ПӰДІРІГЕ - ПОСТЫҢ МАТЕРИАЛЛАРЫ
18.08.2021
Хабарлар
Чыылығ. Хакасияның пазы Валентин Коновалов республикада пӱдіріг материаллары рыногын тилідер сурығҷа чыылығ иртірген
ОТРАСЛЬДАҒЫ КИРЕКТЕР
Чыылығда Хакасия пазының орынҷылары Юрий Курлаев паза Ирина Войнова, пӱдіріг паза ЖКХ министрі Валерий Келин, экономика тилізі министрі Виктор Богушевич, чир-чайаан ис-пайы паза экология министрі Владимир Лебедев, ис-пай паза чир хайызығлары министрі Евгений Тарасов паза Хакасияның Тиліс фондының директоры Денис Пауль араласханнар.
Валентин Коновалов, чыылығның тоғызын азып, Хакасияда чурт пӱдірии сыбыра тиліпчеткенін таныхтаан. Аның чооғынаң, республика национальнай проекттерні чуртасха кирерінде ӧткін тоғыс апарча. Че пӱдірігні мыннаң мындар уламох тилідерге пӱдіріг материаллары кӧп киректелче. Аннаңар чыылығда, пу сферада сығысчатхан сидіксіністіг сурығларны ӱзӱріп, оларны пӧгер оңдайлар табарға кирек полар.
Амғы туста Хакасияда пӱдіріг отрасльындағы киректердеңер искірген министр Валерий Келин. Хайди ол чоохтаан, республика, прай хазнадағы чіли, национальнай проекттерні чуртасха кирерінде араласча. Чон посха чурт пӱдірінерге тың кӱстенче. 2030 чылға теере Хакасияда 3,5 миллион квадрат метр чурт тузаланысха кирерге кирек полар.
Национальнай проекттер хоостыра регионда школалар, олған садтары, имнег туралары, культура паза спорт учреждениелері, аалларда тоғынчатхан специалисттерге чурт пӱдірілче, кізілер изелчеткен чурттардаң кӧзірілчелер. Пӱдіріг отрасльына хоза хабазығ киректелче.
Прай чурт пӱдіриинің 40 процентін чон позы пӱдірініп алчатхан, амды пу сан 60 процентке чит парары кӧрілче. Кізілер ипотека кредидінең кӧп тузаланчалар, олар пӱдірінчеткен орыннарзар чоллар пӱдірерге, суғ пирчең система, сетьтер тартарға кирек. Прай тоғыстарны піс толдырарбыс. Аннаңар амды ӧӧн хайығ саларға кирек пӱдіріг материалларын Хакасияда сығарарына.
Республиказар пасха регионнардаң тимір паза пластик материалларын ағылчабыс, олар Хакасияда сығарылбинчалар. Бетон, унатхан сай, той, кірпис, ағас материаллары пости. Оларны ырахтын тартарға кӧп ахча хорадылча, материаллар аарлығ пол парчалар. Кӧп хайығ айландырарға килісче ол материалларның санына паза качествозына.
Кірписті «Хакасский элемент» предприятие сығарча, ол 2020-2021 чылларда 30 миллион кірпис сығарған, анзы региондағы пӱдіріг отрасльының кирексінізін чаап салча. Амды Харатаста «Колизей» фирма тоғынып пастаан, ол чазачаң кірпис тимнепче, кирек полза, 15 миллион кірпис сығарар. Ідӧк ол фирма брусчатка сығарча, аның прай товарына качество сертификады пар, амды ағаа чир тітірезіне сыдасчатханнаңар сертификат алып аларға кирек.
Хакасияда тимір-бетон материалларын сығарчатхан предприятиелер кӧп, олар хаҷаннаң мында тоғынчалар. Аймах алызығлар полза, олар тоғызын табырах килістіре апар сыхчалар. Тимір-бетон материалларын сығарарға хум, той, унатхан сай киректелче. Андағ пір кубометр материал 900 салковайға теере турчаң полған, амды ол паа 1200 -1500 салковайға теере ӧс парған.
Андағ оңдайнаң, республикада наа карьерлер азарға кирек. Оларға килістіре орыннар пар Асхыс, Шира аймахтарында, Ағбанда даа пар. Карьерлер монополист полчалар, аннаңар хайдағ хынза, андағ паалар турғысчалар.
Республикада газобетон сығарчатхан предприятие чоғыл, алынча идінҷектер ле тоғынчалар. Газобетонны Хакасиязар Новосибирсктең тартчатханнар, амды ол тоғыс тохтадыл парған. Республикада газобетон сығарҷаң постың производствозын тоғындырарға кирек, аны сығарчаң оборудование садызып, сертификат аларға.
Нацпроекттерні чуртасха тӱзімніг кирерге ағас материаллары чидіспинче. Аның паазы ідӧк тың ӧс парған, пір кубометр 11,4 муң салковайға турған полза, амды 24 - 25 муң салковайға садылча, хай пірее сорттары 40 муңа даа чит парча.
Хакасия прай пӱдіріг материалларын позы сығар сыхса, ол позына даа, хонҷых регионнарға даа чидер. Чурт пӱдірер сурығны пӧгерге пӱдіріг материалларына теелчеткен прай сурығларны пірге чарадарға кирек.
НИНҶЕ КІРПИС КИРЕК?
Кірпис сығарар производствоны тилідер сурығны Виктор Богушевич чарытхан. Хайди ол искірген, Хакасияда пӱдіріг отрасльына чылда 25 - 30 миллион кірпис кирек, нацпроекттерні чуртасха кирерге сығарысты 40 миллионға теере ӧскірерге чарир.
«Хакасский элемент» предприятие кірпис сығарар оборудованиені Хыдаттаң садызып алған, аны тоғындырарға хыдат специалисттері килген.
Рынокта аның кірпизінің оптовай паазы - пір кірпис 10 салковайға садылча, розницада - 10,5 салковайға. «Колизей» фирма чылда 15 миллион чазачаң кірпис сығарар, амды анда чир тітірезіне сыдасчатханнаңар сертификат аларға тимненчелер.
Газобетон сығарчаң технология линиязын амды республика Алтай крайынаң паза Челябинск облазынаң садысча. Республикаа кірписті читкіче сығарар сурығ пӱӱл пӧгіл парар.
Денис Паульның искіриинең, пу айда газобетонға сертификат алылар. Хакасияның экономика тилізі министерствозы паза Хакасияның Тиліс фонды оборудование алар сурығны пӧк салғаннар, конвейер линиязын турғызар орын табылған, складтар тимнелген.
ХУМНЫҒ САЙ, ТОЙ АЛАРЫ
Андағ материалларны аныҷаң орыннардаңар искірген министр Владимир Лебедев. Аның чооғынаң, республикада той алҷаң 17 орын, хумнығ сай алҷаң 5 орын пар. Ағбан пилтірі аймаанда андағ 7 участок, Асхыс аймаанда - пір участок . Наа карьерлер азар орыннар Шира, Асхыс, Таштып аймахтарында пар. Оларны тоғындырарға лицензия аларға 3 - 8 ай киректелер.
Хайди таныхтаан Валерий Келин, хумнығ сайға паалар халғанҷы туста ікі хати ӧс парған. Юрий Курлаевтің чооғынаң, пааларны іди тың кӧдірерге пір дее тӧстег чох полған.
Хакасия пазы экономика тилізі паза чир-чайаан ис-пайы министерстволарына пӱдіріг материалларын анир орыннарны тимнир сурығны пӧк саларға чахығ пирген.
АҒАС ЧИДІСПИНЧЕ
Ағас материаллары республиканың пӱдіріг рыногына чидіспинче. Аннаңар чоохтаан Юрий Курлаев. «Ағас пар, че аны Хакасияның рыногына киспин, тоғылахнаң Казахстанзар, Хыдатсар тартчалар», - таныхтаан ол. Республиканың пӱдіріг отрасльына 60 муң кубометр ағас кирек. Хакасия пазының чахиинҷа пу сурығны чарадарға тоғысчы ӧме тӧстелче, аннаң Юрий Курлаев устапча.
- Республикада сығарылчатхан пӱдіріг материаллары синін мыннаң мындар ӧскірерге кирек, газобетон тимнир предприятиелер тӧстирге, пасха даа материаллар сығарарға. Андағ тоғыс апарчатхан орындағы предприятиелерге правительство прай саринаң хабазар. Пӱдіріг материаллары посха читкіҷе сығарылза, отрасль мыннаң мындар тилир, тоғынҷаң наа орыннар тӧстелер, бюджетке хоза налогтар кірер, - таныхтаан Валентин Коновалов.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы