ЭКОЛОГИЯ КИРЕКСІНІСТЕРІНЕ ТӦСТЕНЕРГЕ КИРЕК
20.08.2021
Хабарлар
Тоғыс чорығы. Пу кӱннерде Хакасия пазы Валентин Коновалов хара тас аныпчатхан «Іскеркі-Пии разрез» ООО-да пол килген
17 АВГУСТТА ХАКАСИЯ ПАЗЫ ВАЛЕНТИН КОНОВАЛОВ, «ІСКЕРКІ-ПИИ РАЗРЕЗ» ООО-ның ТОҒЫНҶЫЛАРЫНАҢ ТОҒЫС ОҢДАЙЛАРЫН ПАЗА ПРЕДПРИЯТИЕ ЭКОЛОГИЯ КИРЕКСІНІСТЕРІНЕ ХАЙДИ ТУДЫНЧАТХАНЫН ПІЛІП АЛАР ӰЧӰН АНДА ПОЛ КИЛГЕН. АНДА РАЗРЕЗТІҢ ТОЛДЫРЫҒЛЫҒ ДИРЕКТОРЫ ДЕНИС ПОПОВНАҢ ТОҒАЗЫП, «БелАЗ»-тар ТЫХТАҶАҢ ПУНКТТА, ТАҒ ТОҒЫСТАРЫН ТОЛДЫРҶАҢ ПЛОЩАДКАДА ПАЗА СУҒ АРЫҒЛАҶАҢ ПӰДІРІГДЕ ПОЛҒАН.
Разрез Пиидегі хара тас орыннарында хара тасты азых одайна аныпча. Ол Пии аймаандағы Кирбі аалдаң 12 километр оортах орныхча.
2002 чылда разрез СУЭК акционер пірігізіне кір парған.
Тағ тоғыстарын толдырҷаң ачыхта регион пазы, самосвалның паза гидравлическай экскаваторның кабиналарынзар сығып, водительлернең чоохтасхан. Тоғынҷылар тоғыс оңдайларына чӧпсінчелер: чал ахчазы чахсы паза тузында тӧлелче, оларны аал-городтардаң предприятие автобустары тарт чӧрче.
Разрезте хости аалларның паза Ағбан, Харатас городтарның чуртағҷылары істенчелер.
2019 чылда разрез «Куматсу-4000» экскаватор садызып алған. Ол тоғысты нииктирге полысча.
- Мындағ кӱстіг экскаватор разрезте пір ле. Ол пістің ӧӧн полысчыбыс полча. Аның хамызы пір саңай 22 кубометр чир сузып алча. «БелАЗ»-тың кузовына 6-7 хамыс таарлабысса, тол парча. Пір сменаа экскаватор 14 - 17 муң кубометр чир салыбысча. «БелАЗ» пір саңай200 тонна чир таарлапча, - теен экскаватор водительiнің полысчызы Олег Суханов.
Ол разрезте 21 чыл тоғын салған, ол санда 10 чыл экскаватор водительі полып. Олег Суханов пеер Ызых посёлоктаң тоғысха чӧрче.
Кӧзідіг площадказынаң карьерде тоғынчатхан техника кічіг кӧрінче. Карьернің узуны 3,5 километр. Тӱбінде суғ арығлаҷаң орынға читіре трубалар салыл парғаннар. Оларның узуны 5,8 километр.
Суғ арығлаҷаң пӱдірігнің пастығы Александр Ушаков суғ хайди арығлалчатханынаңар чоохтап пирген.
- Разрезте суғ ӱс чардыхча арығлалча. Пастағы чардыхта ол кварц хум полызиинаң нефтьтең паза аар ниме-ноодаң чуулча, ікінҷізінде - тус порағ полызиинаң аммоний ионнардаң. Аммонийионнары чара чачырастар сылтаанда сығысчалар. Ӱзінҷі синде суғ ультрафиолетнең арығлалча. Ультра-фиолет биологическай ниме-нооны чох итче.
Пір час аразына 350 кубометр суғ арығлал парча. Арығлалған суғ чир алтынзар 10 метр тирең позыдылча. Разрез суғ арығлаҷаң пӱдірігнің кӱзін ӧскірібізерге пӧгінче. Андада пір час аразына 680 кубометр суғ арығлалар, - теен Александр Ушаков.
Аның чооғынаң, арығлалған суғ ап-арығ, ізерге чарапча.
Хакасия пазы Валентин Коновалов разрез тоғызынаңар сағыс-кӧрізінең ӱлескен:
- Компания экология суриина хайығ айландырча. Пу сурығ республика чуртағҷыларын даа, правительствоны даа сағыссыратча. Ниме-ноо сығарызы тилізін тіп сағынчабыс, че олох туста экология кирексіністеріне тудынарға кирек. Тоғыс чорығының пӧгіннерінің пірсі - экология кирексіністері хайди толдырылчатханын кӧріп алары. Ідӧк тоғынҷыларнаң чоохтазып алғам. Разрезте Россия законодательствозындағы экология кирексіністері толдырылчалар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде