар даа кӧп нимес, час палаа чидер син. Інек, ӧскі сӱдінде паза ыңааҷахтарға садылчатхан порағларда олар уғаа кӧп, аннаңар андағ чиис час паланың хазиина хомай теелче. Олар паар паза пӱгӱректер тоғызын сайбапчалар. Іҷе сӱдіндегі витаминнернін паза микроэлементтернің 70 %-і паланың иді-ханына кір парча, арған порағларның, тізең, 30 %-іле.
Ідӧк істезіглер кӧзіткеннер, имҷек имчеткені паланың нерва системазын паза психиказын тилідеріне туза ағылча. Оларның интеллекті, порағларнаң азыраан палаларнаң тиңнестірзе, пӧзік арах синде полча. Имҷек имчеткен паланың сӧӧктері орта тиліпче паза тістері пик полча. ОРЗ паза чуғынҷах ағырығлар ниик паза табырах ирт парча. Ол ағырығларға хаптырып алған пала іҷе сӱдінең азыранза, табырах чазылча. Іҷе позы даа ағырыбысса, пілдіріглер дее сыххалахта, аның сӱдінде час паланы хайраллапчатхан антителалар пол килчелер. Имҷек имчеткені паланы паза іҷені чағын итче, оларның паарсазына полысча.
Ипчілернің иді-ханы азах аар пол парғаннаң сығара ыңааҷахтарны имҷектиріне тимненче. Пала тапхан соонаң іҷе час паланы имҷектирі Ӧӧркі чайааннаң салылған.
Пала тӧрізӧк, аны іҷенің кӧксінзер салчалар. Ирке имҷек имзе, ипчінің пала орны (матка) синче.
Аннаң пасха, имҷектепчеткен ипчілернің иді-ханындағы окситоцин паза эндорфиннер чиит іҷелерге депрессияа кір парбасха полысчалар. Ыңааҷахты имҷектепчеткені ипчілернің кӧңнін кӧдірче паза чуртирға кӱс хосча.
Паланы ӱр имҷектеені ипчіні инсульт, онкология, склероз, чӱрек паза сӧӧк ағырығларынаң арачылапча. Ідӧк имҷекнең азырааны ипчілерге нандыра ніскеленерге полысча.
Іҷе ыңааҷаан имҷекнең азыраза, сӧбіре парызы даа хайраллалча. Садығ туразынаң порағларға, ыңааҷахты азырирға киректелчеткен ідістерге паза даа пасха ниме-нооларға ахча хорабинча.
Тиксі тилекейдегі хазых хайраллаҷаң организация (ВОЗ) іҷелерні час палаҷахтарын имҷекнең азырирға хығырча. Паланы имҷектеенінің тузазынаңар мыннаң даа кӧп чахсы сарин чоохтирға чарир. ВОЗ-тың паланы имҷекнең азырирына кӧрізі - ол амғы имнег паза психология наукалары чир-чайааннаң палғалысчатханын киречілепче.
Автор :
Лариса ЛЕБЕДЕВА, республиканың имнег профилактиказы кінінің имӌі-методизі
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы