ПАНДЕМИЯ АЛНЫНДАҒЫ ТУССАР АЙЛАНЧАБЫС
20.08.2021
Хабарлар
Пресс-конференция. Хакасияның Оӧркі чарғы кнезінің тоғызын толдырчатхан Сергей Доможаков республикадағы чарғыларның пу чылның пастағы чардығында толдырған тоғыс салтарларынаңар пресс-конференция иртірген
Пӱӱл Хакасияның Ӧӧркі чарғызының кнезі полған Виктор Носов отставкаа парыбысхан. Пу тоғыста ол ікі тус полған, закон хоостыра аннаң кӧп тус поларға чарадылбинча. Амды Ӧӧркі чарғы кнезінің тоғызын Сергей Доможаков толдырча, ол Ӧӧркі чарғы кнезінің орынҷызы полған. Пӧзік квалификация комиссиязында Хакасияның Ӧӧркі чарғы кнезіне Сергей Доможаковтың кандидатуразын турғызар сурығ кӧрілче. Комиссия андағ чарадығ алза, Россия президентінің указы сығар.
Хайди пресс-конференцияда Сергей Доможаков искірген, 2021 чылның пастағы чардығында Хакасияның федеральнай паза мировой чарғыҷылары 2177 уголовнай кирек, 65227 гражданскай паза административнай кирек, административнай сайбағлардаңар 17707 кирек кӧрібіскеннер. Іди прай 85111 кирек кӧрілген, анзы, пылтырғы олох туснаң тиңнестірзе, 7 процентке кӧп (пылтыр 79540 кирек кӧрілген).
Ол кӧрілген уголовнай киректерҷе аймах хатығластарға 1858 кізі чарғылатхан, ӱс кізі ахталған. Аймахтарның чарғылары 2870 кізіні административнай наңдырыға тартханнар, республиканың мировой чарғыҷылары - 11436 кізіні (пылтырғы олох туста 10019 кізі административнай нандырыға тартылған). Мындағ ӧзістің сылтағларының пірсі полған санитарно-эпидемиология правилоларын сайбаан ӱчӱн кізілер административнай нандырыға тартылғаны. Ідӧк пу ӧзіс чарғылар пандемия алнындағы туссар айланчатханнарын кӧзітче.
Коронавирус республика чарғыларының тоғызына илееде алызығлар кирген. Пірее чарғыларда, кӧзідімге, Ағбан город чарғызында, тоғыс ам даа толдыразынаң апарылбинча. Чарғыларда чарғыҷылар даа, аппарат тоғынҷылары даа, оларның сӧбірелеріндегі кізілер дее ағырчалар. Ікі тоғынҷының іҷелері ӱреен, пірсіне 58 час ла полған, ағаа ам даа чуртирға кирек полған.
Сорығда чарғыҷының полысчызы ӱреп парған. Ипчі, ӱр дее ағырбин, ах чарыхтаң парыбысхан, аның ӱс хызыҷаа ӧкіс халған, кічиине - 11 час.
Коронавирус - уғаа чуғынҷах ағырығ, аны тоғынҷылар постарының тоғызында даа чухтырып алчалар. Чарғыларзар аймах-пасха кізілер чӧрчелер, ағырчатхан кізіні табырах ілезіне сығарарға оой нимес. Пір мировой чарғыҷы, коронавирус хаптырып, уғаа тың ағырған, аны чадап ла имнеп алғаннар.
Пандемия тузында тоғыс уғаа сӧӧ тартыл парча, ӧӧнінде ол мировой чарғыҷыларға теелче. Чарғыҷы ағырыбысса, ол кӧрчеткен киректер тохтадыл парчалар, чарғыҷыны алыстырар оңдай чоғыл. Тоғынҷылар піди удаа ағырчатханда, чарадығ алылған: оларның хазиин хайдағ-да оңдайнаң хайраллир пӧгіннең, прай чарғыҷылар корпузына вакцинация иртібізерге. Іди Ӧӧркі чарғыда ла коронавирустаң прививка 100 азыра кізее турғызылған - чарғы тоғынҷыларына паза оларның туғаннарына.
Кӧп тылаастар сыххан уголовнай киректердеңер чоохтаза, Владимир Бызовтың паза аннаң хада иртчеткен кізілернің киректерінеңер чоохтирға чарир. Пу уголовнай кирек ам даа кӧрілче, аны кӧрерге, чарадығ аларға оой нимес, сидік тее тиирге кирек. Анда 300 том кӧрілче, хоптар кӧп кірче, полған на хопты сыныхтирға кирек. Пастағы инстанцияда ол кӧріл парған, чарадығ алылған, амды ікінҷі
инстанцияда прай хоптар кӧрілче.
Хоптарда кӧп ниме пас салчалар, че анда пір ле сӧс уголовнай кирекке теелчеткен полча. Праволар сайбалғаннаңар кӧп чоохталча. Уголовнай киректегі прай материалларны чахсы кӧрерге кирек. Ноға, хайдағ сағыснаң сайбағ иділген. Аны ам ӱс кізі чарғыда кӧрче. Прай саринаң кӧрерге илееде тус кирек полар, че сӧӧ тартарға чарабас.
Сергей Новиковтың кирее чарғызар килген, аны ам кӧрерлер. «Хакасияның бюджедінеңер» алылған законны Ӧӧркі чарғы тоғынминчатханға санирдаңар чарадығ алыбысхан. Ол Россияның Бюджет кодексін сайбап алылған. Бюджеттің дефициді 15 проценттең азыра полбасха кирек, депутаттар аннаң азыра дефициттіг бюджет алғаннар. Ӧӧркі чарғының чарадиина апелляция пирілген, че апелляция чарғызы, Ӧӧркі чарғының чарадиинаң чаразып, бюджеттеңер законны ідӧк тоғынминчатханға санаан. Ам Ӧӧркі Чӧп, сайбағларны тӱзедіп, наа закон алыбысхан.
- Чарғыҷы чуртастың аймах сфераларындағы киректерні кӧрче. Ол пірее алҷаас ит салза, аны сибер кӧрерге кирек. Кӧмес ле алҷаас иткен ӱчӱн чарғыҷыларны хатығлап сыхсабыс, чарғыҷылар пір дее чарадығ албастар. Чарғыҷы алған чарадығлар ӧӧркі инстанцияда хыйа иділзе дее, аның салтарларынҷа чарғыҷыны отставкаа ызыбызар сурығ турғызылбинча, - теен Сергей Доможаков.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде